Ukulolela mu “Kufulukisha”

“Ifibumbwa filolela no kufulukisha ukusokololwa kwa bana ba kwa Lesa.”—ABENA ROMA 8:19.

1. Imibele ya Bena Kristu ilelo ipalene shani ne ya Bena Kristu ba mu mwanda wa myaka uwa kubalilapo?

IMIBELE Abena Kristu ba cine balimo ilelo ipalile iya Bena Kristu ba mu mwanda wa myaka uwa kubalilapo. Ubusesemo bwayafwile ababomfi ba kwa Yehova aba muli shilya nshiku ukwishiba lintu Mesia ali no kumoneka. (Daniele 9:24-26) Ubusesemo bumo bwine bwasobele ukonaulwa kwa Yerusalemu lelo tabwakwetemo ifyebo ifingalenga Abena Kristu ukwishibila libela lintu ulya musumba wali no konaulwa. (Daniele 9:26b, 27) Ukupalako, ubusesemo bwa bulesa bwalengele abasambi ba Baibolo aba mu mwanda wa myaka uwalenga 19 ukulaenekelapo fimo. Ukupitila mu kulinganya “inshita cinelubali” isha muli Daniele 4:25 ku “nshita ya bena fyalo,” baenekele ukuti Kristu ali no kupokelela amaka ya Bufumu mu 1914. (Luka 21:24; Esekiele 21:25-27) Nangu line ibuuku lya kwa Daniele lyalikwata amasesemo ayengi, tapaba nangu bumo pali aya ubwafwilisha abasambi ba Baibolo aba muno nshiku ukwishiba mu kulungatika lintu imicitile yonse iya kwa Satana ikonaulwa. (Daniele 2:31-44; 8:23-25; 11:36, 44, 45) Nangu cibe fyo, ici cili no kucitika nomba line, pantu tuleikala mu “nshita ya ku mpela.”—Daniele 12:4.a

Ukulola mu Nshita ya Kubapo kwa kwa Kristu

2, 3. (a) Cinshi cishininkisha nga nshi ukuti tuleikala mu nshita ya kubapo kwa kwa Kristu mu maka ya Bufumu? (b) Cinshi cilangilile fyo Abena Kristu bali no kuba abalola nangu mu nshita ya kubapo kwa kwa Kristu?

² Ca cine, ubusesemo bwalengele Abena Kristu ukulaenekelapo fimo ilyo Yesu ashilapeelwa amaka ya Bufumu mu 1914. Lelo “icishibilo” Kristu apeele pa lwa kubapo kwakwe ne ca kupwa kwa micitile ya fintu calelanda pa fya kucitika. Kabili ifingi pali ifi fyali no kumonwa pa numa ukubapo kwakwe nakutendeka. Ifya kucitika fya musango yo—inkondo, ifipowe, ifinkukuma, ifikuko, ukufulilako kwa bupulumushi, ukupakaswa kwa Bena Kristu, no kushimikila imbila nsuma ya Bufumu mwi sonde lyonse—fyaba bushininkisho bukalamba ubwa kuti tuleikala mu nshita ya kubapo kwa kwa Kristu mu maka ya Bufumu.—Mateo 24:3-14; Luka 21:10, 11.

³ Nalyo line, icikalamba icali mu kufunda kwa kwa Yesu ukwa kushalikapo abasambi bakwe cali ca kuti: “Cenjeleni, loleni, . . . loleni.” (Mark 13:33, 37; Luka 21:36) Ukubelenga bwino bwino icalelandwapo muli uku kucincisha kwa kuba abalola kulangilila ukuti Kristu talelanda maka maka pa kuba abalola ku kumone cishibilo ca kutendeka kwa kubapo kwakwe. Lelo, alekambisha abasambi bakwe aba cine ukuba abalola mu nshita ya kubapo kwakwe. Ni kuli cinshi Abena Kristu ba cine bali no kubako abalola?

4. Mifwaile nshi icishibilo Yesu apeele cali no kubomba?

⁴ Yesu ayaswike ukupitila mu busesemo bwakwe ubukalamba lintu bamwipwishe ukuti: “Ni lilali ifi fintu fikabako [ifya kucitika fyatangilile ubonaushi bwa micitile ya fintu iya ciYuda], kabili cinshi cikaba icishibilo ca kubapo kwenu ne ca kusondwelela kwa micitile ya fintu?” (Mateo 24:3, NW) Icishibilo casobelwe tacali no kwishibisha fye ukubapo kwa kwa Kristu lelo na kabili caishibishe ifya kucitika fyali no kutangilila impela ya micitile ya fintu iilipo.

