Ilyashi Lya Bakabilisha Ba Bufumu

Aba ku Latvia Bayankula ku Mbila Nsuma

BAIBOLO itweba bwino bwino ukuti Lesa afwaya ‘abantu ba misango yonse ukupusuka no kufika ku kwishiba kwine kwine ukwa cine.’ (1 Timote 2:4, NW) Pa myake iingi abantu abashakwete ishuko lya kukutika ku mbila nsuma nomba balekutika! Mu Latvia, nga fintu fye caba na mu ncende shimbi isha calo, abantu ba mishinku yalekanalekana ne fikulilo baleyankula ku bukombe, nge fyo ifyakukumanya ifyakonkapo filelangilila.

• Mwi tauni lya Rēzekne ilyabela ku kabanga ka Latvia, nyina no mwana wakwe umukashana uwa myaka ya bupungwe baipwishe umwanakashi umo pa musebo ukubalanga inshila iya kwendamo. Pa numa ya kubalanga, uyu mwanakashi, uwali Nte ya kwa Yehova, abalaalike ukuti bakasangwe ku kulongana ukwa Nte.

Apo nyina no mwana wakwe umukashana balitemenwe ukupepa, bapingwilepo ukuya ku kulongana. Lintu baleya mu nshila, basuminishenye ukuti nga basanga conse icalubana mu kulongana, ukwabula no kupose nshita bali no kufumamo. Lelo, ukulongana kwaliweme ica kuti tabatontonkenye na pa lwa kufuma mu kulongana. Balisumine ku kusambilila Baibolo kabili batendeke ukusangwa ku kulongana lyonse. Mu myeshi fye itatu, batile balefwaya ukubombako umulimo wa kushimikila kabili balesubila no kubatishiwa.

• Mu musumba uwabela ku masamba ya ku Latvia, Nte umo akumenye umwanakashi wa myaka ya bukulu 85 uwe shina lya Anna, uwalefwaya ukusambilila Baibolo. Umwana wakwe umwanakashi na bambi aba mu lupwa balebakaanya. Lelo baAnna tabalengele ukukaanya atemwa imyaka yabo iya bukulu nangu ifyo ubumi bwali ukubalesha ukutwalilila ukusambilila Baibolo.

Ubushiku bumo, baAnna baebele umwana wabo umukashana ukuti bakabatishiwa. Umwana wabo atile: “Nga mukabatishiwa, nkaya mutwala ku cifulo basungila abakoloci.” Lelo, ici cintiinya tacaleseshe ba Anna. Pa mulandu wa fyo baleumfwa umubili wabo wali, babatishiwe mu ng’anda yabo.

Ngo mwana mukashana uwa ba Anna ayankwileko shani? Alyalwike, kabili pa numa ilyo banyina babatishiwe alibepikile ne fya kulya ifisuma. Lyena aipwishe banyina ukuti, “Apo namubatishiwa nomba, bushe muleumfwa shani?” Casuko nshi ba Anna bamwaswike? Batile: “Ndeumfwa kwati mwana wafyalwa!”

• Mu December 1998, ba Nte babili bakumene no muntu uwapokele penshoni mu bushilika mu fyalo ifyali kale mu Soviet Union. Apo alisumine muli Kabumba, alisumine ukutendeka ukusambilila Baibolo, kabili pa numa umukashi wakwe na o wine alesangwa pe sambililo. Balilundulwike mu kwangufyanya kabili bali bakasabankanya bashabatishiwa. Ulusuba lwakonkelepo, uyu uwali umushilika kale alibatishiwe. Ukutemwa kwa aba baupana ukwashika ukwa fya ku mupashi kwaliba ukwa kukoselesha kuli bonse mu cilonganino. Na kabili, baliipeelesha mu mulimo wa kupanga icifulo ca cikaya ukube Ing’anda ya Bufumu iisuma.