“Palameni Kuli Lesa, Na o Alapalama Kuli Imwe”
Ubumi pa Ntanshi na pa Numa ya Kusambilila Baibolo—Basangile Amaka Ayabalengele Ukwaluka
BA SANDRA, abanakashi ba mu Mexico, balondolwele ukuti tabalecita ifyo ulupwa lwabo lwalebenekela. Ukukaanwa no kupatwa fyalengele imyaka ya bukashana bwabo ukonaika. Batila: “Napitile mu myaka yandi iya bupungwe no kuyumfwa ukuti nshali kantu kabili naletwishika umulandu nabelele pa calo.”
Ilyo bali ku sukulu lya ku sekondari, ba Sandra batendeke ukunwa umwangashi bawishi bakwete pa ng’anda. Mu kuya kwa nshita abene batendeke ukuishitila ubwalwa kabili baalikunkwime ku bwalwa. Basumine ukuti, “tapali ica kunenga ukuba no mweo.” Ku mulandu wa kupelelwa, ba Sandra batendeke ukubomfya imiti ikola. Batila, “icalengafwako fye ukulaba amafya nakwete, cintu nalesenda mu cola candi, e kutila: ibotolo lya bwalwa, utubulungwa twa miti, nelyo ibange ilinono.”
Ilyo ba Sandra bapwile amasomo pa fya bumi, e lyo bacililemo ukunwa ubwalwa. Lelo balipuswike.
Ba Sandra balefwaya ubwafwilisho bwa ku mupashi na mu nkuntu mu mipepele iingi, lelo tababusangile. Ilyo balufishe isubilo no kupelelwa, imiku ingi baliliile Lesa ukuti: “Bushe mwe Lesa mwaba kwi? Cinshi mushingangafwila?” Ba Sandra baleyumfwa abashacindama pa nshita lintu Inte sha kwa Yehova balandile na bo. Ici calengele batendeke ukusambilila Baibolo. Balitemenwe sana pa kusambilila ukuti “Yehova aba mupepi na ku baputuke misana.”—Amalumbo 34:18.
Uwalesambilisha ba Sandra Baibolo abafwile ukumfwikisha ukuti Yehova Lesa alishiba ukuti twaliba mu bwafya pa mulandu wa lubembu no kukanapwililika ifyo twapyana kuli Adamu. Ba Sandra bailwike ukuti Lesa alishiba bwino ukuti te kuti tufikepo bwino bwino pa fipimo fyakwe ifyalungama. (Amalumbo 51:5; Abena Roma 3:23; 5:12, 18) Balitemenwe pa kwishiba ukuti Yehova takosela pa filubo fyesu, kabili tenekela ifyo tushingacita. Kemba wa malumbo aipwishe ati: “Amampuulu nga mwayamwensekesha, mwe Yehova, mwe Shikulu, nani uwingeminina?”—Amalumbo 130:3.
Icine cacindama icisangwa mu Baibolo icatalalike umutima wa ba Sandra cali lilambo lya cilubula ilya kwa Yesu Kristu. Ukupitila muli lyene, Yehova mu nkumbu alenga abantu ba cumfwila ukuba abalungama te mulandu ne filubo fyabo. (1 Yohane 2:2; 4:9, 10) Cine cine, kuti ‘twalekelelwa amampulu yesu’ ne ci kuti catwafwa ukutampa ukuyumfwa abacindama.—Abena Efese 1:7.
Ba Sandra basambilile amasambililo yacindama ku ca kumwenako ca mutumwa Paulo. Paulo alitashishe sana pa nkumbu sha kwa Lesa pa kumwelela ifilubo acitile kale no kumutungilila ukucimfya amabunake yalebwela pali wene. (Abena Roma 7:15-25; 1 Abena Korinti 15:9, 10) Paulo awemye ubumi bwakwe, ‘atutawile umubili wakwe no kuuteeka ubusha’ pa kuti engatwalilila mu nshila Lesa asuminisha. (1 Abena Korinti 9:27) Talekele ukulemenena ku lubembu kumuteeke ubusha.
Amabunake ya ba Sandra yalibacushishe, lelo balitwalilile ukulwisha. Bapepele mu bufumacumi kuli Yehova ukuti abafwe pa kucimfya amabunake no kulomba ukuti abelele. (Amalumbo 55:22; Yakobo 4:8) Ilyo ba Sandra bakutulwike ukuti Lesa alibatemwa, bayalwile imikalile yabo. Batila, “ndi ne nsansa ukusambilishako bambi Baibolo inshita yonse.” Ba Sandra balikwete ishuko lya kwafwa abakalamba babo abanakashi no mwaice wabo umwanakashi ukwishiba Yehova. Ilyo ‘balebomba icisuma,’ balaipeela no kubomba umulimo baishiba uwa fya cipatala pa mabungano ya Nte sha kwa Yehova.—Abena Galatia 6:10.
Ni shani pali filya ba Sandra bakunkwime ku miti ikola no bwalwa? Basosa no kucetekela abati: “Umuntontonkanya wandi uli uwasanguluka. Nalileka ukunwa, ukupeepa, nelyo ukubomfya imiti ikola. Nshififwaya. Nalisanga ico nalefwaya.”
[Amashiwi pe bula 9]
“Nalisangile ico nalefwaya”
[Akabokoshi pe bula 9]
Ifishinte fya mu Baibolo Filabomba
Ifi fyakonkapo fishinte fya mu Baibolo fimo ifyayafwa abengi ukuleka ifya kukunkumya ifikowesha:
“Tuisangulule kuli fyonse ifikowesha umubili no mupashi, tube abafishapo bumushilo mu kutiina Lesa.” (2 Abena Korinti 7:1) Lesa apaala balya abaisangulula, abataluka ku misango yakowela.
“Ukutiina Yehova e kupato bubi.” (Amapinda 8:13) Akatiina ka kuli Lesa kalafwa umuntu ukutaluka ku mibele yabipa, ukusanshako fye no kubomfya imiti bubi bubi. Umuntu uwayalula imibele yakwe alateemuna Yehova no kucingililwa ku malwele yabipisha.
‘Akunakileni no kumfwila amabuteko na bamulopwe abaleteeka.’ (Tito 3:1) Mu ncende ishingi, ukukwata nelyo ukubomfya imiti imo kwaba kutoba ifunde. Abena Kristu ba cine tabakwata nelyo ukubomfya imiti ishili ya mwi funde.