5. Ni shani fintu Yesu alangilile ukuti nangu line akabako lwa ku mupashi, ali no “kwisa” na kabili?

⁵ Yesu alangilile ukuti pa nshita ya “kubapo” kwakwe (mu ciGriki, pa·rou·siʹa) ali no kwisa mu maka no bukata. Pa lwa uko “kwisa” (ukulangililwa ne shiwi lya ciGriki ilya erʹkho·mai), asosele ukuti: “E lyo kukamoneka ne cishibilo ca Mwana wa muntu mu muulu; e lyo ne nko shonse sha pano isonde shikapumapo imisowa, no kumono Mwana wa muntu aleisa pa makumbi ya mu muulu na maka yakalamba no bukata. Nomba sambilileni umulumbe ku mukunyu. Umusambo wa uko ilyo nomba wabo uteku no kulemba amabuula, mwaishibo kuti amainsa yali mupepi; ifyo fine na imwe, ilyo mukamona ifi fyonse, ishibeni ukuti [Kristu] ali mupepi, ali pa mwinshi. E ico loleni, pa kuti tamwaishibo bushiku Shikulwinwe akesamo. . . . Mube abaiteyanya; pa kuti Umwana wa muntu akesa mu kashita mushikashile.”—Mateo 24:30, 32, 33, 42, 44.

Mulandu nshi Yesu Kristu Ali no Kwishila?

6. Cinshi cikalenga “Babele Mukalamba” ukonaulwa?

⁶ Nangu ca kuti alibapo nge Mfumu ukutula 1914, Yesu Kristu afwile na kabili ukupingula amateyanyo yonse ukusanshako cila muntu ilyo ashilaonaula bonse abakasangwa ukuti babifi. (Linganyeniko 2 Abena Korinti 5:10.) Nomba line Yehova ali no kubika cene mu mitima ya bakateka ba bupolitiki ukuti bonaule “Babele Mukalamba,” ubuteko bwa calo ubwa kupepa kwa bufi. (Ukusokolola 17:4, 5, 16, 17) Umutumwa Paulo mu kulungatika asosele ukuti Yesu Kristu akonaula “umuntu wa bupulumushi”—e kuti bashimapepo ba mu Kristendomu aba busangu, ulubali lukalamba ulwa “Babele Mukalamba.” Paulo alembele ukuti: “Umupulumushi ulya akasokololwa, untu Shikulu Yesu akonaula ku mupu wa mu kanwa kakwe, no kumusangule ca fye ku kumoneka kwa kubapo kwakwe.”—2 Abena Tesalonika 2:3, 8, NW.

7. Ilyo Umwana wa muntu akesa mu bukata bwakwe, bupingushi nshi akacita?

⁷ Nomba line fye, Kristu ali no kupingula abantu ba nko ukulingana ne fyo basunga bamunyina bakwe abacili pe sonde. Pali Mateo 25:31-46 tubelengapo kuti: “Ilyo Umwana wa muntu akesa mu bukata bwakwe, na bamalaika bonse pamo nankwe, e lyo akekala pa cipuna ca bukata bwakwe, ne nko shonse shikalonganikwa ku cinso cakwe; kabili akabapaatukanya, ifyo umucemi apaatukanye mpaanga ku mbushi, no kubike mpaanga ku kulyo ne mbushi ku kuso. . . . Imfumu [ikaasuke mpaanga], aiti, Ndemwebe cine cine, nati, apo ponse mwacitiile umo wa muli aba bamunyinane abacepesha, mwacitiile ine. . . . Kabili [imbushi] bakafumapo, bakaya ku kulimunwa kwa muyayaya; lelo abalungami bakaya ku mweo wa muyayaya.”

