Ukutantika kwa Lupwa—Isambililo lya Lupwa
1 Ica bupe cacindamisha cintu mwe bafyashi Abena Kristu mwingapeela abana kutemwa uko mwatemwa Yehova. Ukutantika kusuma mwingafwilamo abana ni lintu ‘mwikele mu mayanda yenu’ pa kusambilila Baibolo cila mulungu no lupwa. (Amala. 6:5-7) Nelyo abena mwenu ni baNte, nangu tabali baNte, limbi muli bafyashi abashimbe, na lyo line kuti mwayafwa abana benu ukupalama kuli imwe na kuli Yehova nga mulesambilila lyonse no lupwa.
2 Ifyo Mwingatendeka: Intanshi pangeni ukusambilila pamo no lupwa nge cibelesho. Nga mwafilwa ukwishiba inshita ya kusambilila, kuti cawamisha ukwikala pamo no kulanshanya no lupwa. (Amapi. 15:22) Nga mwalikwata abana abanono, kuti cawamisha mwaipifya inshita ya kusambilila lelo mwafusha imiku ya kusambilila mu mulungu. Fwayeni inshila iingabomba bwino ku lupwa lwenu. Tantikeni inshita ya kulungatika iye sambililo lya lupwa, kabili esheni sana ukuikonka.
3 Finshi mwingabomfya pa kusambilila? Bamo bapekanishisha pamo Isambililo lya Citabo nelyo ilya Ulupungu lwa kwa Kalinda. Bambi basambilila ifyebo ifilelanda pa misepela. Umwaume uwakwata abana babili umulumendo no mukashana atile: “Icintu cimo icilenga abana ukulafulukisha isambililo cila mulungu ni co tulacita ifisela fya malyashi ya Icitabo Candi ca Malyashi ya mu Baibolo. Icipimo cintu ifi fyebo filambatikwa pa mitima yabo na fintu bafyumfwikisha fyalicindama ukucila ubwingi bwa maparagrafu yasambililwa.”
4 Mulesambilila Cila Mulungu: Isambililo lya lupwa lifwile ukulabako lyonse kabili ulupwa lonse lufwile ukulafulukisha ukusangwako. Ukuteulula ubushiku ne nshita limo kuti kwabako pa mulandu wa ficitika ifishenekelwa. Limo kuti kwaba no kuteulula kwa fyebo fyacilakabilwa ukulanshanyapo. Nelyo kwabako ukuteuluka, uku takufwile ukupaasuka sana ku kutantika kwa lyonse ukwe sambililo lya lupwa. Umufyashi umo alalemba inshita ya kusambilila nga yayaluka no kubika ipepala apalembelwe iyo nshita pa ncende apo bonse bengaimona. Cine cine tuletasha ukubombesha kwa musango yo ukwa kulasambilila lyonse ngo lupwa! Ilyo muletwalilila ukukusha abana benu “mu kusalapula no kukonkomesha kwa kwa Yehova,” ninshi mulelangisha ukutemwa kwenu ku bana na kuli Shifwe wa mu muulu.—Efes. 6:4.