Bushe Lesa E Wafwaile Ukuti Kubeko Umuncishanya?

Icasuko mwi shiwi limo ni iyo. Natumone umulandu.

LESA afwaile ukuti abantunse bonse bakwate amashuko yamo yene aya kuipakisha ubumi ne nsansa. Pa lwa kubumbwa kwa bantunse, tubelengo kuti: “E lyo Lesa atile, Natucite umuntu mu cata cesu, umwabele cipasho cesu: na o abe na bukateka kwi sabi lya muli bemba, na ku fyuni fya mu lwelele, na ku fitekwa, na ku nama shonse sha mpanga, na ku fikulika fyonse ifikulika pe sonde.” Ilyo apwishishe ububumbo bwa pe sonde, “Lesa amwene conse ico acitile, kabili, moneni, naciwamisha.”—Ukutendeka 1:26, 31.

Bushe ilelo Lesa kuti atila imibele ya bulanda iya muncishanya ‘naiwamisha’? Iyo, pantu “Lesa kutemwa.” (1 Yohane 4:8) Amalembo yatila ‘taba na kapaatulula’ no kuti “ya mpomfu imicitile yakwe; pantu imibele yakwe yonse bupingushi; Lesa wa cishinka kabili uwabulo bupondamishi, uwalungama kabili uwatambalala.” (Amalango 10:17; 32:4; linganyeniko Yobo 34:19.) Kabili umutumwa Petro asondwelele ati: “Cine cine ninkutuluka ukuti Lesa taba na kapaatulula ka bantu, lelo uwa mu luko lonse uwamutiina no kubombo kulungama asekelelwa kuli wene.”—Imilimo 10:34, 35.

Apantu Lesa wa kutemwa, taba na kapaatulula, wa bulungi, alitambalala, kabili alilungama, ni shani engabumba abantunse ne cifyalilwa ca muncishanya ukulosha ku nsambu sha kuipakisha insansa? Ukusuminisha umusoobolola pa bantu no kubabika mu bwikashi bwa muncishanya takwingomfwana ne mibele yakwe. Afwaile ukuti bonse “balefyalwa abantungwa kabili abalingana mu kucindama na mu nsambu.” Nangu cibe fyo, ilelo ifintu te fyo fyaba. Mulandu nshi?

Ukwatendekele Umuncishanya

Ukuti Lesa abumbile abantunse abalingana tacipilibulo kuti afwaile ukuti bonse balingane muli fyonse. Kuti bapusana mu fyo balamukamo, ifyo batemwa, ne mibele. Kuti bapusana ififulo nelyo ubulashi. Ku ca kumwenako, umwaume no mwanakashi tabalingana muli fyonse, lelo Lesa abumbile umwanakashi ukuba “uwayana” ku mwaume. (Ukutendeka 2:18) Ukwabulo kutwishika abafyashi na bana balipusana amaka. Lelo, te mulandu no ku kupusana, bonse fye, abaume, abanakashi, na bana bali no kuipakisha insambu shapeelwa na Lesa ku kwikusha ifikalamba ififwaikwa pa kuba ne nsansa. Bonse bali no kuipakisha ukucindama no bubile bwalingana ku cinso ca kwa Lesa.

Mu nshila imo ine, abana ba ku mupashi aba kwa Lesa, ababumbilwe intanshi pa bantunse, bapeelwe imilimo yalekanalekana. (Ukutendeka 3:24; 16:7-11; Esaya 6:6; Yuda 9) Nangu cibe fyo, ukulacita ifintu ukulingana ne nsambu bapeelwe, bonse baleipakisha mu mulinganya ukupayanya kwa bulesa ukwa bumi ne nsansa. E ico balangishe umulinganya wa kwa Lesa mu nshila yawamisha.

