Watchtower LAIBRARE YA PA INTANETI
Watchtower
LAIBRARE YA PA INTANETI
Cibemba
  • BAIBOLO
  • IMPAPULO
  • UKULONGANA
  • w05 4/1 amabu. 13-19
  • Mwe Bafyashi, Cingilileni Icikwatwa Cenu Ica Mutengo

Vidio mulefwaya tamuli

Mukwai yafilwa ukutambika

  • Mwe Bafyashi, Cingilileni Icikwatwa Cenu Ica Mutengo
  • The Ulupungu lwa kwa Kalinda—2005
  • Utumitwe utunono
  • Ifipalileko
  • Umulandu Abafyashi Balekabila Ukwafwa kwa kwa Lesa Shino Nshiku
  • Ukufunda Ukwingalenga Umwana Ukuba na Mano
  • Ukubafunda pa Mulandu wa Kubatemwa
  • Mu Kufunda Abana, Mulafuma Ifisuma
  • Amasambililo Yacindama Muno Nshiku
  • Inshita Yenu na Maka, Tafyakaye fye mu Menshi
  • Kansheni Umwana Wenu Ukufuma ku Bwaice
    Icaba Inkaama ku Nsansa sha Lupwa
  • Ifya Kucingilila Abana Benu
    Loleni!—2008
  • Ifyo Abana Bakabila Ku Bafyashi
    Sambilila Kuli Kasambilisha Mukalamba
  • Abana—Cikwatwa ca Mutengo
    The Ulupungu lwa kwa Kalinda—2005
Moneni na Fimbi
The Ulupungu lwa kwa Kalinda—2005
w05 4/1 amabu. 13-19

Mwe Bafyashi, Cingilileni Icikwatwa Cenu Ica Mutengo

“Amano yalacingilila . . . yalenga cibinda wa yako ukuba no mweo.”—Lukala Milandu 7:12, Nw.

1. Cinshi abafyashi bengamwena abana ukuti bupe?

ABAFYASHI balaleta umuntu pano isonde, uwapalana na bo icata ne mibele. Baibolo itila abana “cikwatwa cafuma kuli Yehova.” (Amalumbo 127:3) Apo Yehova e Kapeela wa Bumi, kanshi aseekesha fye abafyashi icikwatwa cakwe. (Amalumbo 36:9) Mwe bafyashi, bushe mumfwa shani pali ubu bupe bwa mutengo ubwafuma kuli Lesa?

2. Bushe Manoa acitile shani ilyo aumfwile ukuti akakwata umwana?

2 Ukwabula no kutwishika, umuntu afwile ukutasha no kucindika ubupe bwa musango yo. Imyaka ukucila 3,000 iyapita, ilyo umukashi wa kwa Manoa umwina Israele aebelwe ukuti ali no kukwata umwana, Manoa alicindike nga nshi ubo bupe. Ilyo aumfwile fye ilyo lyashi lisuma, apepele ukuti: “Mwe Shikulu, umuntu wa kwa Lesa uo mwatumine, shi lekeni ese kabili kuli ifwe, no kutulange fya kucita ku mwana uukafyalwa.” (Abapingushi 13:8) Mwe bafyashi, cinshi mwingasambilila kuli Manoa?

Umulandu Abafyashi Balekabila Ukwafwa kwa kwa Lesa Shino Nshiku

3. Mulandu nshi shino nshiku tulekabila sana Lesa ukutwafwa ukukusha abana?

3 Shino nshiku, ukucila imyaka yonse iya kale, abafyashi balekabila ukwafwa kwa kwa Yehova pa kukusha abana. Mulandu nshi? Pantu Satana Kaseebanya na bamalaika bakwe balipooswa pano isonde. Baibolo isoko kuti: “Kalanda kwi sonde na kuli bemba, pantu Kaseebanya naikila pali imwe, ali ne cipyu cikalamba, pa kwishiba ukuti ali ne nshita inono.” (Ukusokolola 12:7-9, 12) Baibolo na kabili itila Satana, “Endauka nge nkalamo iilebuluma, iilefwaya untu ingalya.” (1 Petro 5:8) Inkalamo yatemwa ukushukila inama iishikwete maka, ilingi line yatemwa ukwikata utwana. Kanshi, ca mano ukuti Abena Kristu abakwata abana bacetekele muli Yehova ukuti abalange ifya kucingilila abana babo. Bushe mulebombesha ukucingilila abana benu?

