Baibolo Kuti Yawamya Icupo Cenu
ABANTU bamo nga baumfwa ati icupo, balasangalala nga nshi. Bambi cilabakalipa. Umukashi umo ailishenye ati: “Mu mutima ng’umfwa kwati twalilekana. Ndayumfwa uwalekeleshiwa kabili uwatalalilwa lyonse.”
Cinshi cilenga abantu babili abalapile ukutemwana no kuteesa umo no munankwe ukuleka ukulanga icitemwiko? Cimo icilenga kukanasambilila pa fyaba icupo. Kalemba wa fya ku cipatala atile: “Twingila mu cupo ukwabula ukufundwa.”
Ukufwailisha kwacitilwe na ba National Marriage Project aba pa Rutgers University mu New Jersey, U.S.A. kulangilila ukuti banono abaishiba bwino bwino ifyo icupo caba. Abaletungulula uku kufwailisha balembele ati: “Muli uku kufwailisha casangilwe ukuti abengi bakulila mu ndupwa ishishakwata insansa nelyo ishaba na bafyashi balekana. Ico baishiba bwino, cupo cishawama, lelo tabaishiba ifyo icupo cisuma caba. Bamo kuti balondolola icupo cisuma ati ‘cintu capusana ne cupo ca bafyashi bandi.’”
Bushe Abena Kristu tabakwata mafya mu fyupo fyabo? Balakwata. Na kuba, Abena Kristu ba mu kubangilila balekabila ukufunda kwa mu kulungatika pa kuti baleke ‘ukufwaya ukukakulwako’ ku fyupo fyabo. (1 Abena Korinti 7:27) E ico, icupo fye conse umuba bantu babili abashapwililika cikakwata amafya, lelo twalikwata ubwafwilisho. Abalume na bakashi kuti bawamya ifyupo fyabo nga balekonka ifishinte fya mu Baibolo.
Ca cine, Baibolo te citabo cifunda pa cupo ceka ceka. Lelo apo calipuutwamo na Katendeka wa cupo kuti twaenekela ifishinte fyabamo ukuba ifya kwafwa. Yehova Lesa alandiile muli kasesema Esaya ati: “Ine ndi Yehova Lesa obe, uukusambilisho kuti ucenjele, uukwensha mu nshila iyo ufwile ukuyamo. Iye, nga wapeepeka ku mafunde yandi! lyene umutende obe nga waba ngo mumana, no bulungami bobe nga mabimbi ya bemba.”—Esaya 48:17, 18.
Bushe ukutemwana mwali na ko kale kwile kulepwa? Bushe muleyumfwa ukuti mwaba mu cupo umushaba kutemwa? Umukashi umo uwaupwa pa myaka 26 atile: “Ukukalipwa kwisa ne cupo ca musango yu te kuti kulondololwe. Kwa mutatakuya.” Ukucila ukusumina fye ukuti icupo cenu tacawama, cinshi mushingacitilapo cimo? Icipande cikonkelepo calalanga abalume na bakashi ifyo ifishinte fya mu Baibolo fingafwa icupo cabo mu nshila imo—ne yo nshila kukakililwako.