Twalilileni Ukulunduluka lwa ku Mupashi!
Lyonse Tulingile Ukuteesa No Kwibukisha Ubushiku Twabatishiwe. Pantu E Bushiku Twaipeele Apabuuta Ku Kubombela Lesa.
ABENGI pa kuti babatishiwe bakabila ukutukuta—bafwile ukuleke mibele yabipa bakwete pa nshita ntali, ukuleka ukwangala ne fibusa fyabipa, e lyo no kwalula imitontonkanishishe ne misango yashikama.
Ulubatisho ni ntendekelo fye nangu cingati lwaba ni nshita ya nsansa kabili iyacindama mu bumi bwa Mwina Kristu. Umutumwa Paulo aebele Abena Kristu babatishiwa mu Yudea ati: “E ico, natufume ku masambililo ya kutendeka ya kwa Kristu, no kulola ku bukalamba.” (AbaHebere 6:1) Abena Kristu bonse bakabila ‘ukufika kuli buumo bwa kutetekela na ku kwishibo Mwana wa kwa Lesa, ukufika na ku bukalamba, ku mulingo wa mushinku wa mwisulo wa kwa Kristu.’ (Abena Efese 4:13) Ukulunduluka ukufika ku bukalamba e kwingalenga fye ukuti ‘twikashiwe ku kutetekela.’—Abena Kolose 2:7.
Imyaka inono iyapitapo, amakana ya bakapepa baipeela abapya balisa mu cilonganino ca Bwina Kristu. Napamo muli pali aba. Ukupala bamunyinenwe aba mu mwanda wa myaka uwa kubalilapo, tamwingafwaya ukutwalilila mu bucece bwa ku mupashi. Mulefwayo kukula, no kulunduluka! Mu nshila nshi? Kabili ni nshila nshi shimo mwingabomfya pa kuti mulunduluke?
Ukulunduluka Ukupitila mwi Sambililo lya pa Lwenu
Paulo aebele Abena Kristu mu Filipi ati: “Ni ci e kulomba kwandi, ukuti ukutemwa kwenu kupake ukucilamo no kucilamo mu kushininkisha no kwishiba konse.” (Abena Filipi 1:9) Nga mulefwaya ukulunduluka lwa ku mupashi mulekabila ukukusha ‘ukwishiba kwalungikwa.’ ‘Ukwishiba Yehova Lesa na Yesu Kristu’ takupwa nga mwabatishiwa, kufwile ukutwalilila.—Yohane 17:3.
Nkashi umo uwa Bwina Kristu twalati fye ni Alexandra, aishileishibe ci pa numa ya myaka 10 ukutula apo abatishiwe lintu ali ne myaka 16. Akushiiwe mu cine kabili lyonse alesangwa ku kulongana kwa Bwina Kristu no kubombako umulimo wa kushimikila. Alembo kuti: “Mu myeshi iinono iyapitapo, namwene ukuti nali mu bwafya ubwabipisha. Napingwilepo ukuiceeceeta bwino bwino, ifyo njumfwa pa cine, no mulandu nabela mu cine.” Cinshi asangile? Akonkanyapo ati: “Nasangile ukuti umulandu nabela mu cine tawalondoloka. Naibukishe ukuti ilyo nalekula, ukulongana no mulimo wa mwi bala e fyalekomailwapo. Nalemona kwati nkalacita bwino isambililo lya pa lwandi ne pepo. Lelo lintu naceeceetele imibele nalimo, namwene ukuti te fyo cali.”
Umutumwa Paulo akonkomesho kuti: “Ico twafikapo, muli ico cine e mo twendele.” (Abena Filipi 3:16) Icibelesho cimo cine kuti caletako ukulunduluka. Ilyo mushilabatishiwa, ukwabula ukutwishika mwalikwete icibelesho ca kusambilila Baibolo cila mulungu na kasambilisha uwafikapo. Ilyo mwatendeke ukutesekesha icine, muli ici cibelesho mwaishilesanshamo ukupekanishisha libela isambililo lya cila mulungu, no kufwaya mu Baibolo amalembo yaloshiweko, na fimbi. Apo nomba mwalibatishiwa, bushe mwalitwalilila ‘ukwendela muli co cine’?
