Tasheni Yehova pa Milimo Yakwe Iikalamba!
“Umutima wandi uletasha Shikulu . . . pantu Uwa maka ancitile fikalamba.”—LUKA 1:46-49.
1. Milimo nshi iikalamba iyo tucita bwino ukutashishapo Yehova?
YEHOVA awamina ukutasha pa milimo yakwe iikalamba. Ilyo kasesema Mose akolobondele mu lyashi lya kulubulwa kwa bena Israele mu Egupti, atile: “Amenso yenu yamwene umulimo onse ukalamba wa kwa Yehova.” (Amalango 11:1-7) Ici capalana ne co umukashana nacisungu Maria asosele ilyo malaika Gabriele abilishe ulwa kufyalwa kwa kwa Yesu, Maria atile: “Umutima wandi uletasha Shikulu . . . pantu Uwa maka ancitile fikalamba.” (Luka 1:46-49) Apo tuli Nte sha kwa Yehova, tutootela wene pali iyi milimo yakwe ikalamba pamo nge ya kulubula abena Israele ku busha bwa bena Egupti ne ya kulenga Umwana wakwe uwatemwikwa ukufyalwa mu cipesha amano.
2. (a) “Ukufwaya kwa pe” ukwa kwa Lesa e cinshi ku bantu ba cumfwila? (b) Cinshi Yohane amwene ilyo ali pa cishi ca Patmo?
2 Imilimo ikalamba iingi iya kwa Yehova yasuntinkana no “kufwaya kwa pe” ukwakwe ku kupaala abantunse ba cumfwila ukupitila muli Mesia na mu kuteka kwa Bufumu bwakwe. (Abena Efese 3:8-13, NW) Ubu bufwayo bwatendeke ukulunduluka panono panono ilyo umutumwa Yohane umukoloci asuminishiwe mu cimonwa ukulengela mu muulu pa mwinshi waiswike. Aumfwile ishiwi ngo kulila kwa ntandala lileti: “Nina wise kuno, ndekulanga ifili no kwisabako apo papite fi fintu.” (Ukusokolola 4:1) Ilyo ubuteko bwa Roma bwamutamfishe ku cishi ca Patmo “pa mulandu wa cebo ca kwa Lesa no bunte bwa kwa Yesu,” Yohane apokelele “ukusokolola kwa kwa Yesu Kristu.” Ifyo umutumwa amwene no kumfwa fyasokolwele ifingi pa lwa kufwaya kwa pe ukwa kwa Lesa, ica kuti kwalengele ukubuutushiwa kwa ku mupashi ukubako no kukoselesha kwa pa nshita yalinga ku Bena Kristu bonse aba cine.—Ukusokolola 1:1, 9, 10.
3. Abakalamba 24 abo Yohane amwene mu cimonwa bemininako bani?
3 Muli ulya mwinshi waiswike mu muulu, Yohane amwene abakalamba 24, bekele pa fipuna fya bufumu kabili bafwele ifilongwe nge shamfumu. Bawile ku cinso ca kwa Lesa no kusosa abati: “Mwaliwamina, mwe Shikulwifwe Lesa wesu, ukupokelelo bukata no mucinshi na maka; pantu ni mwe mwalengele ifintu fyonse: kabili mulandu wa kufwaya kwenu fyabeleleko no kulengwa.” (Ukusokolola 4:11) Aba bakalamba bemininako Abena Kristu basubwa bonse ababuushiwa ku fifulo fya pa muulu ifyo Lesa abalaile. Batasha Yehova pa mulandu wa milimo yakwe iikalamba iya kubumba. Ne fwe bene tulapeshiwa amano ilyo twamona “amaka [ya kwa Yehova] aya pe na buLesa bwakwe.” (Abena Roma 1:20) Kabili ilyo twasambilila ifingi pa lwa kwa Yehova, e lyo tumutootela nga nshi pa milimo yakwe iikalamba.
