Bushe Umwaka wa 2000 Ukaba Uwaibela?
BUSHE kukaba icintu caibela icikacitika mu mwaka wa 2000? Abena Amerika abengi balemona uyu mwaka ukuti e wa kubalilapo ukulola ku myaka 3000. Kuli amapekanyo ayengi aya kwisasefya. Inkoloko ishikalamba isha malaiti shilepangwa ishikalalanga uko amasekondi yalecepelako mpaka umwaka ukafike. Baleteyanyako no bwangalo bwa mupila ubwa kusefya icaka cipya. Basikipa balembwapo amashiwi ya kuti imyaka ya ba 1900 ilepwa baleshitishiwa mu matuuka ayanono na yakalamba.
Amacalici ayanono na yakalamba yali no kusefyako imitebeto iikasenda umwaka uutuntulu. Ku kutampa fye kwa mwaka uleisa, Papa John Paul II ali no kuya ku Israel ku kusefya pamo na baKatolika ico baleita ati “BaKatolika basefya imyaka ikana limo iya ntandala.” Casoswo kuti abatandashi mupepi na mamilioni yabili na hafu ukufika ku mamilioni 6, abaipeelesha ku fya mapepo na bafwaya fye ukutambako, balepanga ukutandalila Israel umwaka uleisa.
Mulandu nshi abantu bafulishe fyo balepekanishisha ukutandalila icalo ca Israel? Roger Cardinal Etchegaray, shikofu mukalamba mu Vatican, ilyo aleimininako papa atile: “Umwaka wa 2000 ukaba wa kusefeshamo Kristu ne mibombele yakwe muli ici calo. Twamona kanshi ukuti papa tengapuswa ukwa musango yu.” Nga Kristu aisamo shani mu mwaka wa 2000? Batila mu mwaka wa 2000 ninshi papita imyaka 2,000 ukutula apo Kristu afyalilwe. Lelo bushe e fyo cili? Twalamona.
Umwaka wa 2000 uli uwaibela maka maka ku mipepele imo imo. Balishininwa ukuti mu mwaka uleisa nelyo uukakonkapo, Yesu akabwela ku Lupili lwa Miolife no kuti e lyo ubulwi bwa Armagedone, ubwa mu Ukusokolola, bukabako mu mupokapoka wa Megido. (Ukusokolola 16:14-16) Pali uyu mulandu, abena Amerika abengi baleshitisha amayanda ne fipe fyabo ifingi kabili balekuukila ku Israel. Pa kuti abali bonse abashingakumanisha ukuya ku Israel bakamwenemo, cashimikwa ukuti shimapepo walumbuka uwa ku Amerika alilaya ifyo akatambisha ukubwela kwa kwa Yesu pa TV mu fikope fyabalabata!
Mu fyalo fya ku Amerika, amapange pa lwa mwaka wa 2000 yalekoselako. Nangu cibe fyo, abantu mu fyalo fimbi bena tabeshibepo nangu kamo. Aba bena, na kuba e bafulisha sana, tabasumina ukuti Yesu umwina Nasareti e Mesia. Kabili balatwishika fye ne mipendele ya nshita iya kubomfya B.C. na A.D.a Ku ca kumwenako, abaShilamu abengi babomfya kalenda wabo abene, kabili ukukonka ulya kalenda umwaka uleisa ukaba e walenga 1420, te 2000 iyo. AbaShilamu bapenda imyaka ukutula lintu kasesema Muḥammad afulumwike ku Mecca ukuya ku Medina. Icalo fye conse apo capela, abantu babomfya bakalenda mupepi na 40.
Bushe umwaka walenga 2000 ukakuma Abena Kristu? Bushe ubushiku bwa pa January 1, 2000, bukaba ubwaibela nga nshi? Ifi fipusho fyalayasukwa mu cipande cikonkelepo.
[Futunoti]
a Mu mipendele ya nshita iya B.C. na A.D., ifyacitike ilyo Yesu talafyalwa ninshi fyacitike mu “B.C.” (e kuti imyaka ilyo Kristu ashilaisa); ifyacitike pa numa fyena fyacitike mu “A.D.” (e kutila Anno Domini—“mu mwaka wa kwa Shikulwifwe.”) Nangu cibe fyo, abasoma bamo basalapo ukubomfya ifilembo fya kuti “B.C.E.” (e kutila ilyo ino Nshita ishilafika) na “C.E.” (Inshita Yesu.)