Twalilileni Ukwenda mu Kulundulukilako mu Cibelesho Calinga

¹ Umutumwa Paulo akwete icitemwishi caibela ku cilonganino mu Filipi, cintu aali nge cibombelo lintu calepangwa. Aali uwa kutasha pa lwa kupayanya kwabo ukwa cikuuku ukwa fya ku mubili kabili alandile ulwa bene nga ica kumwenako cisuma.—2 Kor. 8:1-6.

² Kalata wa kwa Paulo ku bena Filipi akuntilwe ku kutemwa kwashika. Icitabo ca Insight, Volyumu 2, ibula 631, cicita lipoti ukuti: “Ukupulinkana kalata onse akoselesha icilonganino ca bena Filipi ukutwalilila mu nshila yabo iisuma—ukufwaya ukwiluka kwakulilako no kwikatisha Icebo ca mweo, icitetekelo cakoselako, ne subilo mu cilambu icali no kwisa.” Baankwileko mu kukaba, ukwikasha icikakilo ca kutemwa pa kati kabo no mutumwa. Amashiwi ya kwa Paulo yakwata ubupilibulo bwaibela kuli ifwe ilelo, ukutupeela umulandu usuma uwa kubelebesesha mu kusakamana pa kukonkomesha kwakwe, ukucilisha ukwalondololwa pali Abena Filipi 3:15-17.

³ Imibele ya Muntontonkanya Iyakosoka Ilafwaikwa: Pa Abena Filipi 3:15, Paulo alembele ngo mwaume wa myaka ya kubelesha. Alishibe ukulunduluka kwa ku mupashi ukwa bena Filipi, ukwipukisha kuli bene nga Abena Kristu bakosoka mu kuba ne mibele ya muntontonkanya iyalungama. Ilyo lyonse imibele yabo iya muntontonkanya yalebelebesha ukuicefya no kutesekesha ukwalangilwe na Yesu, bali no kutwalilila ukuba “ababulo mulandu kabili abafuke, abana ba kwa Lesa ababula akalema . . . , [ukwikatisha] icebo ca mweo.” (Fil. 2:15, 16) Lintu twabelenga amashiwi ya kwa Paulo, tulingile ukuyumfwa ukuti Paulo alelanda kuli ifwe. Muli fyo mu kucincila tufwaisha ukukwata imibele ya muntontonkanya imo ine intu Yesu akwete no kulangisha ukutesekesha kwabamo kuicefya ukwa mashuko yesu. Tutwalilila ukwipukisha kuli Yehova mwi pepo, ukulomba ukwaafwa muli uyu mulandu na mu milandu imbi.—Fil. 4:6, 7.

⁴ Nga fintu pa Abena Filipi 3:16 (NW) palangilila, ifwe bonse tulingile ukutukuta ukucito kulunduluka. Ishiwi “ukulunduluka” lipilibula “ukuselela ku ntanshi, ukucito buyantanshi.” Abantu abalunduluka baliba “abasekelela mu mfundo shipya, ifya kusanga, nelyo amashuko ya mu nshita.” Paulo afwaile abena Filipi ukumfwikisho kuti ubuKristu tabwaikalilila pamo kabili bonse abaleitunga ukuba muli bwene bafwile ukulaselela ku ntanshi. Umupashi wabo uwa kulunduluka kuti walangililwa ku kuitemenwa kwa kuibebeta abene, ukusumina amabunake yabo, no kutinamina amashuko ya mu nshita ku kucite fyafulilako nelyo ukuwamyako umusango wa cintu baalecita. Ilelo ukuteyanya kwa pano isonde ukwa kwa Yehova kutwalilila ukuselela ku ntanshi mu kulundulukilako, lyonse ukulalundulula umwapela imibombele ya kuko no kumfwikisha kwa kuko ukwa Cebo ca kwa Lesa. Umo umo uwa ifwe afwile ukwendela pamo na ko, ukushukila ukupayanya kwa kuko konse no kwakana mu kukumanina mu mulimo wa kuko.