Nga te ifyo, mulekabila ukuceeceeta ififwile ukucitwe ntanshi, “ku kuleka musuminishe ifyacilamo.” (Abena Filipi 1:10) Mu mikalile yesu umo twapamfiwa, tulekabila ukuilama pa kuti tuleshako inshita ya kubelenga Baibolo. Kwena mu kucite fyo mufuma ubunonshi. Na kabili moneni ifyo Alexandra apitilemo. Asumino kuti: “Kuti natila ukulongana no kubomba mu butumikishi bwa mwi bala e fyo nalecitako fye pa myaka mupepi na 20 nali mu cine.” Nangu cibe fyo, akonkanyapo ati: “Nasondwelele ukuti nangu cingati ifi fintu fyalicindama, tefingambakilila lintu kwaponako ubwafya. Ifi fyonse nafisokoloka pa mulandu wa kuti nshikwata isambililo lya pa lwandi, kabili amapepo yandi ya limo limo kabili tayalondoloka. Nomba nimona ukuti mfwile ukuteulula imintontonkanishishe yandi no kutendeka programu wa kusambilila uwalondoloka pa kuti ningeshiba bwino Yehova no kumutemwa e lyo no kutesekesha ifyo Umwana wakwe atupeela.”
Nga mulekabila ukwafwiwa mu kwimika icibelesho cisuma ice sambililo lya pa lwenu, kuti mwaafwiwa kuli baeluda na Bena Kristu bambi abakosoka mu cilonganino mwabamo. Ukulundapo, ifipande fya mu Ulupungu lwa kwa Kalinda ulwa May 1, 1995; August 15, 1993; na May 15, 1986, nafikwata imitubululo iya kwafwa iyafulilako.
Mukabila Ukupalamina Kuli Lesa
Na cimbi umo mulingile ukutukuta ukulundulukamo caba kwampana kwenu na Lesa. Inshita shimo kuti kwabako ubwafya bukalamba ukulosha kuli ci. Moneni fintu cali kuli Anthony uwabatishiwe ilyo ali umwaice. Ashimiko kuti: “Pa bana bonse mu lupwa lwesu nine nabalilepo ukubatishiwa. Pa numa ya kubatishiwa bamayo balinkumbatile sana. Nshatalilebamonapo ne nsansa sha musango yo. Caletele ubuseko bukalamba, kabili nayumfwile uwakosa sana.” Nangu cibe fyo, kwaliko na fimbi. Anthony akonkanyapo ati: “Tacaseekele ku bacaice mu cilonganino nali ukubatishiwa. E co naleumfwa icilumba nga nshi. Na kabili naleumfwa icilumba lintu ndeyasukapo no kulanda amalyashi ku kulongana. Nacindamike ukufwaya ukutashiwa no kutemwikwa ku bantu ukucila ukuletela Yehova ilumbo. Mu cine cine nshakwete ukwampana kwapalamisha na wene.”
Bamo ukupala Anthony, nalimo baliipeela pa mulandu wa kufwaisha ukutemuna bambi mu cifulo ca kutemuna Yehova. Nalyo line, Lesa enekela aba musango yo ukwikalilila ku bulayo bwabo ubwa kumubombela. (Linganyeni Lukala Milandu 5:4.) Nga tabapalamine kuli Lesa pa lwabo, kuti cabakosela ukucite fyo. Anthony ebukisho kuti: “Ubuseko bukalamba nakwete lintu nabatishiwe bwali bwa cimpelesha. Mu mwaka fye umo wine nabatishiwe napangile umulandu uukulu ica kuti baeluda mu cilonganino balinjebawile. Lintu nakonkenyepo ukubembuka nalitamfiwe mu cilonganino. Imyaka 6 pa numa ya kuipeela kuli Yehova, naliketwe no kukakwa pa mulandu wa kwipayo muntu.”
Ukulundulula Ukwampana Kwapalamisha na Yehova
Te mulandu ne mibele mwabamo, Abena Kristu bonse kuti baankulako ku bwite bwa Baibolo ubutila: “Palameni kuli Lesa, na o alapalama kuli imwe.” (Yakobo 4:8) Ilyo mwatendeke ukusambilila Baibolo ukwabulo kutwishika mwalilundulwile icipimo cimo ica kupalamina kuli Lesa. Mwasambilile ukuti Lesa te mulungu uwa kwelenganya fye uupepwa mu Kristendomu, lelo muntu uwakwata ishina, Yehova. Na kabili mwasambilile ukuti alikwata imibele ya kucebusha, ukuti aba ni “Lesa wa nkumbu kabili uusenamina, uukokolo kukalipa, kabili uwafulisho luse.”—Ukufuma 34:6.