4. (a) Abafyashi nga baishiba ukuti nakwisa inkalamo, kuti bacita shani? (b) Cinshi abana bakabila pa kuti bacingililwe?

4 Nga mwaumfwa ukuti kuli inkalamo ku ncende mwikalila, kuti mwabikako sana amano ku kucingilila abana benu. Satana na o ciswango. Afwaya ukonaula abantu ba kwa Lesa pa kuti Yehova abapate. (Yobo 2:1-7; 1 Yohane 5:19) Abana balyanguka ukubepwa. Pa kuti beikatwa ku fiteyo fya kwa Kaseebanya, bafwile ukwishiba Yehova no kuba ne cumfwila kuli wene. Bafwile baishiba ico Baibolo isosa. Yesu atile: “Awe ubu e bumi bwa muyayaya, ukuti baleishiba imwe, mwe Lesa wa cine mweka, no yo mwatumine, Yesu Kristu.” (Yohane 17:3) Na kabili, abana balakabila amano, e kutila amaka ya kumfwa no kucita ifyo balefundwa. “Amano yalenga cibinda wa yako ukuba no mweo,” kanshi mwe bafyashi mufwile ukufunda abana icine ca mu Baibolo mu musango wa kuti cabafika pa mutima. (Lukala Milandu 7:12) Kuti mwabafunda shani?

5. (a) Bushe umwana kuti asambilishiwa shani amano ya kucita ifyo alefundwa? (b) Bushe Amapinda yatila amano yacindama shani?

5 Kuti mwakumanisha ukubelengela abana benu Icebo ca kwa Lesa, kabili mufwile ukubabelengela. Lelo ukusambilisha abana ukutemwa Yehova no kumumfwila takupelela fye pa kubelenga Baibolo kuli bena, bafwile no kumfwa umulolele ifyo balesambilila. Natulangilile: Kuti mwafunda umwana wenu ukutila pa kuciluka umusebo kano wabala walolesha uku no ku. Lelo, abana bamo tabacite co. Mulandu nshi? Nakalimo ni co abafyashi tabalondolwela bwino bwino umwana icingacitika nga apunkwa na motoka, kabili tabalondolwela umwana mu musango wa kuti aumfwikisha bwino bwino icilelandwapo. Tabalondolola mu musango uwingafumyapo “ubupumbu” ubwingalenga umwana ukupunkwa. Ukusambilisha umwana ukucita ifyo alefundwa kulakabila inshita no kutekanya nga nshi. Lelo amano ya kucita ico umwana alefundwa yalicindama nga nshi! Baibolo itila: “Inshila sha yako ni nshila sha kusekelela, na bakumba ba yako bonse mutende; yene muti wa mweo ku baikatako, na bakonenako balishuka.”—Amapinda 3:13-18; 22:15.

Ukufunda Ukwingalenga Umwana Ukuba na Mano

6. (a) Cinshi ilingi line abana bacitila ifyalubana? (b) Ni nkondo nshi abafyashi bafwile ukulwisha?

6 Ilingi line icilenga abana ukulufyanya te kutila tabeshiba icisuma, lelo mulandu wa kuti tabeshiba bwino bwino umulolele ico bafundwa, tacibafika pa mutima. Kaseebanya aba pa nkondo ya kufwaya ukonaula imitima ya bana. Afwaya cayanguka kuli bena ukuponena mu mibele yabipa iya cino calo. Na kabili, afwaya ukushukila ukunaka kwabo ukwa kulemenena ku lubembu pa kuti balecita ifyabipa. (Ukutendeka 8:21; Amalumbo 51:5) Abafyashi bafwile ukwishiba ukutila ni nkondo pa kuti fye amano ya kwa Lesa yengile mu mitima ya bana babo.

