Ifyo Aba mu Lupwa Bekatana pa Kuti Bonse Baisanshemo mwi Sambililo lya Baibolo
1 Icine cilundako ubupilibulo bwine bwine ne mifwaile ku bumi bwa lupwa, lelo ukubombela Yehova bwino takwisa nga meno ya mu kanwa. Cisendako inshita no lupikwe pa kukuula icinshingwa-ng’anda cakosa. Cikabila aba mu lupwa ukubombela capamo nga nshi muli uyu mulimo. Ici cipande ca kubalilapo icili no kukonkwapo na fimbi fibili calalanda sana pa fyo indupwa shingabombela pamo pa kulundulula inshila shisuma ishe sambililo.
2 Pa Kubelenga Baibolo Cila Bushiku:Amapinda 24:5 yatila “umuntu uwaishiba acilo watalila ku maka.” Ukwishiba kunonkwa mu kubelenga Icebo ca kwa Lesa lyonse kupeela amaka ya lwa nkati aya kulwishisha ukusansa kwa kwa Satana ukwa bumupashi. (Ilu. 1:1, 2) Bushe mulabelenga Baibolo capamo ngo lupwa cila bushiku? Ukutantika kwa Isukulu lya Butumikishi bwa Teokrasi kwalikwata “Ukutantika kwa Kubelenga Baibolo Ukwalundwapo” ukwa cila mulungu mu mwaka. Ukukukonka kukabila fye amaminiti 10 aya nshita ya lupwa cila bushiku. Salenipo inshita yalinga iya kubelenga Baibolo no kubebeta ilembo lya cila bushiku ukufuma mu Ukubebeta Amalembo. Iyi nshita kuti yaba pa ca kulya ca lucelo, pa mulalilo, nelyo pa ntanshi ya kusendama. Pangeni ici ukuba ulubali lwa cibelesho ca lupwa ica cila bushiku.
3 Pa Kusambilila Capamo Cila Mulungu: Isambililo lya lupwa ilya Baibolo lifwile ukuba ilyacindamisha mu mulungu. Umo na umo mu lupwa alingile ukulitungilila pa kuisanshamo mu kuitemenwa. Umutwe wa lupwa alingile ukulanguluka ukukabila kwa lupwa lintu alesala ifitabo fya kusambililamo no bushiku, inshita, no butali bwe sambililo. Tangisheni isambililo lya lupwa mu mitantikile ya cila mulungu. Mwisuminisha imilandu iishacindama ukupumfyanya.—Fil. 1:10, 11.
4 Wishi uwalepokelela amafoni ilingi aya ncito pa ng’anda alekulukula intambo kuli foni pa nshita ye sambililo lya lupwa. Nga aba fya ncito baisa pa ng’anda, alebepusha nga kuti baisansha mwi sambililo nelyo ukulolela ukufikila lyapwa. Wishi apampaminepo fye ukukanafwaya icili conse ukupumfyanya isambililo lya lupwa. Ici caambukile abana bakwe apakalamba. Kumfwa ku bukwebo bwakwe, bwaleenda fye bwino.
5 Fintu ciba ica kuteemuna lintu aba mu lupwa baikatana mu mibombele ya ku mupashi! Ukukonkanyapo fye ukubombesha ukuisanshamo umupwilapo mwi sambililo lya Baibolo ilya lupwa kukafumamo ipaalo lya kwa Yehova.—Ilu. 1:3.