Pa kwikalilila ku kuipeela kwenu ku kubombela Lesa, mufwile ukupalamisha kuli wene! Mu nshila nshi? Kemba wa malumbo apepele ati: “Inshila shenu munenge ukushishiba, mwe Yehova; no mwa kuya mwenu munsambilishe.” (Ilumbo 25:4) Ukubelenga Baibolo ne mpapulo sha Sosaite kuti kwamwafwo kwishibisha Yehova. Na cimbi icacindama kupepa lyonse ukufuma pa nshi ya mutima. Kemba wa malumbo acincisho kuti: “Pongolweleni ku cinso cakwe ifya mu mitima yenu.” (Ilumbo 62:8) Ilintu mulemona amapepo yenu yaleasukwa, mukeluka ukuti Lesa alamusakamana. Ici cikalengo kuti muyumfwe abapalamisha kuli Lesa.
Amesho na mafya yaletako ishuko na limbi ilya kupalamina kuli Lesa. Kuti mwakumanya amafya na mesho ya citetekelo, pamo ngo kulwala, umupatikisha ku sukulu na ku ncito, nelyo imikalile ya bucushi. Nalimo kuti calimukosela ukutwalilila ne mibombele ya teokrasi iya kubombako mu butumikishi, ukulongana, nelyo ukusambilisha abana benu Baibolo. Mwilapikulula mweka amafya ya musango yo! Lombeni ubwafwilisho kuli Lesa, ukuti amutungulule. (Amapinda 3:5, 6) Lombeni umupashi wa mushilo! (Luka 11:13) Ilintu mulemonako ifyo Lesa mu kutemwa alemwafwa, mukapalamisha kuli wene. Nga fintu kemba wa malumbo Davidi alandile ukuti, “sondeni no kumono kuti aliwama Yehova; alishuko muntu uuba muli wene.”—Ilumbo 34:8.
Caishileba shani kuli Anthony? Ebukisho kuti: “Natendeke ukutontonkanya pa lwa nshita lintu nakwete amabuyo ayengi aya ku mupashi ayashimpilwe pa kucita ukufwaya kwa kwa Yehova. Calinkalipe. Lelo mu kukalipwa konse na mu bulanda, naibukishe ukutemwa kwa kwa Yehova. Akashita kalipitilepo pa kuti mbe na maka ya kupepa kuli Yehova, lelo lintu napepele, napongolwele umutima wandi kuli wene, no kulombo kwelelwa. Na kabili natendeke ukubelenga Baibolo kabili nalipapile pa kusango kuti fingi ifyo nalabile kabili finono naishibepo pa lwa kwa Yehova.” Nangu cingati Anthony acili talafuma mu cifungo, baNte aba mupepi balayako ku kumwaafwa kabili aleya alepuupuutukako lwa ku mupashi. Ku ca kutasha, Anthony asoso kuti: “Ndetasha Yehova no kuteyanya kwakwe, pantu nalifuula ubuntu bwa kale, kabili cila bushiku ndatukuta ukufwala ubuntu bupya. Nomba nalicindamika ukwampana kwandi na Yehova.”
Ukulunduluka lwa ku Mupashi mu Butumikishi Bwenu
Yesu Kristu akambishe abakonshi bakwe ukuba bakashimikila ba ‘mbila nsuma ya bufumu.’ (Mateo 24:14) Apantu mucili bakasabankanya abapya aba mbila nsuma, tamwabelesha sana mu butumikishi. Ni shani, lyene, mwingalunduluka pa kuti ‘mufishepo bukapyunga bwenu’?—2 Timote 4:5.
Inshila imo yaba kulundulula ukwangwako. Umulimo wa kushimikila mufwile ukuumona nge “cuma,” kabili nge shuko. (2 Abena Korinti 4:7) E shuko lya kulangilamo kutemwa, bucishinka, na bumpomfu kuli Yehova. Na kabili uyu mulimo ulenga ukuti tuleyangwako ku bantu banensu. Ukuipeelesha muli uyu mulimo kuti kwaletako insansa sha cine cine.—Imilimo 20:35.