Ku ca bulanda, icibumbwa cimo ica ku mupashi tacaikushiwe ne mitantikile ya mulinganya iya kwa Lesa. Alefwaya ifyacila pa fyo Lesa amupeele, alefwaisha icifulo icasumbukisha. Ukupitila mu kulundulula ulu lunkumbwa, ailengele ukubo mulwani wa kwa Yehova, uwaba ni Kabumba wakwata insambu sha kuteka bonse. Uyu mwana wa ku mupashi uwa kwa Lesa uwapondweke aishilebeleleka abantunse ukupinda Lesa ifyacila pa fyo Abapeele. (Ukutendeka 3:1-6; linganyeniko Esaya 14:12-14.) E ico, fintu Yehova apayanishishe abantunse ku kuipakisha ubumi ne nsansa fyalipumfyanishiwe. Uyu cipondoka wa ku mupashi, uwitwa pa Ukusokolola 20:2 nga “Kaseebanya kabili Satana,” aishileba kasongelekanya wabipa uwa muncishanya wa buntunse.

Bushe Ifintu Fikatala Afyaluka?

Icasuko mwi shiwi limo ni ee!

Lelo nani engaletako ukwaluka ukulekabilwa? Intungulushi sha buntunse shimo, mu kufumaluka shalishomboka pa myaka iingi ku kucite co. Shalyeshako panono, ukulenga abengi ukusondwelelo kuti ubwafya bwa muncishanya wa buntunse tabwakatale abufumishiwapo. Nangu cibe fyo, imimwene ya kwa Lesa yalembwa pali Esaya 55:10, 11 apatila: “Ifyo iloke mfula ne mfula yabuuta ukufuma mu muulu, no kukanabwelelamo, lelo itapililo mushili no kuulengo kutwala no kupuuka, wasuka wapeele mbuto kuli katanda ne cilyo ku ulya, e fyo cikabe cebo candi icifuma mu kanwa kandi: tacakabwelele ibusha kuli ine, kano cacite co natemwa, no kushuka muli ico nacitumina.”

Mwandi cilasansamusha ukwishibo kuti Yehova Lesa alilanda umwine ukuti akafikilisha imifwaile yakwe iya pa kutendeka ku kupayanishisha abantunse bonse amashuko yalingana aya bumi ne nsansa! Pamo nga Lesa wa cine, aliishingamika ku kufikilisha ico alaya. Ku ca nsansa, alafwaya kabili alikwata amaka ya kucite co. Ni shani akacite ci?

Akabomfya Ubufumu buntu Yesu Kristu asambilishe abakonshi bakwe ukupepela ati: “Shifwe wa mu muulu, . . . Ubufumu bwenu bwise. Ukufwaya kwenu kucitwe pano nse nga mu muulu.” (Mateo 6:9, 10) Ca cine, Ubufumu bwa kwa Lesa e nshila Yehova akabomfya ku ‘kushonaula no kupesha aya mabufumu yonse [ayaliko nomba], kabili bukeminina umuyayaya.’—Daniele 2:44.

Ilyo Ubufumu bwa ku muulu bukalateka, kukabako ubwikashi bupya ubwa bantunse. Ukukuma kuli ci, umutumwa Yohane alembele mwi buuku lya mu Baibolo ilya kulekelesha ilya Ukusokolola ukuti: “Namwene umuulu upya ne calo cipya, pantu nafiya umuulu wa ntanshi ne calo ca ntanshi.” (Ukusokolola 21:1) Takwakabe ububi ubulengwa no muncishanya, pamo ngo bupiina, ukulwala, ukukanasambilila, umusoobolola, na macushi yambi aya bantunse.a

Ukucila pa myaka 100, Inte sha kwa Yehova shalitungulula abantu kuli ubo Bufumu. (Mateo 24:14) Ukupitila mu mpapulo no kubaafwa, shalitukuta mu kwafwa abantu ukwishiba imifwaile ya kwa Lesa nga fintu yalembwa mu Baibolo. Nangu cibe fyo, umulimo wabo uwa kusambilisha uwa mwi sonde lyonse walilenga abantu ukuba ne subilo lya kwikala mu mulinganya ne nsansa ku ntanshi e lyo pali nomba ulebomba bwino ku kupwishako ubwafya bwa muncishanya. Natumone.

[Futunoti]

[Amashiwi pe bula 5]

Lesa afwaile ukuti abantunse bonse bakwate amashuko yamo yene aya bumi ne nsansa