⁵ Ukulunduluka Kufwaya Icibelesho Calinga: Paulo akonkenyepo pa kucincisha bamunyina ‘ukutwalilila ukwendela muli ici cibelesho calinga cimo cine.’ (Fil. 3:16, NW) Ukuba uwalinga citufwaya ukubika abantu nelyo ifintu mu fifulo fya fiko ifyalinga mu kwampana kuli cimo ne cinankwe no kuba abenda bwino. Abena Kristu mu Filipi baisungile abene mu cifulo calinga, ukwikala mu kupalamisha ku kuteyanya kwa kwa Yehova na kuli umo no munankwe. Ubumi bwabo bwatungulwilwe ne funde lya kutemwa. (Yoh. 15:17; Fil. 2:1, 2) Paulo abacincishe “[ukwikala] imiikalile iyawamine mbila nsuma.” (Fil. 1:27) Ukukabila kwa kuba uwalinga ne myendele yawama kwaba ukwacindama mu nshila imo ine na ku Bena Kristu ilelo.

⁶ Icibelesho caba ni ncitilo yabeleshiwa iya mibombele yaimikwa. Muli fyo calyampana mu kupalamisha ku nshila ya mwata iya kucitilamo ifintu. Ukukwata icibelesho kuti kwaba ku busuma bwesu pantu tatuli na kwiminina no kulalanguluka pa kucito kupingulapo pa lwa lutampulo lwalakonkapo—twalimika kale kale icipasho caimikwa ico tukonka ku maka ya mwata.

⁷ Icibelesho calinga ica teokratiki cakwatamo ifibelesho ne myata iisuma, iya bunonshi, iya bukapepa—mu kuba no buyo bwa kuikuula fwe bene lwa ku mupashi, ukwaafwako bambi, kabili, nga cingacitika, ukucite fyafulilako mu mulimo wa kwa Yehova. Ukutunguluka mu kufika pali aya mabuyo kufwaya ukwimika no kusungilila icibelesho icisanshamo isambililo lya pa lobe, ukusangwa lyonse ku kulongana, no kwakana mu mulimo wa kushimikila.

⁸ Ifikabilwa Ifyasanshiwa mu Cibelesho Calinga: Cimo icikabilwa caba “kwishiba kwalungikwa no kwiluka kwakumanina.” (Fil. 1:9, NW) Isambililo lya pa lwesu lilenga icitetekelo cesu ukushika, lilakosha ukutesekesha kwesu ukwa cine, no kutukunta ukulola ku milimo isuma. Nangu cibe fyo, bamo balicisanga icaafya ukuba aba kukonkesha mu fibelesho fyabo ifya kusambilila. Umo uwa milandu ikalamba iipeelwa waba kubulwe nshita.

⁹ Ubunonshi bwa kubelenga Baibolo cila bushiku bwalikomailwapo. Ukusambilisha kwa iko ‘kwa kunonsha’ mu nshila iili yonse. (2 Tim. 3:16, 17, NW) Ni shani twingasanga inshita ye sambililo lya Baibolo mu cibelesho cesu ica bushiku no bushiku? Bamo balisanga ifyo kuti bashibuka amaminiti yanono mu kubangililako cila lucelo, lintu imintontonkanya yabo ili iyaswatuka. Bambi basanga ukuti balacita bwino lintu babelenga amaminiti yanono ubushiku pa ntanshi tabalasendama. Banamayanda ababa pa ŋanda mu nshita ya kasuba kuti pambi baba na maka ya kubikako pa mbali inshita inono mu fyungulo kasuba ilyo bambi tabalabwela ukufuma ku ncito nelyo ku sukulu. Mu kusansha ku kubelenga Baibolo ukwa lyonse, bamo balisanshako ukubelenga kwa citabo ca Proclaimers mu cibelesho ce sambililo lya cila mulungu.

¹⁰ Lintu twaimika ifibelesho fipya, kwalibako ukucitikako kwa cine cine ukwa kuti fikapinkana ne fibelesho fyesu ifya kale. Akale kuti pambi twakongamine ku kusuminisha imibombele ishacindama ukupwisha inshita iilipo. Ukuputuka kuli ico cipasho takwaanguka. Takuli nangu umo uuli no kututantikila ifibelesho fye sambililo; kabili tatuli na kufwaikwa ukulubulula pa cintu tucita muli kuno kuloshako. Ukukonkesha mu fibelesho fyesu ifye sambililo kwashintilila apakalamba pa kutesekesha kwesu “ifyacilamo” no kuitemenwa kwesu ukwa kulubule “nshita” pa kumwenamo muli fyene.—Fil. 1:10; Efes. 5:16.

