Ukulongana Kulanonsha Abacaice
1 Umukashana umo umupungwe atile: “Limo ine mona kwati abacaice e bo imikalile yakosela sana ukucila abantu bonse. Twikala na bantu abacita ubulalelale, ababomfya imiti ikola, kabili abanwi.” Bushe na iwe e fyo umfwa? Nga e fyo, bushe kuti watila cinshi cingakwafwa ukulwisha uku kusonga? Ufwile ukukwate citetekelo, ukutetekela icine cine ukuti inshila sha kwa Yehova shalilungama, pantu ‘ukwabulo kutetekela te kuti kube ukumutemuna’. (Heb. 11:6) Ukusangwa ku kulongana kwa pa cilonganino kukakwafwa ukukosha ukushininwa kobe ukwa Bwina Kristu no mupampamina obe uwa kukaana icabipa.
2 Ku Kulongana Kuti Wasambililako Ifingi: Cinshi cilenga ukuti utemwe ilyo ulelya ifya kulya fisuma pamo na banobe watemwana sana na bo? Bushe te busuma bwa fya kulya no kusangalala ne fibusa fyobe? E fyo no kulongana kwesu kwine kumfwika bwino, lelo lwa ku mupashi.
3 Ifilandwa pa kulongana fiba fya kukuulilila. Kulaba ukusambilila pa fya kubombela pa mafya ya cila bushiku aya mu mikalile na pa kusesema kwa mu Baibolo ukwa kucincimusha. Kulaba ukusambilila ifyebo fisuma pa lwa mikalile yawamisha ne fya kucita ilyo mwaponenwa na mafya. Ifibusa fisangwa ku kulongana e fyawamisha pano isonde, kabili bumupashi buba ku kulongana busuma kabili bulacingilila. (Amalu. 133:1) E mulandu wine uwacaice umo alandiile ukuti: “Akasuba konse mba ku sukulu, ndacula sana ku misango yabipa. Lelo ukulongana kwaba nge ncende apasangwa utumenshi tupembesula mu ciswebebe uto nwa no kutwalilila uwakosa ubushiku bwakonkapo ku sukulu.” Umbi na o atile: “Nasango kuti ukubishanya na bambi abatemwa Yehova kulangafwilisha ukutwalilila ukupalamina kuli wene.”
4 Ukulembesha mu Sukulu lya Butumikishi bwa Teokrasi, kukusambilisha ifya kusapika ifyebo fya mu Baibolo, ifya kupekanya ilyashi, no kulanda ilyo lyashi kwati ulelanshanya fye ne bumba mu Ng’anda ya Bufumu. Tontonkanya pa busuma bwaba mu kukanshiwa pa kuti ulamuke mu kusambilisha bwino icine cipeelo mweo icaba mu Cebo ca kwa Lesa! Ni kwi kumbi wingasanga abacaice bakanshiwa nge fi?
5 Nonkelamo mu Kulongana: Pa kuti unonkelemo mu kulongana, kwaba ifintu fitatu ifyacindama ifyo ufwile ukucita. Ifi fyaba kupekanya, ukwasukapo, no kubomfya ifyo ulesambilila.
6 Pekanishisha Ukulongana: Tantika inshita ya kupekanya ukulongana lyonse. Wileka ifya ku sukulu, incito, nelyo ifyangalo fikupusaule ku kubelengelamo kabela mu fyebo fikasambililwa pa kulongana kumo na kumo. Ukutantika umutande usuma uwa fya kucita kulabomba bwino. Ica ntanshi, konkamo ukwabulo kushalila mu kutantika kwa kubelenga Baibolo ukwa mulungu no mulungu ukwa mu Sukulu lya Butumikishi bwa Teokrasi. Kuti wabelenga no kwetetula pa fipandwa fyatantikwa muli baminiti fye banono cila bushiku. Lubulako ne nshita ya kupekanya Isambililo lya Citabo pa Cilonganino ne Sambililo lya Ulupungu lwa kwa Kalinda. Bamo bapekanya ilyo kwashala ubushiku bumo nelyo shibili ilyo ukulongana kushilafika. Eshako na maka yonse, ukupekanishisha na malyashi ya mu Kulongana kwa Mulimo ukwa mulungu no mulungu.
7 Asukapo pa Kulongana: Baibolo itila ilyo Yesu ali ne myaka 12, bamusangile mwi tempele alekutika, aleipusha ifipusho no kwasuka ifyasuko. (Luka 2:46, 47) Kanshi Yesu alelandapo, taikele fye tondolo. Ukanonkelamo mu kulongana nga uleibikilishako ukulayasukapo.—Amapi.15:23.
8 Ufwile ukukutikisha no kutontonkanya pa filelandwa ilyo balesambilisha pa kulongana. Limo ukulande lyashi kulanguka ukucilo kukutika. Mulandu nshi? Pantu umbi nga e ulelanda kuti watendeka ukutontonkanya pali fimbi. Kuti wacimfya shani ubu bwafya? Ulelembako ifyebo fimo. Lemba ifishinka fikalamba ifyo wingatemwa ukumonamo inshita imbi. Ukulemba kukakwafwa ukukanatontonkanya pali fimbi ilyo ulekutika ku malyashi. Na kabili, ulemona Amalembo no kukonkamo ilyo kalanda aleyabelenga.
9 Cimbi na co, imika ubuyo bwa kwasukapo pa lyashi lyonse ilya fipusho ne fyasuko ililiko ku kulongana. Ukanonkelamo nga ulepekanya bwino ifyo ulefwaya ukwasuka. Amapinda 15:28 yatila: “Umutima wa mulungami welenganye ca kwasuka.”
10 Bomfya Fintu Usambilila: Ica kulekeleshako, shininkisha ukuti ico wasambilila ‘cibombe muli iwe.’ (1 Tes. 2:13) Ilyo ulebomfya ifishinka fisuma ifyo ulesambilila pa kulongana kwalekanalekana, wakulapalamina kuli Yehova Lesa. Akaba uwa cine cine kuli iwe, kabili wakulasekelela nga nshi no kumfwa bwino ilyo ‘uleenda mu cine,’ no kucilenga ukube cobe.—3 Yoh. 4.
11 Bamunyina bacaice na bankashi, nga mulepekanishisha ukulongana lyonse, nga muleasukapo, no kubomfya ifyo mulesambilila, mwakulaipakisha nga nshi ukulongana no kunonkelamo. Mwakulakosha icitetekelo cenu pamo no kupingulapo kwenu ukwa kutwalilila aba cishinka kuli Shinwe wa mu muulu, Yehova.—Amalu. 145:18.