7. Mulandu nshi tacabela icafikapo ukweba fye umwana icibi nelyo icisuma?

7 Abafyashi ilingi line beba fye umwana icisuma ne cibi no kumona kwati ifyo fine ninshi bamufunda imibele isuma pa cintu cimo. Kuti baeba umwana ukutila cibi ukubepa, ukwiba no kulaala no mwaume nelyo umwanakashi uo tamwaupana nankwe. Lelo umwana alakabila na cimbi icifwile ukulenga atiine ukucita ifyo fintu, ukucila ukwishiba fye ati pantu abafyashi balikaanya. Alakabila ukwishiba ukuti aya mafunde ya kwa Yehova. Afwile ukwishiba ukuti ca mano ukukonka amafunde ya kwa Lesa.—Amapinda 6:16-19; AbaHebere 13:4.

8. Finshi umwana afwile ukufundwa pa kuti abe na mano ya kucita ifyo alefundwa?

8 Fingi ifingalenga umwana acetekela ukuti kwaliba Kabumba wakwatisha amano. Ifyo ububumbo bwapikana, ubwingi bwa fintu ifyo Lesa abumba, no kwaluka kwa nshita ya mu mwaka. (Abena Roma 1:20; AbaHebere 3:4) Na kabili, umwana afwile ukufundwa ukuti Lesa alimutemwa kabili alipekanya icilubula ca Mwana wakwe ku kupeela wene ubumi bwa muyayaya. Afwile ukufundwa no kuti akalenga Lesa ukusekelela nga alecita ico afwaya. Nga alefundwa muli uyo musango, nangu Kaseebanya akosa shani ukufwaya ukuti asompole umwana wenu, ena kuti asala ukubombela Yehova.—Amapinda 22:6; 27:11; Yohane 3:16.

9. (a) Cinshi cikabilwa pa kufunda umwana ukutaluka ku bubi? (b) Cinshi bawishi baebwa ukucita, kabili calola mwi?

9 Ukufunda umwana ica kuti ataluka ku bubi kulakabila inshita, ukubikako amano, no kupekanya. Abafyashi bafwile ukukonka ifyo Lesa abeba pa kucite co. Baibolo itila: “Mwe bashibo, . . . mulebakusha [abana benu] mu kusalapula no kukonkomesha kwa kwa Yehova.” (Abena Efese 6:4) Bushe ico calola mwi? Ishiwi lyapilibulwa pano ukuti, “ukukonkomesha,” nga kulikonka fye mu ciGriki lyalola mu kutila, “ukubikamo amano.” E ico kanshi, pano abafyashi baebwa ukubika amano ya kwa Yehova mu bana babo. Ala ayo mano yakacingilila abana icine cine! Abana nga bafundwa amano ya kwa Lesa, baishiba bwino bwino ifyo Lesa amona ifintu, bakacingililwa ku kufwaya ukucita ifyabipa.

Ukubafunda pa Mulandu wa Kubatemwa

10. Cinshi icacindama ico mufwile ukwishiba pa kuti mube abafikapo ukufunda abana?

10 Na lyo line, pa kuti mube abafikapo mu mulimo wenu uwa kufwaya ukukusha bwino abana, ukutemwa e kufwile ukulenga ukuti mulebafunda. Ukulanshanya kwalicindama. Ishibeni ifilecitika mu mikalile ya mwana wenu ne fyo atontonkanya pa fintu fimo. Ukwabula ukumutiinya, lanshanyeni no mwana mu nshila ya kuti cayanguka kuli ena ukulanda ifili ku mutima. Limo, kuti mwapapa ifyo umwana engalanda. Mukwai tekanyeni, mwisakaatuka. Lelo, kutikeni mutembo mutembo ifyo alesosa.

11. Bushe umufyashi kuti abika shani amano ya kwa Lesa mu mwana?

11 Ca cine, mufwile mwalibelengela umwana wenu muli Baibolo imiku iingi ukuti amafunde ya kwa Lesa yalilesha ubulalelale. (1 Abena Korinti 6:18; Efese 5:5) Kanshi umwana wenu afwile alishiba ico Yehova apata ne co atemwa. Lelo, pa kubika amano ya kwa Yehova mu mwana wenu, kano mwacita na fimbi. Abana bakabila ukubafwa ukwishiba umulandu cacindamina ukukonka amafunde ya kwa Yehova. Cifwile cabafika pa mutima ukuti amafunde ya kwa Lesa yasuma kabili nga bayakonka cikabawamina. Bafwile baishiba bwino bwino ukuti ukumfwila amafunde e kulanga ukuti balitemwa Yehova. Kano fye nga muleishiba ifyo abana benu batontonkanya pa fintu, mwabalanga ne fyo Amalembo yalandapo no kulenga basumina ifyo Lesa amona uyo mulandu, e lyo twingatila ‘mulebika amano’ ya kwa Lesa muli bene.

