Baacitile Ukufwaya kwa kwa Yehova

Ukupeela mu Kuitemenwa ku Kulundulula Ukupepa Kwasanguluka

ABENA Israele baliimwenene abene amaka ya kwa Yehova aya kupususha. Balipapushiwe ilyo bamwene ukupaatukana kwa menshi ya pali Bemba Wakashika kabili bayabwike apauma ndi no kupusuka ku fita fya Egupti. Kabili ilyo baali bushilya bwa bemba balimwene uko amenshi yamo yene yafimbilikishe umulalo wa bena Egupti. Cine cine Yehova alibapuswishe!—Ukufuma 14:21-31.

Ku ca bulanda abena Israele bamo balilabile fintu Lesa wabo abaacitile. Ilyo Mose aali ku lupili lwa Sinai, bapeele Aarone golde no kumweba ukuti abapangile akalubi e ko balepepa. Lintu Mose abwelulwike, asangile aba bacipondoka balelya, balenwa, balecinda, no kukontamina umutepa wa ng’ombe! E co, Yehova akambishe ukuti bepaiwe, na muli fyo abantu mupepi na 3,000 balipaiwe, napamo aba e bali basolwesolwe muli uku kupondoka. Pali bulya bushiku, abantu ba kwa Lesa balisambilile ubucindami bwa kupepa fye Yehova eka.—Ukufuma 32:1-6, 19-29.

Pa numa ya kulya kupondoka, Mose aliipekenye ukukuule hema lya kupepelamo ukulingana na fintu Lesa amwebele. Ili hema lyali no kulasendwa konse uko baleya. Ifisolobelo fyaluma umutengo na bakabomba bacenjela fyalekabilwa. Bushe ni kwi ifi fyonse fyali no kufuma? Kabili cinshi twingasambililako kuli ili lyashi lya mu Baibolo?

Ukusangwilako Ifya Kukuulila no Butukushi

Yehova abomfeshe Mose lintu akambishe abena Israele ukuti: “Mubuule muli imwe ica musangulo ca kwa Yehova: onse uwaitemenwa mu mutima acilete, ca musangulo ca kwa Yehova.” Fintu nshi fyalefwaikwa ukusangwilako? Pa fintu Mose alumbwile pali golde, silfere, umukuba, ubushishi, insalu, imikupo, ifimuti, na mabwe yaumo mutengo.—Ukufuma 35:5-9.

Abena Israele balikwete ifi fintu e co nangu kupeelo umusangulo kwali fye ukwayanguka. Ibukisheni ukuti, ilyo bafumine mu Egupti balisendele ifisamo fya golde ne fisamo fya silfere, ne fya kufwala ifingi nga nshi. Cine cine, ‘balitapile abena Egupti.’a (Ukufuma 12:35, 36) Abena Israele pa kubala, balifuulile fya kufwala fyabo ifya golde no kupangamo akalubi aka kubomfya mu kupepa kwa bufi. Bushe baliipeleshe ukupeelo musangulo mu kulundulula ukupepa kwa cine nga filya baacitile ku kupepa kwa bufi?

Ishibeni ukuti, Mose tabikile icipimo cila muntu aali no kupeela, nelyo ukubapatikisha ukupeela. Lelo, alombele “onse uwaitemenwa mu mutima.” Mose ukwabulo kutwishika alimwene ukuti tacakabilwe ukupatikisha abantu ba kwa Lesa. Alishininkishe ukuti uuli onse, umwaume atemwa umwanakashi onse ali no kupeela apo akwatile.—Linganyeniko 2 Abena Korinti 8:10-12.

Nangu cibe fyo, ubukuule bwalekabila ifingi te fisolobelo fye. Yehova na kabili aebele abena Israele ukuti: “Onse uwa mutima wa mano uwa muli imwe ese, no kucita conse ico Yehova aebele.” Ca cine, ubu ubukuule bwalekabila intukushi “ku micitile yonse” e kutila ukubase fimuti, ukufule fyela, no kupamina amabwe pa kupwishishisha ubukuule. Ukwabulo kutwishika, Yehova alibatungilile mu kubomfya ukulamuka kwabo, e co ukutasha konse pa ncito yabombelwe kwaile kuli wene.—Ukufuma 35:10, 30-35; 36:1, 2.

Abena Israele mu kuitemenwa balisangwilileko amano yabo ne fisolobelo. Baibolo itila: “Baishileko umuntu onse uo umutima wakwe wamwimishe kabili onse uo umutima wakwe wamulengele ukuitemenwa, na bo balete ca musangulo ca kwa Yehova, ku mulimo we hema lya Kulaishanya, na ku bubomfi bonse bwa liko, na ku fya kufwala fya mushilo. Baishileko abaume na banakashi, onse uwa kuitemenwa mu mutima.”—Ukufuma 35:21, 22.

Ico Twingasambililako

Ilelo umulimo ukalamba uwa kushimikila imbila nsuma ya Bufumu bwa kwa Lesa ulebombwa ukupitila mu misangulo. Ilingi line, indalama e shipeelwa. Lubali lumbi, bamunyina na bankashi aba Bwina Kristu babomfya amano yabo mu kukuula Amayanda ya Bufumu, Ifiyanda fya Kulonganinamo, na maofeshi ya Watchtower Society. Kumfwa bambi na bo babombela mu mayanda ya Bethel ayacila pali 100 mu calo conse kabili muli ifi fikuulwa mukabila ukulamuka ukwalekanalekana. Bonse bakabomba ba mitima ya kuitemenwa abaipeela balebukisha ukuti Yehova takalabe ukubombesha kwabo!—AbaHebere 6:10.

E fintu caba nangu ni mu kushimikila imbila nsuma. Bonse tulakoseleshiwa ukubomfye nshita yesu mu kushimikila no kuba abapimpa. (Mateo 24:14; Abena Efese 5:15-17) Bamo ni bapainiya e kutila bashimikila inshita yonse. Kumfwa bambi na bo tababomba inshita iikulu nga fintu bapainiya babomba ku mulandu wa mibele imo. Na bo bene balasekesha Yehova. Nga fintu fye cali ku musangulo we hema, Yehova tapimina icipendo cila muntu afwile ukupeela. Lelo ena cintu afwaya kumubombela ne mitima yesu yonse, imyeo yesu yonse, amano yesu yonse, na maka yesu yonse. (Marko 12:30) Nga ca kuti tupeelo musangulo mu kuitemenwa ku kulundulula ukupepa kwa cine Lesa akatulambula.—AbaHebere 11:6.

[Futunoti]