Alilengeleko Ulubuuto ‘Ukufika ku Mpela ya Pano Nse’

UMUTUMWA Paulo alibomfiwe ku kulenga ulubuuto ukubalika ‘ukufika ku mpela ya pano nse.’ E co, abengi “abasontelwe ku kuya mu mweo wa muyayaya balitetekele.”—Imilimo 13:47, 48; Esaya 49:6.

Umwina Kristu waipeelesha kabili uwapimpa uwe shina lya William Lloyd Barry, uwa mwi Bumba Litungulula ilya Nte sha kwa Yehova, na o alefwaisha ukulenga ulubuuto lwa ku mupashi ukubalika. Munyina Barry afwile pa July 2, 1999, ilyo aalebombela ibungano lya citungu ku Hawaii.

Munyina Lloyd Barry afyalilwe ku New Zealand pa December 20, 1916. Kale kale banyina na bawishi baali nabatemwa icine ca mu Baibolo icalelondololwa mu mpapulo sha kwa C. T. Russell, isho Watch Tower Bible and Tract Society yalesabankanya. E co, Munyina Barry akuulile mu ng’anda ya Bena Kristu baipeelesha.

Nangu cingati alitemenwe ifyangalo na masomo, kabili alipokele na digiri muli sayansi, Munyina Barry apoosele sana amano ku fya ku mupashi. Kanshi, pa January 1, 1939, atendeke ubutumikishi bwa nshita yonse, ukuba mu lupwa lwa Bethel pa maofeshi ya Sosaite aya ku Australia. Ilyo ubuteko bwabindile Sosaite mu 1941, Munyina Barry atwalilile ukubombela mwi ofeshi, limo limo alepeelwa umulimo wa kulemba ifyebo fya kukoselesha abasumina banankwe. Kabili aaletungulula bwino bwino mu butumikishi bwa ku cintubwingi.

Mu February 1942, Munyina Barry aupile nkashi uwali mu mulimo wa nshita yonse. Umukashi wakwe uwamutemenwe nga nshi, Melba, alibombele pamo nankwe imyaka yonse iyi mu ncende ishingi pano isonde. Icikalamba cimo bacitile cali kubombela mu fyalo fimbi. Pa kucite ci basangilwe kwi kalasi lyalenga 11 ilya Watchtower Bible School of Gilead ku United States. Batuminwe uko abengi bengatila ku “mpela ya pano nse,” ku Japan. Ilyo baafikile mu November 1949, batendeke bumishonari mu musumba wa Kobe umwaba icabu. Pali ilya nshita, abaleshimikila imbila nsuma mu Japan baali fye 12. Munyina Barry asambilile ululimi ne mikalile ya ku cifulo cakwe icipya kabili asukile atemwa nga nshi abena Japan, abo abombeele pa myaka 25. Ukutemwa uko atemenwe “abasontelwe ku kuya mu mweo wa muyayaya” kwalemonekesha kuli bamunyina abalefulilako mu Japan, icamulengele ukubomba bwino nga nshi ilyo aali kangalila we ofeshi lya Sosaite pa myaka iingi.

Mu 1975, ilyo kwali Inte mupepi na 30,000 mu Japan, Munyina na Nkashi Barry baebelwe ukukuukila ku Brooklyn, New York. Apo Munyina Barry aali Mwina Kristu wasubwa no mupashi, asontelwe ukuba mwi Bumba Litungulula ilya Nte sha kwa Yehova. (Abena Roma 8:16, 17) Apo aali uwabelesha ifya kulemba ifipande, abele uwashintililwapo nga nshi mu mulimo upya apeelwe mu Dipartmenti wa Kulemba. Kabili ukubelesha uko abeleshe mu kwangalila iofeshi lya Sosaite kwamupangeshe ukwaafwilishako apakalamba muli Komiti wa Kusabankanya uwe Bumba Litungulula umo aali.

Pa myaka yonse iyi, Munyina Barry atwalilile fye ukutemwa ifyalo fya ku Kabanga na bantu babako. Abasambi ba Gileadi na ba mu lupwa lwa Bethel lyonse baleishiba fye ukuti nangu cibe shani mu malyashi yakwe mwalaba ifya kukumanya fishaiwamina pa lwa bengi ababombeleko bumishonari. Ilyo Munyina Barry aaleshimika ifya kukumanya mu kucincimuka, uuli onse alemona ukuti cine cine ni kashimikila wa Bufumu ‘uwafikile ku mpela ya pano nse.’ Ifya kukumanya fyakwe fimo fisangwa mu lyashi lyakwe ilyalembelwe mu Ulupungu lwa kwa Kalinda ulwa ciNgeleshi ulwa September 15, 1960.

Tatuletwishika ukuti pamo nge ‘mpyani inankwe iya kwa Kristu,’ ukutemwa uko Munyina Barry atemenwe “abasontelwe ku kuya mu mweo wa muyayaya” kuli no kutwalilila. Kwena, bonse abamutemenwe na bamwishibe ukuti aali muntu wa bumupashi, uwaipeeleshe kuli Yehova kabili uwatemwishishe abantu ba kwa Lesa bakalamufuluka nga nshi. Lelo, tulesekelela ukuti Munyina Barry alishipikishe mu busumino ukufika na ku mpela ya mulimo wakwe pano isonde.—Ukusokolola 2:10.

[Icikope pe bula 16]

Lloyd Barry na John Barr ilyo Insight on the Scriptures yafumine mu 1988

[Icikope pe bula 16]

Abapwishishe ikalasi lyalenga 11 ilya Gileadi, bakumana pa numa ya myaka 40 mu Japan