Bushe Muleibukisha?
Bushe mwalyumfwikishe bamagazini ba Ulupungu lwa kwa Kalinda aba nomba line abo mwabelengele? Cisuma, moneni nga kuti mwayasuka ifi fipusho:
• Cinshi calengele ukuti cangukile abena Korea ukupokelela Krisimasi?
Kwali icisumino ca kale mu Korea na mu fyalo fimbi pa lwa kwa lesa wa kicini uo baleti aleisa ukupita mu citofu no kuleta ifya bupe mu December. Kabili, ilyo Inkondo ya Calo iya Cibili yapwile, abashilika ba ku United States bapeelele ifya bupe ne fya kupumbusuka pa macalici.—12/15, amabula 4, 5.
• Mu kufikilisha Esaya 21:8, “mulinshi” nshi Lesa akwata mu nshita yesu?
Abena Kristu basubwa no mupashi, ababomba nge bumba lya mulinshi, balishibisha abantu pa lwa ficitika mu calo ififikilisha ukusesema kwa mu Baibolo. Na kabili balyafwilisha abasambi ba Baibolo ukwishiba no kusengauka ififundisho ne ncitilo ifishumfwana na malembo.—1/1, amabula 8, 9.
• Bushe “Aba Bwananyina ba ku Poland” bali ni bani?
Bali kalibumba kanono aka fya mapepo akaliko mu myanda ya myaka iyalenga 17 na 18 mu Poland akakoseleshe ukukonka Baibolo na muli fyo ukukaana ififundisho fya macalici ifyaliko pamo nga Bulesa Butatu, ukubatisha utunya, no kuti helo abamo mulilo. Mu kupita kwa nshita, balipakeswe icabipisha kabili bapatikishiwe ukusalanganina mu fyalo fimbi.—1/1, amabula 21-3.
• Mulandu nshi uwa kucetekela ukusesema kwa Baibolo ukucila bakasobela ba nshita ya ku ntanshi nelyo bakalengula ba ntanda?
Abaitunga ukuba bakasesema tabashintililwapo pantu balisuula Yehova na Baibolo. Ukusesema kwa Baibolo epela e kwingamwafwa ukwishiba ifyo ifilecitika fileumfwana ne mifwaile ya kwa Lesa, ukumunonsha no kunonsha ulupwa lwenu ku ciyayaya.—1/15, ibula 3.
• Bushinino nshi bumo ubulanga ukuti tuleikala mu nshiku sha kulekelesha?
Tulemona ifyafumamo pa mulandu wa kuti Satana alitamfiwa ku muulu. (Ukusokolola 12:9) Tuleikala mu nshita ya “mfumu” ya kulekelesha iyalumbulwa pa Ukusokolola 17:9-11. Impendwa ya Bena Kristu basubwa icine cine ilecepelako, nangu cingati bamo mu kushininkisha bakaba pe sonde lintu ubucushi bukalamba bukabalamuka.—1/15, amabula 12, 13.
• Ibuuku lya kwa Habakuki lyalembelwe lilali, kabili mulandu nshi tulingiile ukufwaila ukumfwikisha lyene?
Ili buuku lya Baibolo lyalembelwe napamo mu 628 B.C.E. Lyabamo ubupingushi Yehova apingwile Yuda wa pa kale na Babele. Na kabili lilanda pa bupingushi bukesa pa bwikashi buno ubwabipa.—2/1, ibula 8.
• Ni kwi mu Baibolo tusanga ukufunda kwa mano ukwa kwa nyina ku bakashi ba bunyinu?
Icipandwa ca kulekelesha ice buuku lya Amapinda, e kuti mu cipandwa 31, mwaba ifyebo fisuma sana pa lwa uko kufunda.—2/1, amabula 30, 31.
• Mulandu nshi twingabela aba kutasha ukuti Yehova alitusokolwela “umutima wa kwa Kristu”? (1 Abena Korinti 2:16)
Ukupitila mu malandwe, Yehova alitwishibisha umuntontonkanya wa kwa Yesu, inkuntu shakwe, imibombele, ne fyo atangisheko. Ici kuti catwafwa ukupashanya Yesu, maka maka nga twapampamina pa kubomba umulimo wa kupususha imyeo uwa kushimikila.—2/15, ibula 25.
• Bushe Lesa alasuka amapepo ilelo?
Ee. Nangu line Baibolo ilangisha ukuti Lesa tasuka amapepo yonse, ifya kukumanya fya muno nshiku filanga ukuti ilingi alyafwa abantu abapepela icisansamushi no kwafwiwa pa milandu pamo nge yakupikulula amafya ya mu cupo.—3/1, amabula 3-7.
• Cinshi twingacita pa kunonka amaka ya kwa Lesa?
Kuti twayalomba mwi pepo, kuti twafumya amaka ya ku mupashi muli Baibolo, no kukoshiwa ukupitila mu kubishanya kwa Bwina Kristu.—3/1, amabula 15, 16.
• Ni shani fintu abafyashi bengafwilisha abana ukunonkelamo sana mu kulongana?
Kuti bayafwa abana babo ukukanapona mu tulo, nalimo ukuleka basendamako ilyo bashilaya mu kulongana. Kuti bakoselesha abana ukulembako “ifyebo fimo,” pamo nga ukupitila mu kulemba icishibilo cimo ilyo amashiwi nelyo amashina yaseeka yalandwa.—3/15, amabula 17, 18.
• Fintu nshi fimo twingasambililako ku ca kumwenako ca kwa Yobo?
Yobo akatamike sana bucibusa bwakwe na Lesa, tali na lufyengo mu mibombele yakwe na bantu bambi, atukwite ukuba na bucishinka ku mukashi wakwe, alesakamana ulupwa lwakwe lwa ku mupashi, kabili atwalilile uwa busumino ilyo aeshiwe.—3/15, amabula 25-7.
• Bushe Baibolo yalikwata ifyebo fyafiswa ifyafwa ukumfwikisha ubukombe bwabamo?
Iyo. Abatunga ukuti Baibolo yalikwata ifyebo fyafiswa kuti bacite fyo na ku fitabo fimbi ifya ku calo. Ifyebo fyafiswa ifitungwa ukuba mu Baibolo, te kuti fikwate ubupilibulo pantu insopelo sha muli bamanyuskripiti balekanalekana aba ciHebere shalipusana.—4/1, amabula 30, 31.