Mwe Mitwe ya Ndupwa—Tantikeni Bwino Ifya ku Mupashi

¹ Te mulandu no kwikala imyaka iingi mu Babele umwali ukupepa utulubi ne mibele ibi, Daniele aishibikwe ukuti alepyungila Yehova “pe.” (Dan. 6:16, 20) Ni shani fintu aleyangwa bumupashi bwakwe? Ubulondoloshi bwa mu Baibolo butila alitantike bwino ukucita imilimo iyakumine ukupepa kwa cine. Ku ca kumwenako, akwete umwata wa kupepa imiku itatu akasuba na kasuba mu muputule wakwe uwa pa mutenge. (Dan. 6:10) Ukwabula ukutwishika, alitantike no kulabomba imibombele imbi iya fya ku mupashi, pamo ngo kubelenga Amafunde. E ico, lintu aponenwe no bwesho bwingamwipaisha, Daniele talekele ukuipeelesha kwakwe kuli Yehova, kabili mu cipesha mano alipusushiwe.—Dan. 6:4-22.

² E cimo cine na lelo, tufwile ukubombesha ‘ukuba abalola mu kushangila konse.’ (Efes. 6:18) Icalo twikalamo ‘calaala mu maka ya Mubifi.’ (1 Yoh. 5:19) Ukukaanya nelyo ifya kwesha kuti fyatuponena mu kupumikisha no kweshe citetekelo cesu. Mu bucushi bukalamba, ababomfi ba kwa Lesa e bo Goge wa ku Magoge akasansa sana, cikamoneka kwati takuli ukupusunsuka. Ici cikakabila ukucetekela kwafikapo muli Yehova.—Esek. 38:14-16.

³ “Inkama imo iyacindama yaba kulenga ukubelenga Baibolo ukwa lupwa, ukusambilila, no kulanshanya ukuba e mikalile yabo.” E fitendeka icilangililo ca pa kulongana kwa citungu ukwa mu 1998 icakwete umutwe waleti “Mwe Ndupwa—Lekeni Imikalile Yenu Ibe ya Kubelenga Baibolo Cila Bushiku!” Catwalilile ukuti: “Lintu indupwa shakonka ukutantika kwa lyonse ukwa musango yo kabili mu nshila ilenga Baibolo ukuba iya kucincimusha, uku kutantika kwalemenena ku fya Baibolo kuti kwaafwa sana ulupwa. Kulafusha ubwishibilo bwesu. Kulakosha icitetekelo cesu. Kabili kulatupa ifya kupashanya—e kuti abaume na banakashi aba ku kale aba busumino icine cine—abengatusumbamo, ukutulenga ukushangilila icine.” Lintu tulelanda pa mbali shalekanalekana isha mitantikile isuma iya ku mupashi, imitwe ya ndupwa ifwile ukusala inshila imo nelyo shibili isha kulundulwilamo programu wa fya ku mupashi uwa lupwa lwabo.

⁴ Bebeteni Icebo ca kwa Lesa Cila Bushiku: “Lintu Ubufumu bwa kwa Lesa bukalateka ukwabula uwa kubukaanya kabili lintu ukufwaya kwakwe kukacitwa pano isonde nga fintu caba mu muulu, takwakabe abantu abankalwe—nangu fye ni nama—‘ifikacita ububi kabili tafyakonaule.’ (Esa. 11:9; Mat. 6:9, 10)” Aya mashiwi yali mu katabo katila Ukubebeta Amalembo Cila Bushiku—2001 mu kulandapo pe lembo lya pa September 11. Mwandi uku kucinkulako kwalisansamwishe! Mwe mitwe ya ndupwa, bushe lyonse mulabebeta ilembo lya mu Baibolo cila bushiku no kulanshanyapo no lupwa lwenu? Ukucite ci kulanonsha sana. Nga mwafilwa ukulanshanya ulucelo, kuti mwakumana inshita imbi ubo bwine bushiku. Wishi umo atile: “Inshita ya mulaalilo kuli ifwe e yawamisha ukulanshanyapo ilembo lya bushiku ilya mu Baibolo.”

