Bushe Kuti Mwapalama Kuli Lesa Uushimoneka?

Kuti mwaipusha amuti, ‘Kuti napanga shani icibusa no muntu uo nshingamona?’ Ico kuti camoneka ukuba nge cipusho calinga. Lelo tontonkanyeni pali ci:

BUSHE ukumona kwacindama shani ku kulundulula bucibusa bwabamo ukutemwa kabili ubushipwa? Bushe imibele ishimoneka nayo te kuti icilepo ukucindama? Kuti yacilapo! E mulandu wine bamo balundulwila bucibusa bwakosa na bambi ukupitila mu kulembeshanya—bakalata balangilila mu bufumacumi ifyo batemwa, ifyo bashatemwa, amabuyo yabo, ifishinte fya mafunde bakonka, nga bantu basekesha nelyo iyo, ne mibele yabo imbi.

Abashimona na bo balangilila ukuti ukukanamona tekwingalesha ukulundulula bucibusa bwakosa no muntu umbi. Natumone ica kumwenako ca baEdward na baGwen, abaupana nelyo ca kutila tabamona.a BaEdward bakumenye baGwen pa sukulu lya bashimona, apo nabo bali basambi mu mishinku ya bukalamba. Batemenwe imibele ya baGwen, maka maka ubufumacumi bwabo mu milandile ne myendele, ne fyo balebombesha mu mulimo wabo. BaGwen na bo batemenwe baEdward pa mulandu wa kuti, mu mashiwi yabo batila, “baEdward bakwete imibele yacindama iyo nasambilishiwe ukufuma ku bwaice.” Batendeke ukwishishanya, na pa numa ya myaka itatu balyupene.

BaEdward batila: “Nga muli pamo, ukukanamona takulesha umo ukulundulula bucibusa no muntu umbi. Te kuti muimone, lelo te kuti ufilwe ukwishiba ifyo umbi aleumfwa.” Nomba, nabekela imyaka 57, kabili bacili balitemwana sana. Balondolola ukuti inkama yabapo pa kuti batemwane sana isanshamo ifintu ukucila pali fine: (1) ukwishiba imibele ya muntu umbi, (2) ukutontonkanya pali iyo mibele no kutemwa yene, (3) ukutwalilila ukulanshanya bwino, no (4) kucitila ifintu pamo.

Ifi fishinka fine filakabilwa pa kuba na bucibusa busuma ubuli bonse, nampo nga bwa pa kati ka fibusa, pa baupana nelyo, bucibusa bwacilishapo ukucindama, ubwa pa bantu na Lesa. Mu cipande cikonkelepo, twalamona ifyo ukubomfya ifi fishinka kwingatwafwa ukulundulula bucibusa bwakosa na Lesa, nangu ca kutila tatumumona.b

[Amafutunoti]