Bushe Muleibukisha?

Bushe mwalyumfwikisha ifyo mwabelengele muli bamagazini ba nomba line aba Ulupungu lwa kwa Kalinda? Cisuma, moneni nga kuti mwayasuka ifi fipusho:

• Mulandu nshi tufwile ukwetetwila pa fipusho fyaipushiwa muli Yobo icipandwa 38?

Ifipesha amano ifingi ifyo Lesa acitile nangu ni basayansi ba lelo te kuti bafyumfwikishe. Ifi filesanshamo ifyo amaka yatinta yalenga isonde ukulapita mu nshila lipitamo mu lwelele, ico lubuuto lwaba, imisango yalekanalekana iya tukalambya, ifyo imfula ipangwa, ne fyo amaka yasanshiwamo mu kupanta kwa nkuba.—4/15, amabula 4-11.

• Fya kumwenako nshi ifya mu Baibolo fingatwafwa ukucimfya ukufupulwa?

Asafi, Baruki, na Naomi baikele mu nshita ya kulenga ukufupulwa, kabili ifyalembwa mu Malembo pa fyo bacimfishe ilya mibele kuti fyatwafwa.—4/15, amabula 22-24.

• Ni nshila nshi shimo ishibomba isha kwafwilamo bamukamfwilwa Abena Kristu?

Bacibusa kuti baitemenwa ukwafwa. Aba mu lupwa nelyo bambi kuti babapeela indalama nelyo ifilekabilwa, nga ca kuti kuli ukukabila kwine kwine. Apo Abena Kristu banabo baba fibusa fyabo kuti babafwako, ukubatungilila lwa ku mupashi no kubasansamusha.—5/1, amabula 5-7.

• Mulandu nshi cacindamina ukuupila fye “muli Shikulu epela,” nga fintu 1 Abena Korinti 7:39 itweba?

Ifyupo fya kuupana na bashasumina ilingi line filakwata amafya ayakalamba. Na kabili, ukumfwila uku kupanda amano kulanga bucishinka kuli Yehova Lesa. Ilyo twanakila Icebo ca kwa Lesa, imitima yesu taituseka. (1 Yohane 3:21, 22)—5/15, amabula 20 na 21.

• Apo Yehova e wingalekelela imembu shesu, mulandu nshi Abena Kristu batumbwila imembu shikalamba ku bakalamba mu cilonganino?

Ca cine, Umwina Kristu afwile ukulomba kuli Yehova ukuti amweleele imembu shakwe ishikalamba. (2 Samwele 12:13) Lelo nga filya fine kasesema Natani ayafwile Davidi, abaume bakosoka mu cilonganino kuti bayafwa ababembu abalapila. Ukuya kuli baeluda kwaliba fye bwino nga filya fine fyalandwa pali Yakobo 5:14, 15.—6/1, ibula 31.

• Fishinka nshi fyabako ifilanga ukuti tufwile ukusakamana inshiiwa na bamukamfwila abalekabila?

Ifyalembwa mu lyashi lya kale filanga ukuti ukusakamana aba musango yu kwalangilile ukuti, ukupepa kwa AbaHebere ba ku kale na Bena Kristu ba kubalilapo kwali kupepa kwa cine. (Ukufuma 22:22, 23; Abena Galatia 2:9, 10; Yakobo 1:27) Umutumwa Paulo tapitile mu mbali ilyo alembele ifyebo fimo mu Malembo ukweba Abena Kristu ukuti bafwile ukusamana bamukamfwilwa abakabila. (1 Timote 5:3-16)—6/15, amabula 9-11.

• Kuti twakwata shani imikalile ya nsansa kabili iisuma?

Tufwile ukulundulula no kubaka bucibusa bwine bwine na Yehova, Shifwe wa ku muulu. Ukusambilila Baibolo kuti kwatwafwa ukucite co.—7/1, amabula 4-5.

• Bushe umuntu onse alikwata umupashi uushifwa uufumamo no kuya kumbi ilyo umuntu afwa?

Nangu line abantu bamo batila icishifwa te mweo lelo mupashi, Baibolo yena te fyo ilanda. Ilanda ukuti ilyo umuntu afwa, abwelela ku lukungu kabili alaloba. Lelo Lesa e ushala na maka ya kubwesha ubumi bwakwe, e co isubilo lyonse ilya bumi bwa ku ntanshi, ilya kumubuusha, lishala fye kuli Lesa. (Lukala Milandu 12:7)—7/15, amabula 3-6.

• Bushe Daniele aali kwi ilyo abaHebere batatu baeshiwe ku nika ya Dura?

Baibolo tayalanda. Nalimo Daniele takabile kusangwako pa mulandu wa cifulo akwete, nelyo pali uko aile ku kubomba imilimo ya buteko. Lelo twalicetekela ukuti atwalilile uwa busumino kuli Yehova.—8/1, ibula 31.