12. Bushe umufyashi kuti ayafwa shani umwana ukwishiba bwino ifyo afwile ukumona ukulaalana kwa mwaume no mwanakashi?

12 Ilyo mulelanda pa kulaalana kwa mwaume no mwanakashi, nakalimo kuti mwaipusha ukuti, “Bushe umona ukuti ukumfwila ifunde lya kwa Yehova ilya kuti umwaume no mwanakashi nga tabaupana tabafwile kulaala pamo, lilatupoka insansa nelyo lyaliba fye bwino?” Koselesheni umwana ukulondolola ico ayasukila ukuti libi nelyo ukuti lisuma. Lyena sambilisheni umwana wenu icipesha mano Lesa acita ica kupeela umuntu amaka ya bufyashi, nomba kuti mwaipusha amuti, “Bushe kuti watila Lesa uwatutemwa kuti atupeela amafunde ya kutupoka insansa? Nelyo bushe kuti wasumina ukuti amafunde yakwe yabelako ukutuletela insansa no kutucingilila?” (Amalumbo 119:1, 2; Esaya 48:17) Lekeni umwana wenu alande ifyo atontonkanya pali uyo mulandu. Nomba kuti mwalanda pa fya kumwenako ifilanga ukuti ubulalelale bulaleta amacushi no bulanda. (2 Samwele 13:1-33) Nga mulelanshanya no mwana ukwishiba ifyo aletontonkanya pa kuti omfwe no kusumina ifyo Lesa amona ifintu, ninshi mulebomba bwino umulimo wa kubika amano ya kwa Lesa mu mwana wenu. Lelo, kuli na fimbi ifyo mwingacita.

13. Kwishiba cinshi pali Yehova ukwingalenga umwana ukumfwila sana amafunde ya kwa Lesa?

13 Ukucila ukupelela fye pa kweba umwana ububi bwaba mu kupula mu mafunde ya kwa Yehova, mulondolweleni ne fyo Yehova omfwa pa fyo tucita. Langeni umwana wenu Amalembo ya mu Baibolo ayatweba ukuti nga twafilwa ukucita ico Lesa afwaya, alomfwa ubulanda. (Amalumbo 78:41) Kuti mwaipusha umwana ukuti, “Mulandu nshi te kuti ufwaile ukufulwisha Yehova? Lyene mulondolweleni ukuti: “Satana umulwani wa kwa Lesa atila tubombela Yehova pa mulandu fye wa kuti alatupeela ifintu, te kutila twalimutemwa iyo.” Lyene londololeni no kuti pa mulandu wa kuti Yobo atwalilile uwa cishinka, alengele umutima wa kwa Yehova ukusekelela, kabili ashinine Satana ukuti wa bufi. (Yobo 1:9-11; 27:5) Umwana afwile ukwishiba bwino ukuti ifyo acita kuti fyalenga Yehova ukumfwa ubulanda nelyo kuti fyalenga wena ukusekelela. (Amapinda 27:11) Kuti mwafunda umwana isambililo nge li, pamo na masambililo yambi ayacindama mu citabo ca Sambilila Kuli Kasambilisha Mukalamba.a

Mu Kufunda Abana, Mulafuma Ifisuma

14, 15. (a) Masambililo nshi yamo mu citabo ca Kasambilisha Mukalamba ayalenga abana ukuilandila no kwipusha amepusho? (b) Fisuma nshi mwasanga mu kubomfya ici citabo? (Moneni no mukululo pa mabula 18 na 19.)

14 Shikulubantu wa ku Croatia uubelengela umwishikulu wakwe uwa myaka 7 mu citabo ca Kasambilisha Mukalamba, alembele ukuti umwishikulu wandi atile: “Bamayo bantumine ukubomba fimo, nomba nalikeene. Lelo, naibukishe icipande ca kuti ‘Icumfwila Kuti ca Kucingilila,’ ilyo line, naile kuli bamayo no kubeba ukuti nalabomba ifyo bacintuma, pantu ndefwaya ukuba ne cumfwila kuli bena.” Abaupana ku Florida, ku United States of America balandile pa cipandwa citila, “Umulandu Tushilingile Ukubepela.” Batile: “Mwaba amepusho ayalenga abana ukuilandila no kusumina ifilubo ifyo bashali na kusumina.”