⁵ Nga mwalitantika bwino kale kale ukulalanshanya ilembo lya bushiku ngo lupwa, muletashiwa. Napamo kuti mwamwenamo na kabili nga mulebelengako iciputulwa ca Baibolo pali iyi ine nshita. Bamo baliba ne cibelesho cisuma ica kubelenga icipandwa conse umufumine ilembo lya bushiku. Bambi balasala ibuuku lya mu Baibolo no kulabelenga ifikomo fimo cila bushiku ukufikila bapwa. Ukubelenga Baibolo cila bushiku kukafwa ulupwa lwenu ukulundulula akatiina aka kukanakalifya Yehova kabili bakafwaisha ukucita ukufwaya kwakwe.—Amala. 17:18-20.

⁶ Programu wa kubelenga Baibolo uwa lupwa lwenu no kubebeta ilembo lya bushiku akamunonsha sana nga mulelanshanyako baminiti banono ukulanda pa fyo mwingabomfya ifyebo. Icitabo ca Isukulu lya Butumikishi, ibula 60, cisosa ukuti: “Kuti . . . mwasoobolamo ifikomo fimo mu kubelenga kwa Baibolo ukwa uyo mulungu, mwalanshanya pa fyo filepilibula, lyene mwaipusha amepusho pamo nga ya: ‘Ni shani fintu ifi fyebo fingatutungulula? Kuti twabomfya shani ifi fikomo mu butumikishi? Cinshi filetweba pali Yehova ne fyo abomba ifintu, kabili kuti fyalundako shani ku fyo tumutasha?’” Ukulanshanya kwa musango yo ukwa fya ku mupashi kukafwa bonse mu lupwa lwenu ‘ukwiluka icabo kufwaya kwa kwa Shikulu.’—Efes. 5:17.

⁷ Isambililo lya Lupwa: Ukutungulula isambililo lya lupwa cila mulungu ni nshila isuma imitwe ya ndupwa bengalangilamo abana babo ukuti ifya ku mupashi e fifwile ukwise ntanshi. Umulumendo umo ebukisha ukuti: “Inshita shimo shimo batata balenaka nga nshi ukufuma ku ncito ica kuti calebakosela ukutwalilila abalola, lelo isambililo lyalecitwa te mulandu ne fyo, kabili ici catwafwile ukutesekesha ukucindama kwa liko.” Abana na bo kuti basangwilako pa kuti isambililo liletunguluka. Ulupwa lumo ulwa bana 9 lwaleshibuka lyonse pa 5 koloko wa lucelo ku kusambilila isambililo lya lupwa pantu tabakwete inshita imbi iiyalinga.

⁸ Pa kuti isambililo lya lupwa lifikepo bwino, umutwe wa lupwa afwile ‘ukuimona umwine, ne sambilisho lyakwe.’ (1 Tim. 4:16) Icitabo ca Isukulu lya Butumikishi, pe bula 32, cisoso kuti: “Kuti casoswa no kuti isambililo lya lupwa ilisuma litendekela no kwishiba bwino aba ng’anda yenu. Bushe aba ng’anda yenu balelunduluka shani lwa ku mupashi? . . . Ilyo muli mu butumikishi bwa mwi bala na bana benu, bushe cilabakosela ukuishibisha ku banabo ukuti ni Nte sha kwa Yehova? Bushe balaipakisha ukubelenga Baibolo no kusambilila uko mwateyanya mu lupwa? Bushe cine cine balelenga imibele ya kwa Yehova ukuba e mikalile yabo? Ukubebeta sana kukalenga imwe, pamo ngo mutwe wa lupwa, mwishibe ifyo mulekabila ukucita pa kupampamika no kukuula imibele ya ku mupashi muli umo na umo uwa mu lupwa.”

⁹ Ukulongana kwa Cilonganino: Ukupekanishisha ukulongana kwa cilonganino ku kusangwako filingile ukuba ifintu fyacindama mu mitantikile ya cila mulungu. (Heb. 10:24, 25) Nshita shimo, kuti mwaba na maka ya kupekanishisha ukulongana kumo capamo ngo lupwa. Ukucila ukulolela inshita yapwa, bushe teti mutantike ukupekanishisha libela? Nga muletantika bwino, mukawamyako imipekanishishe yenu kabili mukalanonkelamo sana mu kulongana.—Amapi. 21:5.