8. Ni shani fintu Paulo alondolola ukwisa kwa kwa Kristu ku kupingula abashipepa?

⁸ Nga fintu calangililwa mu mulumbe wa mpaanga ne mbushi, Yesu akaleta ubupingushi bwa kupelako pali bonse abashipepa. Paulo aebele abasumina banankwe abalecushiwa pa “lwa kutaulukila pamo na ifwe, ilyo Shikulu Yesu akasokololwa ukufuma mu muulu pamo na bamalaika ba maka yakwe mu mulilo uulebilima, ukucite cilandushi ku bakaano kwishiba Lesa, na ku bashinakila mbila nsuma ya kwa Shikulwifwe Yesu; bantu abakamono kukandwa, uboni bwa muyayaya, ukufuma ku cinso ca kwa Shikulu na ku bukata bwa maka yakwe, ilyo akesa ku kucindikilwa mu ba mushilo bakwe.” (2 Abena Tesalonika 1:7-10) Pa kuba ne fya kucitika fya kucincimusha fyonse fi ku ntanshi, bushe tatulingile ukulanga icitetekelo no kuba abalola pa kufulukisha ukwisa kwa kwa Kristu?

Ukulolela Ukusokololwa kwa kwa Kristu

9, 10. Mulandu nshi abasubwa abacili pe sonde balolela no kufulukisha ukusokololwa kwa kwa Yesu Kristu?

⁹ “Ilyo Shikulu Yesu akasokololwa ukufuma mu muulu” takapeleele fye pa konaula ababifi lelo akalambula na balungama. Bamunyina basubwa aba kwa Kristu abacili pe sonde kuti na kabili bacula ilyo Kristu ashilasokololwa, lelo balasekelela mwi subilo lyabo ilya lulumbi ilya ku muulu. Umutumwa Petro alembele ku Bena Kristu basubwa ukuti: “Ifyo mukumako ku miculile ya kwa Kristu, sekeleleni; ukuti na mu kusokololwa kwa bukata bwakwe, mukasekelele no kwanga.”—1 Petro 4:13.

¹⁰ Abasubwa bali abapampamina pa kutwalilila aba busumino ukufikila Kristu ‘akabalonganye kuli wene’ pa kuti “bucishinka” bwa citetekelo cabo ‘busangwe ukulola ku kutasha no lulumbi no mucinshi pa kusokololwa kwa kwa Yesu Kristu.’ (2 Abena Tesalonika 2:1; 1 Petro 1:7) Icingasoswa pa lwa Bena Kristu ba musango yo abafyalwa ku mupashi aba busumino ca kuti: “Ubunte bwa kwa Kristu bwaikashiwe muli imwe. E ico imwe mwaba abashipelebela ku ca kusenamina nangu cimo, pa kuba abalolela ukusokololwa kwa kwa Shikulwifwe Yesu Kristu.”—1 Abena Korinti 1:6, 7.

11. Ilintu balelolela ukusokololwa kwa kwa Yesu Kristu, cinshi cintu Abena Kristu basubwa bacita?

¹¹ Abashalapo basubwa bayumfwa nge fyayumfwile Paulo, uwalembele ukuti: “Ndetila ubucushi bwa nshita ino tabuyene ukulingwa ku bukata ubukasokololwa kuli ifwe.” (Abena Roma 8:18) Ukupende nshita te kulenga ukuti icitetekelo cabo citwalilile. Balapamfiwa mu mulimo wa kwa Yehova, ukupayanya ica kumwenako cishaiwamina ku banabo, “impaanga shimbi.” (Yohane 10:16) Aba abasubwa balishiba ukuti impela ya ino micitile ya fintu naipalama, kabili balomfwila ukukonkomesha kwa kwa Petro ukwa kuti: “Mube abaikaka mu misana ya mitima yenu, mube abatekanya, cetekeleni ukusenamina ukukaletwa kuli imwe mu kusokololwa kwa kwa Yesu Kristu.”—1 Petro 1:13.

Ico “Ifibumbwa Filolela no Kufulukisha”

12, 13. Ni shani fintu ifibumbwa fya buntunse “fyalengelwe ukulamba ku kuicusha fye,” kabili cinshi cintu impaanga shimbi bafulukisha?

¹² Bushe impaanga shimbi na bo balikwata ico balolela no kufulukisha? Ukwabulo kutwishika balikwata. Pa numa ya kulanda pe subilo lya bukata ilya abo Yehova aapokelela nga “bana” bakwe abafyalwa ku mupashi kabili nga “Impyani shinankwe isha kwa Kristu” mu Bufumu bwa ku muulu, Paulo atile: “Ifibumbwa filolela no kufulukisha ukusokololwa kwa bana ba kwa Lesa. Pantu ifibumbwa fyalengelwe ukulamba ku kuicusha fye, te ku kuitemenwa iyo, lelo pa mulandu wa wafilamfishe, pa kucetekelo kwa kuti ifibumbwa na fyo fikalubulwa ku busha bwa kubola no kutwalwa mu buntungwa bwa bukata bwa bana ba kwa Lesa.”—Abena Roma 8:14-21; 2 Timote 2:10-12.

