Tatwabala Atuipakishapo Ifya ku Mupashi Ifyapaka Nge Fi!
1 Abantu abengi bafuluka ubushiku lintu bengasosa ukuti, “Tatwabala atuipakishapo ifyapaka nge fi!” Batontonkanya ukuti bulya bushiku bukesa lintu bakwata ifikwata ifingi, ukubalenga ‘ukutauluka, ukulya, ukunwa, no kusangalala.’ (Luka 12:19) Mu kupusanako, pali ino nshita twaliba na maka ya kusosa ukuti mu mano ya ku mupashi, tatulebulisha icili conse icisuma. (Ilu. 34:10) Ni shani fintu ico cingacitikako?
2 Amapinda 10:22 yabilisha ukuti “ipaalo lya kwa Yehova lyene lilacindamika.” Ifwe fwe baipakisha ubo bubile bwa bulesa mu cine cine kuti twasosa ukuti Lesa ‘atupeeleshe fintu fyonse ifya muilemeno.’ (1 Tim. 6:17) Ici citulenga ukuba abantu bakwatisha icuma pe sonde!
3 Ukwishiba Amapaalo Yesu: Tuli banono fwe baba ne fikwatwa fya ku mubili ifingi. Nalyo line, twalipaalwa pa mulandu wa kuti tatusakamikwa mu kucishamo pa lwa fyo tukabila cila bushiku. Yehova alishiba ifintu tukabila, kabili alaya ukufipayanya. (Mat. 6:31-33) Ubulayo bwakwe butulenga ukukwata umutende wa muntontonkanya uyo mu cine cine uwaumisho mutengo.
4 Nangu cibe fyo, amapaalo yesu aya ku mupashi yalicilanapo bukulu. Ubumi bwesu bwashintilila pa ca kulya ca ku mupashi ukufuma kuli Yehova. (Mat. 4:4) Abo bashintilila pa ntulo sha ku calo ku kubapayanishisha ica kulya ca ku mupashi balaba aba nsala ilintu ifwe tulalya no kunwa ukufikila twaikuta. (Esa. 65:13) “Umusha wa cishinka” atupayanishisha ukwishiba kwapaka uko kutungulula ku bumi bwa muyayaya.—Mat. 24:45; Yoh. 17:3.
5 Bumunyina bwesu bwawamisha ubwa mwi sonde lyonse butupayanishisha ukubishanya kwa cikabilila ukwa bamunyina na bankashi abekala mu ncende yonse iya pe sonde. (Yoh. 13:35) Icilonganino ca pa mwenu caba cifulo ca mutende, umo twingasanga icisansamushi no kupembesulwa. Baeluda balinde myeo yesu, ukutwaafwa ukubomba ne misango yalekanalekana iya mafya. (Heb. 13:17) Ukupalama kuli bamunyina kutulenga ukukoseleshanya, ukutukosha pa kuti tushipikishe.—Rom. 1:11, 12.
6 Nangu fye mulimo wesu waba lipaalo. Incito sha ku mubili ishingi sha kunasha kabili isho shishibekusha. Ukubilisha imbila nsuma na bambi kulabalenga ukuba aba buseko na ifwe tulaba aba nsansa. (Imil. 20:35) Mu cine cine tulamona icisuma mu kucucutika kwesu.—Luk. Mil. 2:24.
7 Icacilapo ca kuti, twalikwata isubilo lyawamisha ilya ku ntanshi. (Rom. 12:12) Twenekela mu kuswatuka icalo cipya icapwililika ica bulungami, umo tukekala na batemwikwa besu mu nsansa na mu mutende kuli pe na pe! Ili subilo lyaba cuma ica mutengo wacila icili conse cintu cino calo cingatambika.—1 Tim. 6:19.
8 Ni Shani Fintu Twingalanga Ukutasha Kwesu? Te kuti tulipile Yehova pa fyo atucitila. Kuti twalumbulula fye ukutasha kwesu ukupitila mu (1) ukumutasha cila bushiku pa cikuuku cakwe ica pa fye (Efes. 5:20), (2) ukulangisha ukutemwa kwesu pa kuba aba cumfwila (1 Yoh. 5:3), (3) ukushisha ishina lyakwe ukupitila mu kushimikila imbila nsuma (Ilu. 83:18), na (4) ukwafwilisha icilonganino ca Bwina Kristu mu kubombela pamo na bambi no mutima onse.—1 Tim. 3:15.
9 Twalikwata imilandu yakumanina iya kubela abantu bacilishapo ukuba aba nsansa pe sonde. (Ilu. 144:15b) Shi imibele yesu iya mutima, imyendele yesu, no mulimo nafibelebeshe ubuseko buntu twakwata muli paradise wesu uwa ku mupashi. Tatwabala atuipakishapo ifyapaka nge fi!