Ilyashi lya Bakabilisha ba Bufumu

Insala Yakwe iya ku Mupashi Yasukile Yapwa

CYPRUS cishi icabela pa kati ka kapinda ka ku kuso na kabanga ka Bemba wa Mediterranean. Icalo ca Cyprus icalembwa mu Baibolo calishibikwe nga nshi pa mulandu wa mukuba ne mbao shishaiwamina ifyalesangwa mulya. Paulo na Barnaba babilile mbila nsuma iya Bufumu kulya pa bulendo bwabo ubwa bumishonari ubwa kubalilapo. (Imilimo 13:4-12) Pali lelo, imbila nsuma icili ileyafwa abena Cyprus abengi. Umo pa bantu bayafwiwa ni Lucas, umwaume uuli mu myaka ya ba 40. Ashimika ukuti:

“Nafyalilwe mu ng’anda ya bana 7, pe farmu lya ng’ombe. Ukutula fye ku bwaice sana, nalefwaisha ukubelenga. Icitabo natemwishishe ni Baibolo wakusendela mwi tumba uwa Amalembo ya Bwina Kristu ya ciGriki. Ilyo nali ne myaka 10, ine na banandi twapangile akalibumba ka kusambilila Baibolo. Nangu cibe fyo, aka kalibumba takakokwele pantu abakalamba ba mu mushi bamo baletwita ati bacipondoka.

“Mu kuya kwa nshita, ilyo nali pa sukulu mu United States, nakumenye abantu abengi abalepepa ukwalekanalekana. Ico calengele ntendeke na kabili ukufwaisha ukupepa Lesa. Nalepoosa inshita ikalamba mu laibrare wa pa yuniversiti ukubelenga sana pa mipepele yalekenalekana. Kabili naleya fye na ku macalici ayengi, lelo te mulandu no kubombesha kwandi, nali ncili ne nsala ya ku mupashi.

“Ilyo napwishishe amasambililo, nabwelele ku Cyprus no kutendeka incito mu cipatala umo nali umukalamba mu ciputulwa bapimina amalwele. Umukoloci umo uwe shina lya Antonis, uuli ni Nte ya kwa Yehova, alentandalila ku ncito. Nangu cibe fyo, aba mwi calici lya Greek Orthodox kanshi balemumona ilyo aleisa.

“Bwangu bwangu, uwasoma ifya mipepele aishilentandalila no kundesha ukulanda ne Nte sha kwa Yehova. Apo ukutula ku bwaice nasambilishiwe ukuti abalesambilisha icine ba kwi calici lya Greek Orthodox Church, nalyumfwilile no kuleka ukubishanya na Antonis kabili natendeke ukulanshanya Baibolo no yu muntu wasoma ifya mipepele. Natandalile fye ne fifulo ifingi umwikala abashimbe baume aba fya mapepo mu Cyprus. Naile fye na ku kapinda ka ku kuso aka Greece no kufika ku Lupili lwa Athos, ulumonwa ngo lupili ulutakatifu ku Bena Kristu bapepa kwi calici lya Orthodox Church. Nalyo line, ifipusho fyandi ifya mu Baibolo tafyayaswikwe.

“E lyo napepele kuli Lesa ukungafwa ukusanga icine. Bwangu bwangu pa numa ya kupepa, Antonis alintandalile na kabili ku ncito, kabili natontonkenye ukuti uku kwali kwasukwa kwe pepo lyandi. E co nalekele ukutandalila ulya muntu asomene ifya mipepele no kutampa ukusambilila Baibolo na Antonis. Natwalilile ukulunduluka, kabili mu October 1997, nalangile ukuipeela kwandi kuli Yehova pa kubatishiwa mu menshi.

“Umukashi wandi na bana besu abanakashi babili abakulilepo pali bonse, pali ilya nshita umo aali ne myaka 14 e lyo umbi imyaka 10, pa kubala tabatemenwe. Lelo pa mulandu wa myendele yandi iisuma, umukashi wandi apingwilepo ukusangwa ku kulongana ku Ng’anda ya Bufumu. Alipeshiwe nga nshi amano ku cikuuku ca Nte sha kwa Yehova na pa fyo bamusansamukile nga nshi. Cimo ico atemenwe sana ni co balebomfya Baibolo. Pali uyu mulandu, umukashi wandi na balya bana bandi babili abakashana basumine ukusambilila Baibolo ne Nte sha kwa Yehova. Elenganyeni fintu natemenwe ilyo bonse batatu babatishiwe pe Bungano lya Citungu ilya “Icebo ca Kusesema Ica kwa Lesa” ilyaliko mu 1999!

“Cine cine, nasukile nasanga icine ico nalesapika. Pali nomba aba mu ng’anda yandi bonse, ukusanshako umukashi wandi na bana bane, balikatana mu kupepa kwasanguluka ukwa kwa Yehova.”