15 Mu citabo ca Kasambilisha Mukalamba mwaba ifikope ukucila pali 230, kabili fyonse fyalikwata na mashiwi pa mbali. Umufyashi umo atashishe ukuti: “Umwana wandi nga aletamba icikope tafwaya no kuya pe bula limbi. Mwaba ifikope fisuma sana kabili abana balasambililako fimo ku kumona fye ifili pa cikope, kabili balepusha na mepusho. Pali cilya cikope apaba umwana uuletamba TV umwafiita, umwana wandi aipwishe ukuti, ‘Mayo, ngo yu mwaice cinshi alecita?’ kabili ishiwi lyakwe pa kwipusha lyaleumfwika ukuti namona ukuti kuli cimo icibi ico ulya mwaice alecita palya.” Amashiwi yaba pali cilya cikope yatila: “Bushe nani uwingamona fyonse ifyo tucita?”

Amasambililo Yacindama Muno Nshiku

16. Cinshi icacindama ico abana bafwile ukufundwa muno nshiku, kabili mulandu nshi?

16 Abana bafwile ukwishiba bwino ifya kusunga ifilundwa fyabo ifya bwaume no bwanakashi. Lelo kwena, tacayanguka ukulanshanya na bana pali ili lyashi. Kalemba we lyashi umo atile mu nkulo aakulilemo, ukulanda pa fya musango yo ku bana, lishiku. Ilyo bamwipwishe nga kuti asambilisha abana bakwe atemwa iyo, atile: “Mfwile fye ukushipa.” Ala abafyashi nga batiina ukufunda abana ifya kuicilingilila ku bulalelale ku mulandu wa nsoni, abana babo tabakacingililwe nakalya. Abolungana na bana balitemwa sana ukushukila abaice abashaishiba nangu cimo pa fya kuicingilila ku bulalelale. Icitabo ca Sambilila Kuli Kasambilisha Mukalamba calilandapo pali ili lyashi mu mucinshi. Nga mwafunda abana ifya kuicingilila ku bulalelale te kutila ninshi mwabashikula awe, pantu nga tabeshibe nelyo cimo, kuti bacendwa.

17. Bushe icitabo ca Kasambilisha Mukalamba cileafwa shani abafyashi ukufunda abana ifya kuicingilila ku kucendwa?

17 Mu cipandwa 10, icilanda pali bamalaika babipa abafumine ku muulu abaishilecita ubulalelale no kufyala abana, mwaba ilipusho lya kuti, “Finshi waishiba pa lwa mwaume no mwanakashi ukulaala pamo?” Mu citabo mwaba icasuko ca mucinshi kabili icayanguka ukumfwa. Mu cipandwa 32 na mo, icitabo cilondolola ifyo abana bengaicingilila ku batemwa ukuulungana na baice. Bakalata abengi abo twapokelela balanga ukuti amasambililo ya musango yo yalicindama. Nyina umo atile: “Uyu mulungu wapwile ilyo umwana wandi Javan aile ku kumona dokota, alimwipwishe nga twalimufunda ifya kusunga ifilundwa fyakwe ifya bwaume. Dokota alitemenwe sana ukumfwa ukuti twalifundile Javan ukubomfya icitabo cipya.”