Londololeni Imilimo ya kwa Yehova Iyo Awamina Ukumutashisha!
4, 5. Landeniko ifya kumwenako ifyo Davidi atashisheko Yehova.
4 Kemba wa malumbo Davidi atashishe Lesa pa milimo Yakwe iikalamba. Ku ca kumwenako, Davidi aimbile ati: “Lumbeni Yehova uwaikala mu Sione, bilisheni mu bantu na bantu imilimo yakwe; Mumbelele uluse, mwe Yehova; moneni ukucula kwandi uko ncula ku bampata, mwe bansumbula ukumfumya ku mpongolo sha mfwa, ukuti mu mpongolo sha mwana mwanakashi Sione e mo nondolole ukumutasha konse.” (Amalumbo 9:11, 13, 14) Ilyo Davidi apeele umwana wakwe Solomone plani ye tempele, acindike no kutasha Lesa ati: “Fyenu, mwe Yehova, ubukulu na bumpalume no kuyemba no kupulama na bukatebebe, . . . ubufumu bwenu, mwe Yehova, kabili mwalitumpuka mwabo mutwe kuli bonse! . . . E ico nomba, mwe Lesa wesu, ifwe tulemutootela no kutashe shina lyenu ilyalumbuka.”—1 Imilandu 29:10-13.
5 Amalembo libili libili yatweba ukutasha Lesa, na kuba, yalatucincisha nga nshi ukumutasha nga filya Davidi amutashishe. Mwi buuku lya Amalumbo mwaba amashiwi ayengi aya kutasha Lesa, kabili mupepi na hafu wa ishi nyimbo shaimbilwe na Davidi. Lyonse aletasha no kutootela Yehova. (Amalumbo 69:30) Kabili, ukutula fye na ku kale, inyimbo shapuutwamo isha kwa Davidi na bambi shalimbwa ku kutashishako Yehova.
6. Bushe Amalumbo yapuutwamo yaba shani ayacindama kuli ifwe?
6 Mwandini ibuuku lya Amalumbo lyalicindama kuli bakapepa ba kwa Lesa! Ilyo tulefwaya ukutasha Lesa pa milimo yakwe iikalamba iyo atucitila, tutontonkanya pa mashiwi yasuma ayasangwa mwi buuku lya Amalumbo. Ku ca kumwenako, ilyo twabuuka fye, kuti twafwaya ukulanda amashiwi ayapala aya: “Cisuma ukutootela Yehova, no kulumbe shina lyenu, mwe Wapulamo; ukubilo luse lwenu ulucelo, ne cishinka cenu ubushiku no bushiku, . . . Pantu mwanengo kusamwa, mwe Yehova, ku kubomba kwenu; ku milimo ya minwe yenu e ko ndeawila.” (Amalumbo 92:1-4) Ilyo twacimfya ubwafya bulenga ukuti twilalunduluka lwa ku mupashi, kuti twafwaisha ukulumbulula amashiwi ya kusekelela no kutasha mwi pepo, nga fintu fye na kemba wa malumbo acitile ilyo aimbile ati: “Tuleyeni natuweleshe kuli Yehova, natwikatishe utupundu ku cilibwe icasansuka ce pusukilo lyesu; natwise tusengele icinso cakwe no lwimbo lwa kutootela, mu sha malumbo e mo tuweleshe utupundu kuli wene!”—Amalumbo 95:1, 2.
7. (a) Cinshi mwamona pa lwa nyimbo ishingi isho Abena Kristu bemba? (b) Mulandu nshi umo uwa kufikila bwangu pa kulongana no kuba palya ukufikila kwapwa?
7 Ilingi tulemba isha kutasha Yehova pa kulongana kwa cilonganino, pa kulongana kukalamba, na pa mabungano. Moneni ukuti ubwingi ubwa ishi nyimbo shafuma mu mashiwi ya puutwamo aya mwi buuku lya Amalumbo. Mwandini twaliba aba nsansa ukukwata inyimbo shisuma isha muno nshiku isha kutasha Yehova! Icikankaala cimo ico tubangilila ukufika pa kulongana no kubapo ukufikila kwapwa ca kuti twimbile pamo na bakapepa banensu isha kutasha Yehova Lesa no kupepela pamo.
