Ipaalo lya kwa Yehova Lilatucindamika
1 Ilingi line abantu nga balefwaya ukupima nampo ngo muntu alekala bwino bamona pa ndalama afola. E mulandu wine abengi bamwena ukuti aba ndalama e bakwatisha insansa no kwikala bwino sana. Lelo abatontonkanye fyo indalama kuti shashite nsansa balilubilila. (Luk. Mil. 5:12) “Abafwayo kuba ne fyuma” fya pano nse tababa no kusekelela kubelelela. (1 Tim. 6:9) Ababomfi ba kwa Yehova bena balasekelela icine cine kabili e bantu bakwatisha ubucindami pano nse ponse. (Amapi. 10:22; Ukus. 2:9) Kuti caba shani fyo?
2 Umumonekela Ubucindami Bwesu: Twalishilimuka nga nshi lwa ku mupashi kabili tulomfwikisha Icebo ca kwa Lesa, Baibolo. Yehova ukupitila mu kuteyanya kwakwe ukwa pe sonde, alatusambilishe mibele yakwe pe, e lyo no kutusambilisha pa Mwana wakwe, pa kuti tukamwenemo umuyayaya. Ukumfwikisha kwalungama kutupalamika kuli Yehova no kuti abe cibusa wesu uwa pa mutima. (Yako. 4:8) Ukwishiba ifya kulekanya ubusuma no bubi no kubeela amafunde ya kwa Lesa kulatucingilila ku malwele yamo yamo na mafya. Twalicetekela ukuti Yehova akatupa ifyo tufwaya, ne ci cikalenga ukuba abatekanya, mitekanishishe ya bukapepa e lyo no kutulengo kuteko mutima.—Mat. 6:33.
3 Twalikwata umutende ne cumfwano muli bumunyina bwesu ubwa ku mupashi pantu tulatukusha ukutwale fisabo fya mupashi wa kwa Lesa. Apo twalikatanishiwa ku cikakilo cakosa ica kutemwa, ilyo tuli na macushi atemwa mu nshita sha masanso, tatulekabila ukumona kwati twalilekeleshiwa na Lesa nelyo na bamunyinefwe.—Gal. 6:10.
4 Ubumi bwesu bwalikwata ubupilibulo bwine bwine ne mifwaile. Tumona ukuti twalikwate shuko lyawamisha ilya kushimikilako imbila nsuma mwi sonde lyonse. Cilatuletela ukusekelela kubelelela ilyo tuleafwa bambi ukwisaba na bucibusa busuma na Lesa no kubomba mu kwikatana pamo na ifwe mu kupepa kwasanguluka. Ubu butumikishi, ubwaba cuma cesu icaumisho mutengo, bulaletela Yehova umucinshi no kutulenga ukumfwa bwino ukuti tulebombako ku kushisha ishina lyakwe. Tutwalilila ukuba ne mitima ya kucetekela pa kwishibo kuti ifyo tulesubila ku ntanshi fili no kucitika nomba line.
5 Ukulangisha Ukuti Tulatasha: Shi lyonse natuletasha pa mapaalo ya kwa Yehova, ayatulenga ukuba abakwatisha ubucindami pano nse. (Amapi. 22:4) Ukukwatako inshita cila bushiku iya kwetetula pa fyo twakwata kulatulenga ukutasha Yehova pa kutemwa kwakwe ukwafulisha no kutwalilila ukulapepa fye wena eka.