18. Bushe icitabo ca Kasambilisha Mukalamba cilandapo shani pa mulandu wa kupepa ifimpashanya?

18 Icipandwa na cimbi ni cilya cilanda pa lyashi lya mu Baibolo ilya balumendo batatu abaHebere, Shadraki, Meshaki, na Abednego, abakeene ukuwa ku cimpashanya caleimininako Ubuteko bwa bena Babele. (Daniele 3:1-30) Icitabo ca Kasambilisha Mukalamba citila ukushinshimuna icimpashanya cimo cine no kupika sulupu ku mendela. Lelo, bamo kuti batwishika ico nga cishinka. Na lyo line, umfweni ifyalandile baEdward Gaffney ilyo babepwishe ku balemba magazini wa U.S. Catholic. Ubushiku bwa kubalilapo ubo umwana wandi umukashana aile ku sukulu, aishile kuli ine no kunjeba ati, “Tata, lelo ku sukulu twacisambilila ifya kupepa.” Na ine natile ale, pepa tumfwe. BaGaffney batile: “Aikete pa cifuba, ninshi nacincimuka no kucincimuka kabili atile, ‘Lumbanyeni imendela . . . ’” Lyena ba Gaffney batile: “Ilyo line naibukishe ukuti kanshi filya Inte sha kwa Yehova balanda ca cine. Ukufuma fye ku bwaice, abana besu balafundwa ukutemwa sana icalo bekalamo, ukufika na ku kupepa icalo.”

Inshita Yenu na Maka, Tafyakaye fye mu Menshi

19. Cilambu nshi caba mu kufunda abana?

19 Awe mwandini calilinga mwabombesha ukufunda abana. Nyina umo uwa ku Kansas, ku United States of America, alililile ku nsansa ilyo apokelele kalata ukufuma ku mwana wakwe umulumendo. Kalata atile: “Ala nalishuka ukukwata imwe mwe bafyashi abankushishe bwino. Ndemutasha nga nshi bamayo na batata.” (Amapinda 31:28) Icitabo ca Sambilila Kuli Kasambilisha Mukalamba kuti cayafwa abafyashi na bambi abengi ukufunda abana, ukucingilila icikwatwa cabo ica mutengo.

20. Cinshi abafyashi bafwile ukwibukisha lyonse, kabili kuti calenga bacita cinshi?

20 Abana balilinga ukuba pamo na bo no kubasakamana na maka yesu yonse. Baba fye abaice inshita iinono. Shukileni inshita ya kuba pamo na bo no kubafwa. Amaka yenu ne nshita tafyakaye fye mu menshi. Abana benu bakamutemwa. Lyonse ibukisheni kuti abana ca bupe ukufuma kuli Lesa. Awe mwandini abana cikwatwa ca mutengo icaba ngo bupyani! (Amalumbo 127:3-5) E ico kanshi, basakamaneni nge ca bupe ca bupyani icafuma kuli Lesa, basungeni kwati mukalubulula kuli Lesa pa fyo mubasunga, pantu na cine, mukalubulula.

[Futunoti]

a Calembwa ne Nte sha kwa Yehova. Moneni icipandwa 40 icitila, “Ifya Kulenga Lesa Ukusekelela.”

Kuti Mwayasuka Shani?

• Shino nshiku, cinshi abafyashi bafwile ukubikila sana amano ku kucingilila abana babo?

• Kufunda nshi kwingalenga abana ukuba na mano ya kucita ifyo bafundwa?

• Shino nshiku, finshi fimo fimo ifyacindama ifyo mufwile ukulanshanya na bana benu?

• Bushe icitabo ca Kasambilisha Mukalamba cileafwa shani abafyashi ukufunda abana babo?

[Akabokoshi ne Fikope pe bula 18, 19]

Icitabo ca Muntu Onse fye

Icitabo ca Sambilila Kuli Kasambilisha Mukalamba calembelwe pa kuti abafyashi na bakalamba bambi cilebangukila ukubelengela abana no kulanshanya na bo amasambilisho ya kwa Yesu Kristu. Lelo, abakalamba ababelenga beka ici citabo na bo bene baletasha sana ifyo balesambilila muli ici citabo.

Umwaume umo uwa ku Texas, ku United States of America, atile: “Icitabo ca Sambilila Kuli Kasambilisha Mukalamba calembwa mu nshila ya kukoselesha kabili iyayanguka ukumfwa, kuti casambilisha umuntu onse fye, nangu fye uwa myaka 76, nga ine. Na ine wine ne wabombela Yehova ukufuma ku bwaice ndetila mwabombeni mukwai pa kulemba ici citabo.”

