Mwiminine Abapwililila Kabili Abashininkisha

Ukwafwa Abacaice no Kufunda Ukwa pa Nshita Isuma

EPAFRA ali Mwina Kristu wa mu mwanda wa myaka uwa kubalilapo uwaile ku Roma. Lelo, pali icintu icisuma icamulengele ukulatontonkanya pa fyalecitika ku Kolose, umusumba wa mu Asia Minor. Ashimikile imbila nsuma kulya kabili afwile alyafwile abena Kolose bamo ukuba abasambi ba kwa Yesu Kristu. (Abena Kolose 1:7) Epafra alyangilwe sana abasumina banankwe abali mu Kolose, pantu umutumwa Paulo alembele ukufuma ku Roma ukuti: “Amucelela Epafra, . . . uulepilikitila imwe pe mu kupepa, ukuti mwiminine abapwililila kabili abashininkisha muli conse ico Lesa afwaya.”—Abena Kolose 4:12, NW.

Nangu fye ni lelo, bashibo na banyinabo ba Bwina Kristu balapepa no mukosha ukuti abana babo bakose lwa ku mupashi. Aba bafyashi balabombesha ukusambilisha abana babo ukutemwa Lesa ne mitima yabo pa kuti babe abashangila mu citetekelo.

Abena Kristu bacaice abengi balalomba ukwafwa pa fyo bengacita na mafya bakwata ku sukulu na kumbi. Umukashana umo uwa myaka 15 atile: “Amafya yesu yalebipilako fye. Ifilecitika lelo filatiinya. Tulekabila ukwafwiwa!” Bushe ifyo abacaice ba musango yu bafwaya ne fyo abafyashi ba bukapepa bapepela fyalicitika? Ee! Ukufunda kwa mu Baibolo kwalipeelwa ukupitila mu “musha wa cishinka kabili uwashilimuka.” (Mateo 24:45) Cino cipande calalanda pa mpapulo shimo ishayafwa abacaice abengi “ukwiminina abapwililila kabili abashininkisha.” Natulande pa mpapulo shimo shimo.

‘Moneni Inte Shipya 15,000!’

Mu August 1941, abantu abali 115,000 balongene mu St. Louis, Missouri, ku United States of America, pa kulongana kukalamba ukwa Nte sha kwa Yehova ukushabalile akubako pali ilya nshita. Pa bushiku bwa kulekelesha ubwa uku kulongana—ubwaleitwa “Ubushiku bwa Bana”—kwali abana nalimo 15,000 abaikele pa ntanshi ya cisebele balekutikisha ilyo Joseph F. Rutherford alandile ilyashi lyaleti “Abana ba Mfumu.” Ilyo alepwisha ilyashi lyakwe, Rutherford uwali ne myaka 71, alandile nga shibo ukuti:

“Mwe bana bonse . . . mwe basumina . . . ukumfwila Lesa ne Mfumu yakwe, shi iminineni.” Abana baimine pamo. Munyinefwe Rutherford atile: “Moneni, Inte shipya isha Bufumu ukucila pali 15,000!” Kwali ukutoota kukalamba. Kalanda lyene atile: “Bonse mwe bakabombesha ukwebako bambi pa bufumu bwa kwa Lesa . . . , soseni ati Ee.” Abana bayaswike no kupunda ati “Ee!” Lyene alangile icitabo cipya icaleti Children, kabili abantu batootele nga nshi ilyo bacimwene.

Pa numa ya lyashi lyakwe ilya kucincimusha, abaice abengi abatanteme baile ku cisebele uko Munyinefwe Rutherford abapeele ica bupe, e kuti kope wa citabo cipya. Ici calecitika calengele ibumba ukuponye filamba fya nsansa. Umo uwaliko atile: “Kamo fye uushakwata icililishi e ushingankulako ukumona abaice [balelanga] ukucetekela kwine kwine muli Lesa, Yehova.”