“Aleluya!”
8. Bushe ishiwi lya kuti “Aleluya,” e kutila shani?
8 Ukutasha Yehova kwasupulwa fye mwi shiwi limo ilya “Aleluya,” ilyafuma kwi shiwi lya ciHebere ilyalola mu kuti “Tasheni Yehova.” Ku ca kumwenako, pa Amalumbo 135:1-3, tusangapo aya mashiwi ayatucincisha ati: “Aleluya! Tasheni ishina lya kwa Yehova; tasheni, mwe babomfi ba kwa Yehova, mwe beminina mu ng’anda ya kwa Yehova, mu mansa sha ng’anda ya kwa Lesa wesu. Tasheni Yehova, pantu Yehova musuma; lumbeni ishina lyakwe, pantu lisuma.”
9. Cinshi citulenga ukutasha Yehova?
9 Ilyo twatontonkanya pa bubumbo bwa kupapusha ubwa kwa Lesa ne milimo yakwe yonse iyo atucitila, ukutasha kwesu ukwa pa mutima kutulenga ukumulumbanya. Ilyo twatontonkanya pa fipesha amano Yehova acitile abantu bakwe ku kale, imitima yesu ilatulenga ukumutasha. Kabili ilyo twaetetula pa malayo ya fikalamba ifyo Yehova akacita, tufwaya inshila sha kumutashishamo no kumutootela.
10, 11. Bushe ukubapo fye kwesu kwine kutulenga shani ukutasha Lesa?
10 Ukubapo kwesu kwine kutulenga ukutasha Yehova. Davidi aimbile ati: “Ndemutootela [mwe Yehova], pa kuti nalengelwe mu musango wa kutiinya kabili uwa kupapa; yapesha amano imilimo yenu. Umutima wandi mwaliwishibishe.” (Amalumbo 139:14) Ca cine, ‘twalengelwe mu musango wa kutiinya’ kabili twakwata ifya bupe fisuma pamo nga ukumona, ukumfwa, no kutontonkanya. Bushe kwena te kuti tuletasha Kalenga wesu mu fyo tucita lyonse? Paulo aletontonkanya pa ca musango yo ilyo alembele ati: “Nga mulelya nalimo mulenwa, nalimo conse ico mulecita, citeni fyonse ku kucindika Lesa.”—1 Abena Korinti 10:31.
11 Nga ca kuti twalitemwa Yehova conse ico tukalacita tukalacite co ku kumucindika. Yesu atile ifunde lya ntanshi ni li: “Uletemwa Sokulu Lesa obe ku mutima obe onse, na ku mweo obe onse, na ku mano yobe yonse, na ku maka yobe yonse.” (Marko 12:30; Amalango 6:5) Ukwabula no kutwishika tufwile ukutemwa Yehova no kumutasha pa kuba Kalenga wesu na Kapeela wa “ca kupeelwa conse icisuma ne ca bupe conse icafikapo.” (Yakobo 1:17; Esaya 51:13; Imilimo 17:28) Mukwai calinga ukuti tucite fyo pantu amaka twakwata aya kupelulula, bumupashi, na maka fye yesu yene, tutile fye imibele yesu yonse e lyo na maka yesu, fyonse fyafuma kuli Yehova. Kanshi aliwamina ukumutemwa no kumutasha pantu e Kabumba wesu.