Umbi na o uwa ku London, ku England, atile: “Abafyashi kumo na bana balatemwa nga nshi ukumona ifikope ifisuma sana ifyaba muli ici citabo. Ala balilemba bwino ifyebo kabili mwaliba amepusho ayasuma sana, te pa busuma ukumona ifyo balanda pali fimo ifyayafya ukulandapo nga filya fyaba mu cipandwa 32, icitila, ‘Ifyo Yesu Acingililwe.’” Na pa kusondwelela atile: “Nangu ca kutila ici citabo calembelwe abana ba Nte sha kwa Yehova, bakafundisha pamo na bakalamba bambi, na bo bene ndemona bakatemwa sana ukupokako ici citabo. Ndefwaya ukulacibomfya lyonse, ukutendeka lelo, ukuya na ku ntanshi.”

Umwanakashi umo uwa ku Massachusetts, ku United States of America, alandile ukuti muli ici citabo mwaba “ifikope ifisuma sana” kabili ifingi. Atile: “Nangu ca kutila ici citabo calembelwe abaice, ifyabamo kuti fyayafwa na ifwe bene fwe bakalamba ukutontonkanya pali bucibusa bwesu na Yehova.”

Umwanakashi umbi na o uwa ku Maine, ku United States of America atile: “Ala cipesha mano! We citabo nobe ubusuma! Te ca bana beka, cesu bonse pantu tuli bana ba kwa Lesa. Ici citabo calimfika pa mutima kabili calinsansamusha icine cine. Ndeumfwa ukutila Yehova ni cibusa wandi uwa cine kabili mufyashi wandi. Nindaba kuli fyonse ifyalencusha muli iyi myaka. Nomba ndemona fyonse ifyo Yehova alaya ukuti fya cine cine.” Na pa kulekelesha atile: “Ndemweba bonse ukuti, ‘Ala mubelenge ici citabo.’”

Nakulubantu umo uwa ku Kyoto, ku Japan, atile ilyo alebelengela abeshikulu bakwe, baleipusha abati: “‘Cinshi uyu mwaice alecita apa? Cinshi uyu umwaice balemukalipilila? Nga aba bamayo cinshi balecita apa? Nge yi nkalamo cinshi ilecita apa?’ Mwaba ifintu ifyo fwe bantu twatemwa, kanshi nalitemwa ici citabo ukucila ifitabo fyonse ifyaba mu malaibulare.”

Umufyashi uwa ku Calgary, ku Canada atile, ilyo apokelele fye icitabo, atendeke ukubelengela umwana wakwe umwanakashi uwa myaka 6 no mwaume uwa myaka 9. Atile: “Ala abana balitemenwe sana ici citabo. Balekutika bwino sana no kwasuka amepusho bwino bwino. Balemoneka ukuti nabatemwa ifyo balesambilila, pantu baleilandila fyonse ilyo baleyasuka amepusho yaba mu citabo. Abana nabatemwa sana ukusambilila, kabili nga mukashana ena atile tulesambilila fye cila bushiku.”

Bushiku bumo ilyo bapwile ukusambilila no mwana umulumendo, bawishi batile: “Twalandile inshita iikalamba pali Yehova na pa fyo akacitila abantu. Aali na mepusho ayengi pa fyaba mu citabo. Awe ne filamba fyalilengelele mu menso yandi ilyo atile tukamonana mailo tata, musendame umutende, kabili atile, ‘Na mailo tukasambilila, te fyo tata? Ndi na mepusho ayengi, ndefwaya ukwishiba fyonse pali Yehova.’”

[Icikope pe bula 15]

Mwe bafyashi, cinshi mwingasambilila kuli Manoa?

[Icikope pe bula 16]

Mwe bana, cinshi mwingasambilila ku baHebere batatu?

[Ifikope pe bula 17]

Mu citabo ca “Kasambilisha Mukalamba,” mwaba ifikope ifisuma na mashiwi ya pa fikope ayasuma ifya kubomfya ukufunda abana

Bufi nshi Anania alebepa kuli Petro?

Nani amona fyonse ifyo tucita?

    Impapulo sha mu Cibemba (1982-2025)
    Isaleni
    Isuleni
    • Cibemba
    • Peleniko Bambi
    • Ifyo Mwingasala
    • Copyright © 2025 Watch Tower Bible and Tract Society of Pennsylvania
    • Ifya Kubomfya
    • Amafunde Yesu
    • Privacy Settings
    • JW.ORG
    • Isuleni
    Peleniko Bambi