Amepusho Ukufuma ku Babelenga

Apo Solomone Imfumu ya bena Israele ba ku kale mu bukote bwakwe abulishe bucishinka kuli Lesa, bushe kuti twasondwelela ukuti takabuushiwe?—1 Ishamfumu 11:3-9.

Nangu Baibolo yalilumbula amashina ya baume na banakashi ba citetekelo abo ukwabula ukutwishika bakabuushiwa, tayalanda mu kulungatika pa kubuushiwa kwa uuli onse. (AbaHebere 11:1-40) Lelo, ukulosha kuli Solomone, kuti twatunganya ifyo Lesa amupingwile nga twalinganya ifyacitike lintu afwile ku fyacitikile bambi aba busumino lintu bafwile.

Amalembo yalanda fye pa fintu fibili ificitika ku bantu nga bafwa—ukufwa kwa nshita fye inono e lyo ne mfwa ya ciyayaya. Abapingulwa ukukanabushiwa bapooswa mu “Gehena,” nelyo muli “bemba wa mulilo.” (Mateo 5:22; Marko 9:47, 48; Ukusokolola 20:14). Pali abo paba abantunse ba kubalilapo babili, Adamu na Efa, kafutika Yuda Iskariote na bambi abafwile lintu Lesa aletele ubupingushi pali bene, pamo nga bantu ba mu nshita ya kwa Noa na bekashi ba mu musumba wa Sodomu na Gomora.a Lintu abantu bafwa, nga ca kuti bakabuushiwa baya ku nshiishi ya bantu bonse, e kutila ku Sheol, nelyo Hades ukulingana ne ciHebere atemwa iciGriki. Ukulosha ku nshita yabo iya ku ntanshi, Baibolo itila: “Bemba alekele abafwa abalimo, ne mfwa ne Nshiishi fyalekele abafwa abalimo, kabili bapingwililwe umo umo umwabela imilimo yakwe.”—Ukusokolola 20:13.

Aba busumino baloshiweko mu AbaHebere icipandwa 11, kanshi, baba mu Nshiishi, balepembelela ukubuushiwa. Pali aba paba ababomfi ba cishinka aba kwa Lesa pamo nga Abrahamu, Mose, na Davidi. Nomba moneni ifyo Baibolo isosa pa mfwa yabo. Yehova alandile kuli Abrahamu ati: “Lelo iwe ukeso mutende kuli bawiso, ukashiikwa uwa mfwi tutu.” (Ukutendeka 15:15) Yehova atile kuli Mose: “Mona, ulelaala pamo na bawiso.” (Amalango 31:16) Ukulosha kuli Davidi, wishi wa kwa Solomone, Baibolo itila: “E lyo Davidi asendeme na bawishi, no kushiikwa mu musumba wa kwa Davidi.” (1 Ishamfumu 2:10) E ico, amashiwi ya kuti ‘asendeme na bawishi’ mu nshila imbi kutila umuntu aile ku Nshiishi.

Cinshi cacitike kuli Solomone lintu afwile? Baibolo yatila: “Ne nshiku isho Solomone ali mfumu mu Yerusalemu pali Israele onse shali imyaka amakumi yane. Kabili Solomone asendeme kuli bawishi, ashikilwe na mu musumba wa kwa Davidi wishi.” (1 Ishamfumu 11:42, 43) E ico, cili icalinga ukusondwelela ukuti Solomone ali ku Nshiishi, uko alepembelela ukubuushiwa.

Uku kusondwelela kulepilibula ukuti ishuko lya kubuushiwa e ko lyaba kuli abo Amalembo mu kulungatika yatila, ‘basendama na bawishi.’ Na kuba, imfumu ishingi ishatekele pa numa ya kwa Solomone, nangu shishakwete bucishinka, calisoswa ukuti shalisendama pamo na bawishi. Ici caliba fye bwino, pantu na kuba “kukaba ukubuushiwa kwa balungama na bashalungama.” (Imilimo 24:15) Na lyo line, ni pa numa fye “bonse aba mu nshiishi” babuushiwa e lintu tukeshiba abakwata ishuko lya kubuushiwa. (Yohane 5:28, 29) E co kanshi, ukucila ukulungatika fye ukuti umuntu umo uwa ku kale akabuuka nangu iyo, natupembelele no kushintilila pa kupingula kwapwililika ukwa kwa Yehova.

[Futunoti]