12. Mumfwa shani pa lwa milimo ikalamba iya kwa Yehova na pa mashiwi yasangwa pa Amalumbo 40:5?
12 Imilimo ikalamba iya kwa Yehova yaba ne fingi ifyo twingamutashishapo no kumutemenwapo! Davidi aimbile ati: “Mwe Yehova Lesa wandi, ifipesha amano ifyo mwacitile fingi, na matontonkanyo yenu ayalola kuli ifwe; takuli uwingapashaniwa kuli imwe! Nga naesho kufilongola napamo ukufisosa, fyalifula, te kuti fipendwe.” (Amalumbo 40:5) Davidi afililwe ukupenda ifipesha amano fyonse ifya kwa Yehova, kabili ne fwe bene te kuti tukumemo. Lelo shi lekeni lyonse tuletasha Lesa lyonse ilyo twatontonkanya nelyo ukumona imilimo yakwe iikalamba.
Imilimo Yasuntinkana no Kufwaya kwa kwa Lesa Ukwa Pe
13. Bushe isubilo lyesu lyasuntinkanishiwa shani ne milimo ikalamba iya kwa Lesa?
13 Isubilo lyesu ilya ku ntanshi lyasuntinkana ne milimo ikalamba kabili iyalinga ukutashishapo Lesa iyo na yo yasuntinkana no kufwaya kwa kwa Lesa ukwa pe. Ilyo abali mu Edene bapondweke, Yehova alandile ukusesema kwabamo isubilo. Pa kupingula insoka, Lesa atile: “Ndebika no bulwani pa kati ka iwe no mwanakashi, kabili pa kati ka bufyashi bobe no bufyashi bwakwe: bwene bwakulakulasa ku mutwe nobe wakulabulasa ku citende.” (Ukutendeka 3:15) Isubilo mu Bufyashi bwalaiwe ubwa mwanakashi lyatwalilile ukuba mu mitima ya bantu ba busumino nangu ni lintu Yehova acitile umulimo ukalamba uwa kubaka Noa no lupwa lwakwe ilyo Ilyeshi lye sonde lyonse lyafumishepo icalo cabipa. (2 Petro 2:5) Amalayo ya kusesema ayalaiwe ku baume ba citetekelo pamo nga Abrahamu na Davidi yapeele ukushilimuka kwalundwako mu fyo Yehova ali no kupwishishisha muli bulya Bufyashi.—Ukutendeka 22:15-18; 2 Samwele 7:12.
14. Ca kumwenako nshi cacilapo pa milimo ikalamba Yehova acitila abantu?
14 Ukulangisha kwacilapo ukwa kwa Yehova ukuti e kacita wa fipesha amano kwali lintu apeele Umwana wakwe uwafyalwa eka, Ubufyashi bwalaiwe, Yesu Kristu, nge lambo lya cilubula pa mulandu wa bantu. (Yohane 3:16; Imilimo 2:29-36) Icilubula e calengele ukuti kube ukuwikishiwa kuli Lesa. (Mateo 20:28; Abena Roma 5:11) Yehova aletele ababalilepo ukuwikishiwa kuli wene mu cilonganino ca Bwina Kristu, icapangilwe pa Pentekoste wa mu 33 C.E. Pa kwafwiwa no mupashi wa mushilo, babilile imbila nsuma ukufika ukutali, ukulanga fintu imfwa no kubuushiwa kwa kwa Yesu fikalenga abantu ba cumfwila ukuipakisha amapaalo ya pe mu kuteka kwa Bufumu bwa kwa Lesa ubwa ku muulu.
15. Bushe Yehova abomba shani mu nshila ya kusungusha pali lelo?
15 Pali lelo, Yehova alibomba mu nshila ya kusungusha ukulonganika Abena Kristu basubwa aba kulekeleshako. Imyela ya bonaushi yalikatwa ku kuleka abashalapo pali ba 144,000, abakateka na Kristu mu muulu bakakakatikwe. (Ukusokolola 7:1-4; 20:6) Lesa ashininkishe ukuti Abena Kristu basubwa balubulwe mu busha bwa ku mupashi ubwa muli “Babele mukalamba,” ubuteko bwa calo ubwa kupepa kwa bufi. (Ukusokolola 17:1-5) Ukulubulwa balubwilwe mu 1919 no kucingilila kwa bulesa uko baimwena ukutule lyo kwalenga abasubwa abashalapo ukucita cinshi? Kwabalenga ukubalika pa kupeela ubunte bwa kupelako ilyo Yehova ashilaonaula ubwikashi bwabipa ubwa kwa Satana mu “bucushi bukalamba” ubuleyangufyanya ukwisa.—Mateo 24:21; Daniele 12:3; Ukusokolola 7:14.
