Ifipusho Ukufuma ku Babelenga
Bushe ca cine filya bamo balanda ati uluse lwa kwa Yehova lulanashako ubulungi bwakwe?
Kwena mu fyalo fimo e fyo balanda, lelo te cisuma ukulanda ifi pantu cimo no kuti uluse lwa kwa Yehova lulacilikila ubulungi bwakwe, no kulenga camoneka kwati lwalicila imibele yakwe iyakaluka iya bulungi. Te fyo caba.
Ishiwi lya ciHebere ilyapilibulwa ati “ubulungi” kuti na kabili lyapilibulwa ati “ubupingushi.” Ubulungi bwalipalana sana no bulungami. Lelo, ubulungi ilingi line bubako ilyo ifunde lyatobwa. Kumfwa ku bulungami bwena te sana. Ca cine ukuti Yehova kuti abomfya ubulungi ku kukanda abalufyanya, lelo kuti na kabili abomfya ubulungi ku kupususha abalingile ukupusuka. (Ukutendeka 18:20-32; Esaya 56:1; Malaki 4:2) E co, tatufwile ukumona ubulungi bwa kwa Yehova kwati bwalikaluka nelyo ukutila bufwile ukunashiwako.
Ishiwi lya ciHebere ilyapilibulwa ati “uluse” kuti lyapilibula no kucincintila ubupingushi. Kabili kuti lyapilibula ukumfwila abantu inkumbu no kubelululako.—Amalango 10:18; Luka 10:29-37.
Yehova ni Lesa wa bulungi no luse. (Ukufuma 34:6, 7; Amalango 32:4; Amalumbo 145:9) Ifi fibili, ubulungi bwa kwa Lesa no luse lwakwe, fyaliba fye bwino kabili fibombela pamo. (Amalumbo 116:5; Hosea 2:19) Iyi mibele ibili yalilingana bwino kabili ilasailishanya. Kanshi, nga twatila uluse lwa kwa Yehova lulanashako ubulungi bwakwe, tufwile na kabili ukusosa ati ubulungi bwa kwa Lesa bulanashako uluse lwakwe.
Esaya aseseme ati: “E ico Yehova alinda ku kumusenamina, kabili ico asansabala ni ku kumucitile nkumbu; pantu Yehova ni Lesa wa bupingushi [“bulungi,” The New English Bible]; balishuka bonse abamupembela.” (Esaya 30:18) Esaya pano alanga ukuti ubulungi bwa kwa Yehova e bulenga ukuti pabe uluse, ico tacipilibula ukuti uluse lulanashako nelyo ukucilikila ubulungi bwakwe. Yehova alomfwa uluse pantu wa bulungi kabili pantu wa kutemwa.
Ca cine ico Yakobo uwalembeleko Baibolo alembele ati: “Uluse lwanga pa bupingushi.” (Yakobo 2:13b) Lelo, pano Yakobo talelanda pali Yehova lelo alelanda pa Bena Kristu abomfwila uluse—ku ca kumwenako, abalecula na bapiina. (Yakobo 1:27; 2:1-9) Ilyo aba bantu ba luse balepingulwa, Yehova alolesha na pa mibele yabo no kubalekelela pa mulandu we lambo lya Mwana wakwe. Kanshi, uluse lwabo lwanga pa bupingushi bwabipa ubo bali no kupingulwa.—Amapinda 14:21; Mateo 5:7; 6:12; 7:2.
Kanshi, tacalinga ukusosa ati uluse lwa kwa Yehova lulanashako ubupingushi bwakwe. Kuli Yehova iyi mibele ibili yalilingana bwino sana. Iyi mibele tayapusana kabili yalingana fye ne mibele imbi iya kwa Yehova pamo nga ukutemwa na mano.