Bushe Muimona Abashacindama?

PA MYAKA iingi, baLena baleimona abashacindama. Batile: “Imyaka iingi iyo nacendelwe ilyo nali umwaice yalengele ndeimona ukuti nshacindama. Naleimona ukuti ndi wa cabe cabe fye.” BaSimone na bo nga batontonkanya pa nshita bali abaice, batila, “Mu mutima naleumfwa kwati pali ico nabulishe kabili walenjeba ukuti nshacindama nangu panono.” Cimoneke ukuti abantu abengi muno nshiku tababa ne nsansa pa mulandu wa kuimona abashacindama. Akabungwe kamo akafunda abacaice katile nakalimo hafu wa batuma amafoni kuli aka kabungwe batila “lyonse fye baimona abashacindama.”

Badokota bamo batila, abantu e balenga ukuti abanabo batendeke ukuimona abashacindama. Umuntu kuti atendeka ukuimona uushacindama nga ca kuti lyonse balamukalipila, balamulengulula sana nelyo balamubomfya bubi bubi. Te mulandu ne cingalenga, ukucusha umuntu kuti kwalenga anaka, kuti afwa fye no kufwa. Mu kufwailisha kwa nomba line ukwa badokota, basangile ukuti abantu abaimona abashacindama tabaicetekela kabili tabacetekela na bantu bambi, kabili ici cilonaula bucibusa bwabo na bambi. Lipoti yatile, “ilyo bacite fyo, abene nomba e balenga no kuti ubwafya bwine ubo batiina bukule sana.”

Ilingi line, abaimona abashacindama baba nga filya fine Baibolo ilanda, balaba na ‘matontonkanyo ya kubasakamika.’ (Amalumbo 94:19) Baimona ukuti babi. Balaipeela umulandu ilyo cimo calubana. Nangu bambi babatashe shani pa fyo babomba bwino, bena bamona kwati balebabepa fye. Apo bamona ukuti teti babe ne nsansa, abengi baipoosa mu mikalile iingabonaula iyo bafilwa no kuleka. BaLena, abo twacilandapo pa kubala, balishilekwata no bwafya bwa miliile pa mulandu wa kuimona abashacindama, kabili batila: “Naleimona ukuti nshali na maka ya kwalula icili conse.”

Bushe abacula na ‘matontonkanyo ya kubasakamika’ bakatwalilila fye ifyo fine ubumi bwabo bonse? Bushe kuli icili conse icingacitwa pa kuti bacimfye amatontonkanyo yabo aya kuimona abashacindama? Mu Baibolo mwaba ifishinte no kufunda ukubomba ifyayafwa abengi ukucimfya ubu bwafya. Fishinte nshi fimo fimo, kabili fyayafwa shani abakwete ubu bwafya ukusanga insansa mu bumi? Ifi fishinte fyalalondololwa mu cipande cikonkelepo.