16. Cinshi cilecitika pa mulandu wa mulimo wa kushimikila pa Bufumu uulecitwa mwi sonde lyonse pali lelo?
16 Inte shasubwa isha kwa Yehova baliswangana kabili e baba pa ntanshi muli uyu mulimo wa mwi sonde lyonse uwa kushimikila pa Bufumu. Ici cilengele ukuti impendwa ileingilishiwako iya “mpaanga shimbi” baleba bakapepa ba kwa Yehova. (Yohane 10:16) Tulesekelela pa kuti ishuko lya kutila abafuuka aba pano isonde bailunde kuli ifwe mu kutootela Yehova e ko licili. Abankula ku bwite bwa kuti “iseni” bakapusuka ubucushi bukalamba, kabili bakatwalilila ukutasha Yehova kuli pe na pe.—Ukusokolola 22:17.
Amakana na Makana Balebungana ku Kupepa kwa Cine
17. (a) Bushe Yehova alebomba shani imilimo ikalamba mu kwampana pamo no mulimo wesu uwa kushimikila? (b) Bushe Sekaria 8:23 ilefikilishiwa shani?
17 Ndakai Yehova alebomba imilimo ikalamba kabili iya kumutashishapo iyaampana no mulimo wesu uwa kushimikila. (Marko 13:10) Muli ino myaka, ‘aisula umwinshi ukalamba kabili uwa kubombeshamo.’ (1 Abena Korinti 16:9) Ici calenga ukuti imbila nsuma ibilwe monse mu fifulo fya kushimikilamo ifikalamba umo abalwani ba cine balecilikila uyu mulimo. Abengi abali kale mu mfifi ya ku mupashi nomba baleyankula ku bwite bwa kupepa Yehova. Balefikilisha amashiwi ya kusesema ayatila: “E fyo Yehova wa milalo atila: Mu nshiku isho e mo abantu ikumi aba mu nko sha ndimi shonse bakekata ku cisempe ca muYuda umo, no kutila, Tuleya na imwe, pantu natuumfwo kuti muli na Lesa.” (Sekaria 8:23) Aba ‘bantu abali na Lesa’ baYuda ba ku mupashi, Abena Kristu basubwa abashalapo pali ndakai. Apo ikumi (10) kuti lyaimininako ukupwililila kwa cintu ca pano nse, “abantu ikumi” bemininako “ibumba likalamba,” ilyaletwa ku kubishanya pamo na “Israele wa kwa Lesa,” kabili aya mabumba yabili yapanga “umukuni umo.” (Ukusokolola 7:9, 10; Abena Galatia 6:16) Mwandini cilaleta insansa ukumona bakapepa ba kwa Yehova Lesa abengi nga nshi balebombela pamo umulimo washila!
18, 19. Bushininkisho nshi bwabako ubwa kuti Yehova alepaala umulimo wa kushimikila?
18 Tuli abacankwa pa kutila abantu abengi nga nshi balepokelela ukupepa kwa cine mu fyalo ifyaandatilwe no kupepa kwa bufi ifyalemoneka kwati abantu babamo tabakatale abakutika ku mbila nsuma. Moneni muli Yearbook of Jehovah’s Witnesses uwa nomba line, no kulolesha pa fyalo umuli bakasabankanya ba Bufumu ukucila pali 100,000 ukufika mupepi na 1,000,000 abaletuma amalipoti. Ubu, bushininkisho bwine bwine ubwa kuti umulimo wa kushimikila pa Bufumu ulepaalwa na Yehova.—Amapinda 10:22.
