Ilyashi lya Bakabilisha ba Bufumu

“Mwatuma Inambala Imbi”

MU JOHANNESBURG, ku South Africa, Leslie na Caroline baleshimikila ubunte bwa pali foni mu ncende mwikala abantu bapoka penshoni umo tabasuminisha sana abantu ukwingila. Te bengi balesanga pa mayanda kabili abengi tabaleyangwako ku bukombe bwabo ubwa Bwina Kristu, e co Caroline alikoseleshiwe ilyo umwanakashi umo ayangilweko.

Caroline aipwishe ukuti: “Bushe ni mwe bamuka B—?”

Umuntu we shiwi lya bucibusa atile: “Iyo mukwai, nine muka G—. Mwatuma inambala imbi.”

Pa kumfwa ukuti uyu muntu alelanda ne nsansa, Caroline atile: “Kwena, lekeni nondolole ifyo nacilafwaya ukweba bamuka B—.” Lyene atendeke ukulanda pa mapaalo Ubufumu bwa kwa Lesa ubuleisa bukaleta. Pa numa ya kulanshanya ifyo bengabatwalila broshuwa wa Cinshi Cintu Lesa Afwaya Kuli Ifwe?, bamuka G— baipwishe ukuti: “Na kuba mupepa kwi?”

Caroline ayaswike ukuti, “Tuli Nte sha kwa Yehova.”

“Cabipa, kanshi e ko mupepa! Nshilefwaya ukumumona.”

Caroline atile: “Lelo bamuka G—, pa maminiti yapita 20, ninanshanya na imwe pa lwe subilo lyawamisha, ukulangilila muli Baibolo ifyo Ubufumu bwa kwa Lesa buli no kucitila abantunse nomba line fye. Mwacitemwa icine cine ukumfwa ifi fyebo kabili mwacilafwaya ukwishibilapo na fimbi. Finshi mwaishiba pa Nte sha kwa Yehova? Nga ca kuti namulwala bushe kuti mwaya kuli makanika? Bushe te kuti munsuminishe ukulanshanya na imwe pa lwa fyo Inte sha kwa Yehova basuminamo?”

Pa numa ya kwikala tondolo, bamuka G—bayaswike ukuti: “Ndemona mwalungika. Mukese. Lelo, mwishibe ukuti tamwakangalule!”

Caroline atile: “Bamuka G—, te kuti mwalule nangu nalefwaya. Yehova fye e wingacite co.”

Balilanshenye bwino ilyo batwele broshuwa, kabili bamuka G—(baBetty) balisumine ukubatandalila na kabili. Ilyo Caroline abwelele, baBetty batile baebele abanakashi bekala na bo pa tebulo mu muputule wa kuliilamo ukuti nalelanshanya ne Nte sha kwa Yehova. Abanabo baipwishe abati, “Kuti mwacita shani ica musango yu?” Kabili baimishe amaboko ku kulanga ukuti tabatemenwe. “Abo bantu tabasumina na muli Yesu!”

Ilyo line Caroline acinkwileko baBetty ulwa cishinka cikalamba ica fyo balanshenye umuku wafumineko pa lwa Bufumu bwa kwa Lesa.

Caroline aipwishe ukuti, “Nani akaba Imfumu?”

BaBetty bayaswike ukuti “ni Yesu.”

Caroline atile “ni fyo fine.” Lyene atendeke ukulondolola ukuti Inte sha kwa Yehova balisumina ukuti Yesu Mwana wa kwa Lesa, lelo tabalingana na Lesa ukuba umo pali Balesa Batatu.—Marko 13:32; Luka 22:42; Yohane 14:28.

Pa numa ya kubwelelako imiku iingi, caishibikwe ukuti nangu ca kuti balikwete isubilo, kabili bali aba nsansa, baBetty balelwalilila. Na kuba, balilwele kansa kabili baletiina ukufwa. Batile, “Kanshi nga naishibe ifi fintu kale nga nali ne citetekelo nge cobe.” Caroline alibasansamwishe ukupitila mu kubalanga amalembo ayalondolola imfwa ukuti yaba ngo tulo utukalamba umo umo engabuushiwa. (Yohane 11:11, 25) Ici cakoseleshe nga nshi baBetty, abo nomba batungululwa isambililo lya Baibolo ilya lyonse. Ukulwalilila kwabo ukukoselako e kubalesha ukusangwa ku kulongana pa Ng’anda ya Bufumu.

Caroline asosa ukuti: “Nalimona ukuti bamalaika baletungulula uyu mulimo. Kuli baBetty te ko nali no kutuma, kabili tontonkanyeni, bali ne myaka 89!”—Ukusokolola 14:6.