¹¹ Ukulongana kwa Bwina Kristu kubomba ulubali lukalamba mu kulunduluka kwesu ukwa ku mupashi, ukupayanya ukufunda kwakabilwa no kukoselesha. Muli fyo, ukusangwa ku kulongana lwaba lubali lwakatama na lumbi ulwa cibelesho cesu icalinga. Paulo akomaile pa bucindami bwa ici. Tacaba ca kusalapo icipampaminwa ku kusoobolapo.—Heb. 10:24, 25.

¹² Ni shani fintu ukulinga kwingalangishiwa lintu tulecita ukutantika kwa mibombele ukwa cila mulungu? Bamo batantika inshita shashininkishiwa ku kusakamana ifikonkelelo fya pa lwabo kabili lyene ukufyantikamo ukulongana mu fipunda ifili fyonse ifishelemo, lelo cilingile ukubela mu nshila imbi. Ukulongana kwesu ukwa cila mulungu kulingile ukupeelwa icifulo ca ntanshi, mu kuba ne mibombele imbi ukutantikwa ukushinguluka kwene.

¹³ Ukusangwa lyonse ku kulongana kufwaya ukutantika kusuma no kubombela pamo ukwa lupwa. Mu nshiku sha mu kati ka mulungu ubwingi ubwa ifwe tulakwata ukutantika kwapamfiwa uko kutusha abacepelwe nshita. Ici cilepilibulo kuti, nga cingacitika, ica kulya ca cungulo cilingile ukutantikwa mu kubangilila kwalinga pa kuti ulupwa lwingakwata inshita yakumanina iya kulya, ukuipekanya, no kufika pa kulongana pa ntanshi takulatendeka. Pa kuti cibe fyo ifilundwa fya lupwa kuti fyabombela pamo mu nshila shalekanalekana.

¹⁴ Umulimo wa mwi bala uwa lyonse waba uushingafumishiwapo nga tuli no kwenda mu kulundulukilako mu cibelesho calinga. Ifwe bonse mu kulengama twalishiba icishingamo cesu icafina ica kushimikila ubukombe bwa Bufumu. Ici e citupanga Inte sha kwa Yehova. (Esa. 43:10) Apantu waba e mulimo wacishapo kubo we pamfya no wa kunonsha uulecitwa ilelo, takwingabako umulandu twingaumwena ngo lubali lwa mankumanya ulwa cibelesho cesu. Paulo akonkomeshe ukuti: “[Lyonse natutuule, NW] ilambo lya malumbo kuli Lesa, e kutila, icisabo ca milomo iitootele shina lyakwe.”—Heb. 13:15.

¹⁵ Lintu twatantika imibombele yesu iya mulungu no mulungu, inshita sha kulungatika shilingile ukubikwa pa mbali ku mulimo wa mwi bala. Mu kupalishako icilonganino calikwata ukukumana kwa mulimo ukutantikwa mu nshita shafulilako cila mulungu, kabili caba fye mulandu wa kupingulapo ni shili kwi twingaafwilisha. Kuti cabe cisuma ukutinamina ukwakanamo mu lubali lumo na lumo ulwa mulimo, pamo nga ukubomba umulimo wa ku ŋanda ne ŋanda mu kuba na bamagazini ne mpapulo shimbi, ukucite fipempu fya kubwelelamo, no kutungulula amasambililo ya Baibolo. Kuti pambi twatantikila fye na lwa ku ntanshi ku bunte bwa mu lyashi pa kusendako impapulo no kuba abaibukila ku mashuko ya mu nshita aya kutendeka ukulanshanya. Apantu ilingi tuya na bambi, tulekabila ukwipusha pa lwa mitantikile yabo pa kuti twingacita amateyanyo ayengawamina bonse.

¹⁶ Icibelesho cesu ica kushimikila cilingile ukusungililwa te mulandu no kukanaangwako mu cifulo ca kubombelamo. Twalishibila kabela ukuti banono fye bakaankulako mu kusenamina. (Mat. 13:15; 24:9) Esekiele atuminwe ukushimikila ku bantu ‘ba busangu, aba misuula, kabili abatalame mitima.’ Yehova alaile ukwafwilisha Esekiele pa kulenge “cinso [cakwe] icakosa ku kulungatana ne finso fyabo,” uko e kuti, “nga daimonde uwakoso kucila nakabwe.” (Esek. 2:3, 4; 3:7-9) Icibelesho ca lyonse ica mulimo kanshi cifwaya umukoosha.