¹³ Ukupitila mu lubembu lwa kwa Adamu, intuntuko shakwe shonse ‘shalengelwe ukulamba ku kuicusha fye,’ ukufyalilwa mu busha bwa lubembu ne mfwa. Balifilwa ukuilubula ku busha bwa musango yo. (Ilumbo 49:7; Abena Roma 5:12, 21) Iye, fintu impaanga shimbi bafulukisha ‘ukulubulwa ku busha bwa kubola’! Lelo ilyo ico cishilacitika, ifintu fimo fifwile ukucitika ukulingana ne nshita ne myaka ifya kwa Yehova.

14. Cinshi cikasanshiwa mu “kusokololwa kwa bana ba kwa Lesa,” kabili ni shani ici cikalenga abantu “ukulubulwa ku busha bwa kubola”?

¹⁴ Abashalapo aba mu basubwa “bana” ba kwa Lesa balingile ‘ukusokololwa’ intanshi. Cinshi ici cikasanshamo? Mu nshita ya kwa Lesa iyalinga, impaanga shimbi shikamono bushininkisho bwa kuti abasubwa nomba ‘nabakakatikwa’ no kukatamikwa ku kuteka na Kristu. (Ukusokolola 7:2-4) Na kabili abana ba kwa Lesa ababuushiwa bakasokololwa lintu bakabombela pamo na Kristu ukonaula imicitile ya fintu iya kwa Satana. (Ukusokolola 2:26, 27; 19:14, 15) Lyene, mu Kuteka kwa Myaka Ikana Limo Ukwa kwa Kristu, na kabili ‘bakasokololwa’ nga bashimapepo umo amapaalo yakafuma mwi lambo lya cilubula ilya kwa Yesu yakalaishila ku “fibumbwa” fya buntunse. Ici cikalenga abantu ‘ukulubulwa ku busha bwa kubola’ na kwi pele pele ukwingila mu “buntungwa bwa bukata bwa bana ba kwa Lesa.” (Abena Roma 8:21; Ukusokolola 20:5; 22:1, 2) Pa kuba ne filolelo fikalamba ifya musango yo, bushe kuti twasunguka ukuti impaanga shimbi ‘shilolela ukusokololwa kwa bana ba kwa Lesa’ mu ‘kufulukisha’?—Abena Roma 8:19.

Ukutekanya kwa kwa Yehova Lipusukilo

15. Cinshi tushilingile ukulaba pa lwa fyo Yehova alinge nshita ya fya kucitika?

¹⁵ Yehova ni Kasunga wa Nshita Umukalamba. Takapuse mu kulinga kwakwe ukwa nshita. Te lyonse ifintu fingalacitika nga fintu twaleenekela pa lwesu. Nangu cibe fyo, kuti twacetekelo mupwilapo ukuti amalayo ya kwa Lesa yonse yakafikilishiwa. (Yoshua 23:14) Pambi kuti alesuminisha ifintu ukutantalilako ukucila fintu abengi baenekele. Lelo natutesekeshe inshila shakwe no kusunguka pa mano yakwe. Paulo alembele ukuti: “Iye, kushika kwa bucindami kabili ukwa mano kabili ukwa kwishiba ifya kwa Lesa! Ifya bupingushi fyakwe, ifyo fyabulo kupenengwamo! Ne mibombele yakwe, ifyo yabulo kulondololwa! Pantu nani aishibo mutima wa kwa Shikulu? Nani aba cilolo wakwe?”—Abena Roma 11:33, 34.