¹⁰ Ifilenga ukutantika kwa ku mupashi ukufikapo, musango wa mipekanishishe e lyo no mute. Ni shani nga kuli ifyalenga ukukanapekanishisha ukulongana konse? Icitabo ca Isukulu lya Butumikishi, pe bula 31, cilondolola ukuti: “Sengaukeni ukupita fye mu fyebo ulubilo pa kuti fye mupwishe, nelyo ukukanabelenganamo pa mulandu wa kuti mwafilililwa fye. Lelo, moneni ifyo mwingabelengako, kabili fibelengeni bwino bwino. Mulecite fyo cila mulungu. Mu kupita kwa nshita, esheni ukusanshako ifya pa kulongana na kumbi.”

¹¹ Lintu indupwa shilebangililako ku kulongana, cilabafwa ukuiteyanya mu matontonkanya ukulumbanya Yehova no kunonkelamo mu kufunda kwakwe. Bushe ulupwa lwenu lulacita ici lyonse? Pa kucite ci kano pali ukupekanya kusuma no kubombela pamo mu lupwa. Nga ilingi line ulupwa lwenu lucite fintu lubilo lubilo kabili lulapamfiwa pa bushiku bwa kulongana, bushe kuti mwateululako imitantikile yenu? Bushe teti kube ifyo mwingacitila libela? Bushe bambi teti bafweko umo uwa mu lupwa uuli ne ncito ishingi? Bushe teti mucefyeko ukupamfiwa nga mulebangililako baminiti banono ku kulongana? Ukuteyanya bwino kulafwa ukulundulula umutende mu lupwa na mu cilonganino.—1 Kor. 14:33, 40.

¹² Umulimo wa mwi Bala: Ukutantika inshita sha kuya mu butumikishi na ko kutantika kusuma ukwa fya ku mupashi. Umulumendo we shina lya Jayson ebukisha ukuti: “Mu mwesu, lyonse ulucelo pa Cibelushi twalebomba umulimo wa mwi bala. Ici caliweme kuli ine pantu ilyo nabomba sana ubutumikishi, e lyo nalemona ubusuma bwabamo kabili e lyo naleipakisha sana.” Abengi abakulila mu ndupwa sha baNte balimona cimo cine ukuti ukutantika inshita ya kuya mu butumikishi cila mulungu kwalibafwile ukulunduluka nga batumikishi ba Bwina Kristu.

¹³ Ukutantika bwino na kabili kulenga inshita ulupwa lwenu lupoosa mu mulimo wa mwi bala ukuba iya nsansa no kufumamo ifisuma. Bushe ci kuti cacitwa shani? Ulupungu lwa kwa Kalinda ulwa July 1, 1999, ibula 21 lwalondolwele ukuti: “Bushe mu nshita mu nshita mulabomfyako isambililo lya lupwa ku kwafwa aba mu lupwa ukupekanishisha umulimo wa mwi bala uwa uyo mulungu? Ico kuti cabanonsha sana. (2 Timote 2:15) Nga mwacite fyo umulimo teti ube wa kuyakaasha fye kabili kuti ulesandulula. Mu nshita shimo, kuti mwabomfya inshita yonse iye sambililo ku kupekanya. Lelo ilingi kuti mulelanda pa mbali sha butumikishi bwa mwi bala mu kulanshanya ukwipi pa mpela ye sambililo nelyo pa nshita shimbi mu mulungu.” Bushe ulupwa lwenu lwalyeshako ici?

¹⁴ Twalilileni Ukulunduluka: Pali fi twalandapo, bushe namumona imbali umo ulupwa lwenu lulebomba bwino? Batasheni, kabili bombesheni ukulundulula ishi mbali. Nga kuli imbali ishingi umulekabilwa ukuwamyako, balilenipo ukuwamyako ulubali lumo nelyo shibili. Nga mwabombelapo kabili mwashibelesha, bombeleni na pali shimbi. Mwilatwishika kabili beni aba congwe. (Fil. 4:4, 5) Ukutantika bwino ifya ku mupashi mu lupwa lwenu kufwaya ukubombesha, lelo kwalicindama sana, pantu Yehova atulaya ukuti: “Uwatambalike nshila yakwe ndemulengo kumone pusukilo lya kwa Lesa.”—Amalu. 50:23.