¹⁷ Ifya Kumwenako Fisuma Ifya Kupashanya: Ubwingi ubwa ifwe tulabomba mu kuwaminako mu mulimo wa mwi bala lintu kuliko umo uuletungulula. Paulo na banankwe baimike ica kumwenako cisuma, kabili acincishe bambi ukumupashanya. (Fil. 3:17) Icibelesho cakwe casanshishemo ifisolobelo fyonse ifyalekabilwa ku kuisunga uwakosa lwa ku mupashi.

¹⁸ Ilelo, nalyo line, twalipaalwa ne fya kumwenako fishaiwamina. Pa AbaHebere 13:7, Paulo acincishe ukuti: “Ibukisheni intungulushi shenu, . . . tontonkanyeni umwaile imibele yabo, no kupashanye citetekelo cabo.” Kwena, Kristu e Cipasho cesu, lelo kuti twapashanya icitetekelo icibeleshiwa na abo abaletungulula. Ukupala Paulo, baeluda bafwile ukuba abaibukila ulwa kukabila kwa kuba ifya kumwenako fisuma kuli bambi. Ilintu imibele ya pa lwabo pambi kuti yalekanalekana, umo umo alingile ukuba na maka ya kulanga ukuti alesungilila icibelesho calinga mu kusungilila amabuseko ya Bufumu intanshi. Nangu fye ni mu kuba no kukakililwako kwa ku mubili no kwa lupwa, baeluda balingile ukukwata ifibelesho fyaimikwa bwino mu masambililo ya pa lwabo, ukusangwa ku kulongana, no kubuulo butungulushi mu mulimo wa mwi bala. Ku kupeela kwa baeluda ubushininkisho bwa kuti ‘baleteka bwino aba mu ŋanda yabo,’ bonse mu cilonganino bakakoseleshiwa ukulaendela mu cibelesho calinga.—1 Tim. 3:4, 5.

¹⁹ Amabuyo ya mu Mwaka Upya uwa Mulimo: Ukutendeka kwa mwaka upya uwa mulimo iba ni nshita yalingisha iya kubelebesha pa cibelesho ca pa lwesu. Cinshi cintu ukupituluka mu mibombele yesu iya mwaka wapwa kulelanga? Bushe twali na maka ya kusungilila, nelyo mu kucitikako ukuwamyako, icipimo ca mibombele? Kuti pambi twali abapwililila mwi sambililo lya pa lwesu. Kuti pambi twalisangilwe ku kulongana mu kuba no kukonkanya kwawaminako nelyo pambi twalingilisheko umulimo wesu uwa mwi bala pa kulembesha nga bapainiya ba kwafwilisha. Nakalimo tuli na maka ya kusonta ku mibombele ya kulungatika iya cikuuku ca Bwina Kristu iyo twabombele mu kwimininako bambi mu cilonganino cesu nelyo ulupwa. Nga ni fyo, kuti twaanga ukuti twalyenda mu nshila iitemuna Lesa, kabili natukwata umulandu uusuma uwa ‘kuti tucilishemo.’—1 Tes. 4:1.

²⁰ Ni shani nga ca kuti icibelesho cesu cali mu nshila imo icishakonkesha nelyo ica limo limo? Ni shani fintu twaambukilweko lwa ku mupashi? Bushe ukulunduluka kwesu kwalicilimwe ku mulandu umo? Ukuwamyako kutendekela pa kulomba ukwaafwa kwa kwa Yehova. (Fil. 4:6, 13) Lanshanyeni ukukabila kobe no lupwa lonse, ukulomba ukwaafwa kwabo mu kuteulula imbali sha cibelesho cobe. Nga nukwata impika, ipusha baeluda ku kwaafwiwa. Nga ca kuti twacita ukubombesha kwa mukoosha no kwankula ku butungulushi bwa kwa Yehova, kuti twaba abashininkisha ukuti tukasengauka ukuba ‘abashipilikita nelyo abashitwala ifisabo.’—2 Pet. 1:5-8.

²¹ Ukwenda mu cibelesho calinga kutungulula ku mapaalo ayalenga ukubombesha kobe ukubo kwalinga. Ilintu mwapampamina ukwenda mu kulundulukilako mu cibelesho calinga, “ku kupimpa mwiba banenuka, ku mitima mube ababilima; kuli Shikulu mube abapyunga.” (Rom. 12:11)—Ku kulandapo kwa kulonsha ukwa ili lyashi, mona Ulupungu lwa kwa Kalinda ulwa May 1, 1985, amabula 13-17.