Mulecite Fingakosha Bucibusa Bwenu na Lesa, E lyo Mukapaalwa Sana
1. Cinshi cawamina ukumona nga mucili mulecita ifintu ifikosha bucibusa bwenu na Lesa?
1 Ilyo mwabatishiwe, mufwile mwalebikako sana amano ku kucita ifingakosha bucibusa bwenu na Lesa, ifili nga ukubelenga Baibolo, ukuya mu kulongana kwa Bena Kristu, ukushimikila no kupepa. Pa mulandu wa kuti Yehova alimupaalile pa fyo mwalecita, mwalikosele mu kupepa. Nakalimo nomba napapita imyaka iingi ukutula apo mwabatishiwilwe. Bushe mwalitwalilila ukucita ifingakosha sana bucibusa bwenu na Lesa, ifyo mwatendeke ukucita ilyo mwalesambilila icine?
2. Busuma nshi bwaba mu kubelenga Baibolo lyonse?
2 Tontonkanyeni Sana pa Fyo Mucita: Bushe mulabelenga Baibolo cila bushiku? Tukapaalwa sana nga tulecite fyo! (Yosh.1:8; Amalu. 1:2, 3) Mu Israele wa ku kale, lyali lifunde ukuti imfumu imo na imo ilebelenga ibuuku lya Malango “akasuba no bushiku.” Busuma nshi bwalimo? Ukucite fyo kwaleafwa imfumu ukuba iyaicefya no kusambilila ukutiina Yehova pa kuti tailekele ukumfwila amafunde Yakwe. (Amala. 17:18-20) Na muno nshiku, ukubelenga Baibolo kulatwafwa ukuba ababulo mulandu kabili aba kaele muli cino calo cabipa, umwaba imibele iibi. Kulatwafwa no kuba abaipangasha ukubomba umulimo wa kushimikila.—Fil. 2:15; 2 Tim. 3:17.
3. Mapaalo nshi tukwata nga tulesangwa ku kulongana lyonse?
3 Yesu alitemenwe ukuya ku sunagoge uko Amalembo yalebelengwa. (Luka 4:16) Ici calimukoseshe ilyo alecula. Ukufundwa ifya mu Baibolo mu kulongana no “kukoseleshanya” kubapo filatwafwa sana ukuba abakosa. (Rom. 1:12) Ukuba pamo na babwananyina kulatwafwa ukushipikisha amafya tukwata muli shino nshiku sha mpela. (Heb. 10:24, 25) Bushe mucili mulalongana lyonse fye?
4. Bushe ukubombako umulimo wa kushimikila abantu cila mulungu kutwafwa shani?
4 Icebo capuutwamo citweba ukutila abatumwa balebila mbila nsuma “cila bushiku mwi tempele na ku ng’anda ne ng’anda.” (Imil. 5:42) Nangu ca kutila te kuti tuleshimika cila bushiku, kuti tulebombako ubutumikishi cila mulungu. Nga tulecite fyo, tukeshiba sana ifya kulondolola Icebo ca kwa Lesa, kabili ilyo tuleebako bambi icine ca mu Baibolo, mukalafuma ifisuma ifikalatukosha.
5. Cinshi ukupepa lyonse kuli Yehova kwacindamina?
5 Kasesema Daniele alipaalilwe sana pa mulandu wa kubombela Yehova “pe” mu bumi bwakwe. Cimo ico alecita lyonse, kupepa kuli Yehova. (Dan. 6:10, 16, 20) Na ifwe nga ca kutila lyonse tulepepa kuli Yehova ukufuma pa nshi ya mutima, akatupaala no kutupeela umupashi wakwe uwa mushilo. (Luka 11:9-13) Ne cacindama sana ca kutila, Yehova na o akapalama kuli ifwe pa kuti tukabe ifibusa fyakwe. (Amalu. 25:14; Yako. 4:8) We cilambu ulakula! E ico, kanshi natubikeko sana amano ku kulacita ifingakosha bukapepa bwesu, ne ci cikalenga Yehova akatupaale sana.