Baacitile Ukufwaya kwa kwa Yehova

Maria Asala “Umulumbo Usuma”

MU NSHIKU sha kwa Yesu, abanakashi ba ciYuda baali abatitikishiwa ku fishilano fya ci rabi. E ico, baali abafuupulwa nangu fye kusoma Amalango. Mwi buuku lyabo ilitwa Mishnah mwaba ifyebo ifitila: “Nga ca kuti umuntu afundisha umwana wakwe umwanakashi Amalango, cimo no kumusambilisha ifya kulaalana.”—Sotah 3:4.

Ici calengele na banakashi ba mu Yudea mu mwanda wa myaka uwa kubalilapo ukukanasambilila. The Anchor Bible Dictionary itila: “Takwaba ubushininkisho bwa kuti pa ntanshi ya butumikishi bwa kwa Yesu abanakashi abena Yudea balisuminishiwe ukuba abakonshi ba kwa kasambilisha mukalamba uuli onse pali bufi ukwendela capamo nankwe, nangu fye ukukambisha uuli onse kano fye abana bakwe.” Muli uku kwine ukusuusha abanakashi, bashimapepo bamo bamo babikileko ne funde lya kuti umwaume taali na kulanda no mwanakashi pa lwalaala.

Yesu takonkelele iyo mibele. Afundile abaume pamo pene na banakashi, kabili pa bakonshi bakwe pali na banakashi. (Luka 8:1-3) Pa nshita imo, Marita na Maria balaalike Yesu ku ng’anda ku mwabo. (Luka 10:38) Aba banakashi pamo na ndume yabo Lasaro baali basambi kabili bacibusa ba kwa Yesu. (Yohane 11:5) Cilemoneke fyo ulu lupwa lwali ulwaishibikwa sana pantu lintu Lasaro afwile kwaishile abantu abengi mu kubasansamusha. Nangu cibe fyo, icacitike lintu Yesu abatandalile calibasambilishe kabili na ifwe bene kuti catusambilishako.

Ukusambilila ku Makasa ya kwa Yesu

Cili icashininkishiwa ifyo Marita na Maria balefwaisha ukupayanishisha Yesu umutebeto waumo mutengo, napamo mu mikalile yabo tacabakosele ukucite co. (Linganyeniko Yohane 12:1-3.) Lelo lintu Yesu afikile, Maria ena ‘aikele ku makasa yakwe no kulakutika icebo.’ (Luka 10:39) Takwali icishilano ca buntunse nelyo cimo icali no kukanya Yesu ukusambilisha ulya mwanakashi uwalefwaisha ukusambilila! Natwelenganye Maria naikala pa ntanshi ya kwa Yesu, pamo ngo musambi nasendwa mu kukutika ku kusambilisha kwa kwa Shikulu wakwe.—Linganyeniko Amalango 33:3; Imilimo 22:3.

Marita ena “alatabataba ku kupyungila ukwingi.” Aali uwatangalikwa ne ncito ishingi pa kuti apekanye ica kulya icisuma sana. Nomba Marita pa kumono kuti incito shamufulila libe nkashi nankwe ekele fye ku makasa ya kwa Yesu, alikalipe! E co, Marita apumfyenye amashiwi yantu Yesu alelanda kuli Maria no kusoso kuti: “Mwe Shikulu, bushe tamusakamene ukuti munyinane andekela ukupyunga neka? E ico mumwebe ukuti anjafweko.”—Luka 10:40.

Uku kulomba kwa kwa Marita takwali ukwalubana pantu umulimo wa kupekanishisha abantu abengi ifya kulya tawayanguka iyo, kabili taufwile ukubombwa no muntu umo. Nangu cibe fyo, Yesu asangile shuko lya kufunda isambililo lyacindama ukubomfya amashiwi yalandile Marita. Atile: “Marita, Marita, wasakamikwa no kupamfiwa ku fintu ifingi. Cimo fye cafwaikwa: pantu Maria nasalo mulumbo usuma uushakapokwe kuli wene.”—Luka 10:41, 42.

Yesu talepilibule fyo Marita tali uwayangwako ku fintu fya ku mupashi. Na kuba amwishibe ukuba kapepa wine wine.a Ukwabula ukutwishika, e mulandu wine alalikile Yesu ku ng’anda. Nangu cibe fyo, mu kwebaula kwakwe ukwabamo ukutemwa, Yesu acinkwileko Marita pa lwe shuko lyaibela ilyo akwete ilya kusambilishiwa ku Mwana wa kwa Lesa, ukucila ukusakamikwa ku kupekanya ica kulya.

Ukwabulo kutwishika, umwata wa muli shilya nshiku ufwile wakoseshe ne mimwene ya kuti umwanakashi wine wine alekabila ukwishiba sana incito sha pa ng’anda fye epela. Lelo mu kupusanako, amashiwi ya kwa Yesu yalangilile fyo, abanakashi na bo bene kuti baikala ku makasa yakwe no kupokelela ukufunda kwingabapeela umweo! (Yohane 4:7-15; Imilimo 5:14) Marita nga alicitile bwino sana ukupekanya fye ifya kulya fyalinga—nangu fye ifinono—pantu acite co nga alishileko ne nshita ya kwikala ku makasa ya kwa Shikulu ku kusambilila.—Linganyeniko Mateo 6:25.

Ico Twingasambililako

Ilelo, bonse capamo abaume na banakashi balankulako ku bwite bwa kwa Yesu ubwa kuti ‘buulenipo ica bupe amenshi ya mweo.’ (Ukusokolola 22:17) Pa mulandu wa kutemwa—bamo ukupala Marita—balesha na maka ukupyungila bamunyinabo muli conse ico balekabila. Ni bakabomba bacincila mu kwafwa bambi, Yehova alaya ukuti akabalambula pa fyo balangisho kutemwa. (AbaHebere 6:10; 13:16) Bambi na bo bapashanya Maria. Baliba abakutumana kabili abasakamana ifya ku mupashi. Ukufwaisha kwabo ukwetetula pa Cebo ca kwa Lesa kulabafwa ukutwalilila abalimbwa mu citetekelo.—Abena Efese 3:17-19.

Mu cilonganino ca Bwina Kristu, abantu ba musango yu balakabilwa. Nangu cibe fyo, mu kupelako bonse tufwile ‘ukusala umulumbo usuma’ pa kulabika ifya ku mupashi intanshi mu bumi bwesu. Tukaba abasenaminwa no kukwata ipaalo lya kwa Yehova nga twabaka ifyacilamo.—Abena Filipi 1:9-11.

[Futunoti]