Yesu umwine alyangilweko ku mulimo wa kushimikila. Ukwebako bambi icine ca Baibolo alekumona nge “ca kulya.” (Yohane 4:34) E ico ukufwaisha kwakwe ku kwaafwa bambi kuti kwasupawilwa bwino mu mashiwi yakwe aya kuti, “Nintemwa.” (Mateo 8:3) Yesu aikatilwe inkumbu abantu ukucilisha “abalulunkaniwa kabili abapaswa” ku calo ca kwa Satana. (Mateo 9:35, 36) Bushe na imwe kuti ‘mwatemwa’ ukwafwa abali mu mfifi ya ku mupashi kabili abalekabila ulubuuto lwa Cebo ca kwa Lesa? Lyene mukakuntwa ukumfwile kambisho lya kwa Yesu ilya kuti: “E ico kabiyeni, kalengeni aba nko shonse ukuba abasambi.” (Mateo 28:19) Nakabushe, mukakuntwa ukubombako uyu mulimo mu kucishamo nga ca kuti ubumi bwenu ne mibele fyasuminisha.
Na cimbi icingaleta ukulunduluka caba kubombako lyonse nelyo cila mulungu mu butumikishi. Ukucite fyo kuti kwapwishako ukusakamikwa no mwenso ifingacilikilo muntu uushimikila limo limo. Na kabili ukubomba lyonse mwi bala kukamunonsha mu nshila na shimbi. Kukalenga ukuti muletesekeshe cine, no kukusha ukutemwa mwatemwa Yehova no muntu munenu, kabili kukamwafwa ukutontomesha pe subilo lya Bufumu.
Kuti caba shani nge mibele mwabamo taimusuminisha ukushimikila sana? Nga ca kuti ukuteuluka kwayafya, lyene kuti mwasansamushiwa pa kwishibo kuti Lesa alatemunwa ku fili fyonse mwingacita, cikulu fye mulebomba no mweo wenu onse. (Mateo 13:23) Napamo kuti mwalunduluka mu nshila shimbi, pamo ngo kuwamyako imishimikilile. Mu cilonganino, Isukulu lya Butumikishi bwa Teokrasi no Kulongana kwa Mulimo fipayanya ukukansha kusuma ukukuma kuli ici. Ilingi line, nga twalikampuka sana mu butumikishi, tukalaipakisha no kumona ifisuma ififumamo.
Lyene, cilemoneka apabuuta ukuti ukulunduluka kwa ku mupashi takufwile ukuleka pa bushiku bwa lubatisho. Ukukuma kwi subilo lyakwe ilya kupokelela umweo wa bumunshifwa mu myulu, umutumwa Paulo alembele ukuti: “Mwe ba bwananyina, ine ne mwine nshilingo kuti nimpoke ci cintu, lelo ncite cintu cimo, pa kulaba ifya ku numa, no kusupile fya ku ntanshi, nkonkelela ukulola ku buyo, ku mwaala wa bwite bwa mu muulu bwa kwa Lesa muli Kristu Yesu. E ico, abapwililila bonse aba muli ifwe, baangwe ici; nga mwaangilwe cintu umwaibela, Lesa akamusokolwela ici cine.”—Abena Filipi 3:13-15.
Abena Kristu bonse, nampo nga isubilo lyabo lya bumunshifwa mu muulu nelyo umweo wa muyayaya mu Paradise pe sonde, bafwile “ukusupile fya ku ntanshi”—ukucita nga balepilikita ukulola ku buyo bwa mweo! Mwalicitile bwino pa kubatishiwa, lelo ni ntendekelo fye. Twalilileni ukulunduluka lwa ku mupashi. Ukupitila mu kulongana ne sambililo lya pa lwenu, “mu mitima mube abakalamba.” (1 Abena Korinti 14:20) “Mukose ku kulingulula . . . ifyabo bufumo no kulepa no kusansama no kushika” ukwa cine. (Abena Efese 3:18) Ukulunduluka takuleta fye ubuseko ne nsansa pali nomba lelo na kabili kukalengo kuti mukengile mu calo cipya ica kwa Lesa icikatekwa no Bufumu bwakwe bwa mu muulu, umo mukatwalilila ukulunduluka ku ciyayaya!
[Icikope pe bula 29]
Ukuisalapula kulakabilwa pa kushako inshita ye sambililo lya pa lwenu
[Icikope pe bula 31]
Ukwangwako kuti kwatwaafwa ukusanga ubuseko mu butumikishi