Ifyo Bumukamfwilwa Bwacitile Abanakashi Babili

SANDRA ni mukamfwilwa uwikala mu Australia. Ilyo abena mwakwe bafwile imyaka yapita, Sandra camuponeshe pa musao apo pene fye. “Ukwishiba ukuti nalufya umulume kabili cibusa natemwisha kwalimpeseshe amano. Nshibukisha nangu panono ifyo nafikile ku ng’anda ukufuma ku cipatala nelyo ifyo nacitile bulya bushiku. Mu milungu inono iyakonkelepo, umwenso nakwete walengele umubili wandi ukulakalipa cila nshita.”

Sandra alikwata cibusa wakwe umukalambako, uwe shina lya Elaine, uwafwilwa pa myaka nalimo 6. Elaine atenseshe abena mwakwe ba David pa myeshi 6 ilyo bashilafwa kuli kansa. Ubulanda bwakwe bwalilumine nga nshi ica kuti pa numa ya mfwa ya bena mwakwe, alipofwile pa nshita inono. Pa numa ya myaka ibili aliponene pa cintubwingi. Dokota wakwe tasangile ubulwele. Lelo, aishileiluka ukuti Elaine ali ne cikonko, e ico amwebele ukuya ku ng’anda no kwesha na maka ukulila. Elaine asumina ukuti: “Palikokwele pa kuti ubulanda bupwe.” Asosa no kuti nga natalalilwa, “naleya mu muputule wa kusendamamo no kuifimba ifya kufwala fya kwa David ku mutwe.”

Cine cine, imfwa ya mutemwikwa ilenga abantu ukucita ifyapusanapusana, pantu bumukamfwilwa busanshamo ifingi ukucila pa kwikala fye ukwabula umulume. Ku ca kumwenako, Sandra pa nshita imo aleyumfwa ukuti alyaluka. Ukupala bamukamfwilwa abengi abafwilwa nomba line, na o aleimona ukuti takwete wa kumucingilila kabili taicetekele. Sandra ebukisha ukuti: “Apo calibelele ukuba no mulume wandi uwalepingula ifya kucita, mu kupumikisha nashele fye neka no kutendeka ukuipingwila ifya kucita. Nshalelaala. Nalenaka. Calyafishe ukwishibe ca kucita.”

Ifyacitikile Sandra na Elaine filacitikila na bambi cila bushiku mwi sonde lyonse. Ukulwala, amasanso ya pa musebo, inkondo, ukukufya umukowa, no lukaakala e fimo ifilelenga bamukamfwilwa ukufula.a Abanakashi abengi balacula ukwabula ukulanda pantu tabeshiba ifya kucita. Cinshi ifibusa na balupwa bengacita ku kwafwa aba musango yu ukushipikisha muli bumukamfwilwa? Icipande cikonkelepo nacikwata imitubululo iingaafwa.

[Futunoti]