Pali kulya kulongana kwa lulumbi, abaice 1,300 balibatishiwe ku kulanga ukuipeela kwabo kuli Yehova. Abengi na lelo bacili abashangila kabili aba citetekelo. Balafwilisha ifilonganino babamo, ukubomba umulimo wa kuitemenwa pa Bethel, nelyo ukubomba bumishonari mu fyalo fimbi. Cine cine, “Ubushiku bwa Bana” ne citabo ca Children fyalengele abacaice abengi ukutwalilila abashangila!

“Fimoneka Kwati Fisa Fye pa Nshita Isuma”

Mu myaka ya ba 1970, Inte sha kwa Yehova shasabankenye ifitabo fitatu ifyafikile pa mitima ya bacaice abengi. Ifi fyali fitabo fya Ukukutika kuli Kasambilisha Mukalamba, Ubwaice Bobe—Ukukwatilamo Ifyawamisha, na Icitabo Candi ca Malyashi ya mu Baibolo. Mu 1982, ifipande fyaleti “Abacaice Bepusha Ukuti . . . ” fyatendeke ukufuma muli magazini wa Loleni! Ifi fipande fyalenga abacaice na bakalamba bafumaluka ukwankulako bwino sana. Uwacaice wa myaka 14 atile: “Cila bushiku ndatasha Lesa pa kulenga ifi fipande filesabankanishiwa.” Uwa myaka 13 atile: “Nalitemwa ifi fipande, fimoneka kwati fisa fye pa nshita isuma.” Abafyashi na baeluda basontwa aba Bwina Kristu balasumina ukuti ifi fipande fisa pa nshita isuma kabili filanonsha.

Ilyo cali umwaka wa 1989, ifipande nalimo 200 ifya “Ifipusho Abacaice Bepusha . . . ” ninshi fyalifuma muli Loleni! Pe Bungano lya Citungu ilya “Ukuipeelesha kwa Bulesa,” icitabo ca Ifipusho Abacaice Bepusha—Ifyasuko Fibomba califumine. Bushe calyafwa abaice ukuba ne citetekelo cashangila? Abacaice batatu balembele ukuti: “Ici citabo cibombelo cawamisha kuli ifwe ku kutwafwa ukwishiba amafya yesu no kwishiba ifya kucita na yene. Tuletasha pa kwangwa ku busuma bwesu.” Abaice abengi mwi sonde lyonse balasuminisha ici.

“Catulengele Ukwikuta lwa ku Mupashi”

Mu 1999, Inte sha kwa Yehova shasabankenye umusango na umbi uwa kufunda kwa pa nshita isuma ku bacaice muli vidio wa Young People Ask—How Can I Make Real Friends? Alengele abantu ukubomba bwino sana. Uwacaice wa myaka 14 atile: “Uyu vidio alimfikile nga nshi pa mutima.” Umwanakashi uli mufyashi umushimbe atile: “Uyu vidio akaba pa fintu fya ku mupashi twakulabomfya lyonse.” Kabili umukashana umo atile: “Cilasansamusha ukwishiba ukuti Cibusa wesu, Yehova, alitemwa abacaice bonse ababa mu kuteyanya kwakwe ukwa mwi sonde lyonse kabili alabasakamana.”

Cinshi uyu vidio acita? Abacaice batila: “Alingafwa ukusala bwino aba kwangala nabo, ukwishibana na bengi mu cilonganino, no kulenga Yehova ukuba cibusa wandi.” “Alingafwa ukushipikisha umupatikisha wa fibusa fyandi.” “Anenga ukushangila mu kupingulapo kwandi ukwa kubombela Yehova ukufika apo ningapesha.” Kabili abaupana balembele ati: “Tulemutasha nga nshi ukufuma pa nshi ya mitima yesu pa kutupekanishisha ici ‘ca kulya.’ Catulengele ukwikuta lwa ku mupashi.”

Apo “umusha wa cishinka kabili uwashilimuka” aba uwa cishinka mu mulimo apeelwa, alipeela ifya kulya fya ku mupashi kuli bonse abengafipokelela. Kabili tulasansamuka ukumona ifyo ukufunda kwa mu Malembo kuleafwa abaice lelo ‘ukwiminina abashangila kabili abashininkisha muli conse ico Lesa afwaya’!