19 Apo tuli bantu ba kwa Yehova, tulatasha no kutootela Shifwe wa ku muulu pa kutupeela ubumi bwine bwine, ubwa cine cine na pa kutupeela umulimo tumubombela uwawama e lyo ne subilo lyashininkishiwa ilya nshita ya ku ntanshi. Tulelolela ukumona ukufikilishiwa kwa malayo ya kwa Lesa yonse kabili tupampamine pa ‘kuibakila mu kutemwa kwa kwa Lesa, no kulolelo mweo wa muyayaya.’ (Yuda 20, 21) Tuli ne nsansa ishingi ukumona ukuti ibumba likalamba abalelumba Lesa nomba bafikile mupepi na mamilioni 6! Pa mulandu ne paalo lya kwa Yehova ilyo baimwena, abashalapo pa basubwa e lyo ne mpanga shimbi baliteyanishiwa mu filonganino ififikile mupepi na 91,000 mu fyalo 235. Ifwe bonse tulaliishiwa bwino ifya ku mupashi pa mulandu wa kubombesha kwa “musha wa cishinka kabili uwashilimuka.” (Mateo 24:45) Ukuteyanya kutungululwa na Lesa ukuya kulelundulukilako ukwakwata bakecema baba no kutemwa kuleangalila umulimo wa Bufumu mu maofeshi yanono ayali 110 aya Nte sha kwa Yehova. Tuletasha nga nshi pa kuti Yehova alenga imitima ya bantu bakwe ‘ukumucindika ku fyuma fyabo.’ (Amapinda 3:9, 10) Ici calenga ukuti umulimo wesu uwa kushimikila mwi sonde lyonse utwalilile, ukukwata bamashini ba kupulintilako, amayanda ya Bethel na ya bamishonari, Amayanda ya Bufumu, ne Fiyanda fya Kulonganinamo ifilekuulwa ukulingana no kukabila.
20. Ni shani fintu ukutontonkanya pa milimo ikalamba kabili iyalinga ukutashishapo Yehova kulingile ukutukuma?
20 Te kuti tulumbule ifikalamba fyonse ne milimo yalinga ukulumbanishishapo Shifwe wa ku muulu. Lelo bushe kwena onse uwaba no mutima uwalungama kuti akaana ukuilunda kuli cinkupiti wa bakalumbanya ba kwa Yehova? Awe iyo! Kanshi, shi bonse abatemwa Lesa babilikishe ne nsansa abati: “Aleluya! Tasheni Yehova ukufuma mu myulu; umwatumpuka, mutasheni: mutasheni, mwe bamalaika bakwe bonse . . . , mwe balumendo na bakashana kumo, mwe baume bakote na baice. Lekeni fitashe ishina lya kwa Yehova; pantu ishina lyakwe lyeka lyalisansuka, bukatebebe bwakwe bwapula pano isonde na mu muulu.” (Amalumbo 148:1, 2, 12, 13) Ca cine, ukufuma lelo no kuya umuyayaya, natutashe Yehova pa milimo yakwe iikalamba!
Kuti Mwayasuka Shani?
• Milimo nshi imo iya kwa Yehova iya kumutashishapo?
• Cinshi cimulenga ukufwaya ukutasha Yehova?
• Isubilo lyesu lyasuntinkana shani ne milimo ikalamba iya kwa Lesa?
• Bushe Yehova alebomba shani imilimo yalinga ukumutashishapo mu kwampana pamo no mulimo wa kushimikila Ubufumu?
[Icikope pe bula 10]
Bushe mulaisanshamo no mutima onse mu kwimba isha kutasha Yehova?
[Ifikope pe bula 13]
Tulasekelela pa kuti ishuko lya kutila abafuuka bailunde kuli ifwe mu kutootela Yehova e ko licili