Balishipa Imitima Te Mulandu no Kuba Abepi

BUSHE kuti caumfwika shani ukulanda ku bantu mushaishiba pa lwa Bufumu bwa kwa Lesa nga mwaleepele fye basentimita 76? Laura alamwebako. Ali ne myaka 33, lelo aleepa fye, basentimita 76 epela. Wene na nkashi nankwe, María uwa myaka 24 lelo uwalepa basentimita 86, bekala mu Quito, Ecuador. Lekeni balondolole amafya bakumanya mu butumikishi bwa Bwina Kristu.

“Pa kuya ku cifulo ca kushimikilako na ku kulongana kwa Bwina Kristu, tulenda bamita 500 pa kuyanina motoka. Ukufuma apo tuselukila, tulenda bamita na bambi 500 pa kuyanina motoka wa bubili. Ku ca bulanda, muli iyi nshila mwaliba imbwa ishikali sana shisano. Tulatiina sana imbwa pantu kuli ifwe shimoneka ishikalamba kwati ni bakabalwe. Nga cakabilwa, pa kushitamfya tulasenda akamuti akatali, ako tufisa mupepi no musebo ilyo tushilanina motoka pa kuti tukabomfye na pa kubwelelamo ku ng’anda.

“Kuli ifwe ukunina mu motoka kuba ni ncito icine cine. Twiminina pa mwiina wa fisooso uuba pa citesheni ca bamotoka pa kuti citwangukile ukwingila mu motoka. Banamutekenya bamo balapalamika motoka ku mwiina wa fisooso, lelo bambi tabacite fyo. Nga cabe fyo, uwalepapo pali ifwe babili alafwilishako umunankwe ukunina. Pa kunina motoka wa bubili tulatoloka umusebo uukalamba umupita ba motoka abengi sana, ico cifwaya ukuibikilishako kwine kwine apo amolu yesu yepi. Pa mulandu wa ciimo cesu icinono, icola ca mabuuku icafina cilalundapo ubwafya. Pa kuti icola cangukeko, tubomfya Baibolo iinono kabili tatusenda amabuuku ayengi.

“Twaba aba nsoni sana ukutula ku bwaice. Abena mupalamano besu balishiba ukuti tulatiina ukulanda ku bo tushaishiba. E co balasunguka kabili balatemwa ukutumona tulekonkonsha pa fiibi fyabo kabili ilingi balakutika. Lelo uko bashatwishiba bwino, ilingi bamona fye ukuti tuli tubantu utunono sana, na muli fyo tabapoosako amano ukukutika ku bukombe bwesu. Nangu ni fyo, ukwishiba ukuti Yehova alitutemwa kulatukosha ukuti tutwalilile umulimo wa kushimikila. Ukwetetula pa Amapinda 3:5, 6 na ko kulatukosha.”

Nga fintu Laura na María balangilila, ukushishimisha te mulandu no bulema bwa ku mubili kulalumbanya Lesa. Umutumwa Paulo apepele ukuti Lesa afumye “umuunga mu mubili” wakwe, icali kukalipwa kwa ku mubili. Lelo Lesa amwebele ati: “Ukusenamina kwandi kwakumana kuli iwe; pantu mu kunaka e mo amaka yandi yalengwo kufikapo.” Ca cine, ubulema bwa ku mubili tabukabila ukufumishiwapo pa kuti tubombele Lesa. Ukushintilila umupwilapo pali Lesa kuti kwatwafwilisha ukuwamya imibele yesu. Pa mulandu wa kumona “umuunga mu mubili” wakwe muli iyo nshila, Paulo asosele ukuti: “Ilyo nanaka, e lyo naba na maka.” (2 Abena Korinti 12:7, 9, 10) Imyaka iingi pa numa Paulo alembele ukuti: “Ndi na maka aya kucite fintu fyonse mu ulenkoselesha.”—Abena Filipi 4:13.

Mu nshita sha nomba line, Lesa alepwishishisha umulimo wakwe uushaikulila ukupitila mu baume, abanakashi, na baice abaipeelesha sana kuli wene. Abengi balilemana mu nshila shimo. Nangu cingati bonse basubila ukundapwa na Lesa mu Bufumu bwakwe, tabalolela ukuti Lesa akapwishe amafya yabo e lyo bakabombeko umulimo wakwe.

Bushe mwalilemana lwa ku mubili? Shipeni! Pa mulandu wa citetekelo kuti mwaba nga Paulo, Laura, na María. Pa lwa bene kuti casoswa, nga fintu casoselwe pa lwa baume na banakashi ba busumino aba ku kale ukuti: “Balengelwe aba maka ukufuma mu kunaka.”—AbaHebere 11:34.

[Icikope pe bula 8]

María

Laura

[Icikope pe bula 9]

María aleafwilisha Laura ukunina bus

[Ifikope pe bula 9]

“Tulatiina sana imbwa pantu kuli ifwe shimoneka ishikalamba kwati ni bakabalwe”

Pe samba: Laura na María pamo na bo batungulwileko amasambililo ya Baibolo