16. Ni bani bakamwenamo mu kutekanya kwa kwa Yehova?

¹⁶ Petro alembele ukuti: “Mwe batemwikwa, apo mulelolele fi fintu [ukonaulwa kwa “myulu” ikote ne “calo” no kufipyanikapo ne “myulu ipya” ne “calo cipya” ifyo Lesa alaya], bombesheni na maka yenu yonse ukusangwa na wene mu kupelako ababula akabi na babula kalema kabili mu mutende. Kabili, tungeni ukutekanya kwa kwa Shikulwifwe ukuti lipusukilo.” Pa mulandu wa kutekanya kwa kwa Yehova, amamilioni na yambi balepeelwa ishuko lya kwisapusunsuka ukupula mu “bushiku bwa kwa Yehova” ubukesa mu kukanaenekela “ngo mupupu.” (2 Petro 3:9-15, NW) Na kabili ukutekanya kwakwe kulelenga ukuti ‘tutwalilile ukulabombela ipusukilo lyesu no mwenso no kututuma.’ (Abena Filipi 2:12) Yesu atile tufwile ‘ukuyangwa’ no ‘kulola’ nga tulefwaya ububile no kuti tukose mu “kwiminina ku menso ya Mwana wa muntu” ilyo akesa ku kupingula.—Luka 21:34-36; Mateo 25:31-33.

Twalilileni Ukulolela mu Kushipikisha

17. Mashiwi nshi aya mutumwa Paulo tulingile ukumfwila?

¹⁷ Paulo acincishe bamunyina aba ku mupashi ukukanalolekesha “ifimoneka, lelo ifishimoneka.” (2 Abena Korinti 4:16-18) Tafwaile nangu cimo ukubapofwisha ku cilambu babikiilwe ica ku muulu. Nampo nga tuli Bena Kristu basubwa nelyo aba mu mpaanga shimbi, natuleibukisha isubilo lyawamisha ilyabikilwa ifwe no kukanaleka. ‘Natutwalilile ukulalolela mu kushipikisha,’ ukuishininkisha ukuti “ifwe tatuli abakwinda no konaika; lelo tuli abakwate citetekelo no kusunge mitima yesu.”—Abena Roma 8:25; AbaHebere 10:39.

18. Mulandu nshi twingacetekela ukushila inshita ne myaka mu maboko ya kwa Yehova?

¹⁸ Mu citetekelo kuti twasha inshita ne myaka mu maboko ya kwa Yehova. Ukulingana ne fyo aatantike nshita, ukufikilishiwa kwa malayo yakwe ‘takwakashimbe iyo.’ (Habakuki 2:3) Pali ino nshita, ukukonkomesha kwa kwa Paulo kuli Timote nakutukuma nga nshi. Atile: “Ku menso ya kwa Lesa na ya kwa Kristu Yesu, uukapingula aba mweo na bafwa, na ku kumoneka kwakwe no bufumu bwakwe, ndekukonkomesha, nati, Bile cebo; cincila inshita iyene ne nshita iishiyene . . . Bombo mulimo wa bukabila bwa mbila nsuma, fishapo bukapyunga bobe.”—2 Timote 4:1-5.

19. Bushe ino icili ni nshita ya kuti abantu ba kwa Yehova bacite cinshi, kabili mulandu nshi?

¹⁹ Imyeo ya bantu ili mu busanso—iyesu ine ne ya banensu. Paulo alembele ukuti: “Uimone we mwine, ne sambilisho lyobe; ikalilila muli ifi fintu; pantu pa kucite fyo, ukaipususha we mwine na balekumfwa.” (1 Timote 4:16) Inshita isheleko kuli iyi micitile ya fintu naicepa nga nshi. Ilyo tulelolela no kufulukisha ifya kucitika fya kucincimusha ifili ku ntanshi, lyonse natube abaibukila ukuti ino icili myaka ne nshita ya kwa Yehova iya kuti tubile imbila nsuma iya Bufumu. Uyo mulimo ulingile ukupwishishiwa ukulingana na po alefwaila. “E lyo, impela ikesa,” nga fintu Yesu asosele.—Mateo 24:14.

[Futunoti]

Ukupitulukamo

◻ Tupalene shani na Bena Kristu ba mu mwanda wa myaka uwa kubalilapo pa lwa kupende nshita?

◻ Mulandu nshi Abena Kristu balingile ‘ukuba abalola,’ nangu fye ni mu nshita ya kubapo kwa kwa Kristu?

◻ Mulandu nshi ifibumbwa fya buntunse fifulukisha “ukusokololwa kwa bana ba kwa Lesa”?

◻ Mulandu nshi twingacetekela ukushila inshita ne myaka mu maboko ya kwa Yehova?

[Icikope pe bula 17]

Abena Kristu balingile ukuba abalola ilyo balelolela ukwisa kwa kwa Kristu

[Icikope pe bula 18]

Abashalapo basubwa batwalilila ukupamfiwa mu mulimo wa kwa Yehova, tabashimpa icitetekelo cabo pa kupende nshita