Bushe Mwaliba Ubusuma mu Kubo wa Cishinka?
BA KARL, ababomba ku kampani kamo ifi aka inshuwalansi baebele baJens ukuti: “Indalama mulelipila isha inshuwalansi nashifula sana. Nga mwatendeka ukuleta indalama shenu ku kampani kesu, ninshi mwakulashalako na K96,000, cila mweshi kabili iyi ndalama ikalamba sana.”a
BaJens bayaswike abati: “Kwena ico ca cine, lelo uku kwine ku kampani eko ntwala indalama sha inshuwalansi yandi pa myaka iingi. Balingafwa sana, kabili ndefwaya ukuba uwa cishinka kuli bena.”
BaKarl batile: “Ukuba uwa cishinka cisuma sana. Lelo bucishinka bulemonawila indalama!”
Ifi fyalandile baKarl fya cine. Ilingi line, ukuba uwa cishinka kuli bambi kuti kwaonaula ne ndalama ishingi. Kukabila inshita, amaka no kuipeelesha. Lelo bushe mwaliba ubusuma mu kuba uwa cishinka?
Abengi Batila Cisuma Ukuba uwa Cishinka, Lelo Tababa na Cishinka
Mu kufwailisha kwacitilwe mu Germany na kabungwe ka Allensbach Opinion Research Institute, casangilwe ukuti abengi abo baipwishe batile cisuma sana ukuba uwa cishinka. Mu kufwailisha na kumbi ukwacitilwe na kabungwe kamo kene ku bantu abali ne myaka 18 ukufika ku 24, basangile ukuti babili pali batatu balemona ukuti cisuma ukuba uwa cishinka.
Nangu ca kuti abantu abengi batila cisuma ukuba uwa cishinka, balafilwa ukuba ne cishinka. Ku ca kumwenako, mu fyalo ifingi ifya ku Bulaya, abaupana abengi nelyo aba mu lupwa tababa aba cishinka ku bena mwabo nelyo ku ba pa ng’anda. Ababa fibusa ilingi tababa aba cishinka kuli umo no munankwe. Na mu sha ncito mwine, bucishinka tamwaba, pantu imyaka ya kale e bwalelenga abene ba ncito na baingile ncito ukwikatana, nangu fye ni mu makwebo na mo, abantu nomba tababa na cishinka ku bo bashishanya na bo. Cinshi cibelele ifi?
Limo, imikalile yayafya ilalenga abantu ukukanakwata inshita e lyo na maka ya kuipeelesha, lelo ifyo e fikabilwa sana pa kuba uwa cishinka. Abantu abo ifibusa fyabo fyabacitile ifyo bashaleenekela, napamo te kuti bafwaye ukucetekela uuli onse nomba. Bambi na bo batila tacacindama ukuba uwa cishinka, cikulu fye inshiku shileya.
Kwena, bucishinka mibele iyo abantu batila isuma sana lelo iyo bashakwata. E mulandu wine twalalandila pa mepusho ya kuti: Bushe mwaliba ubusuma mu kubo wa cishinka? Nga e mo bwaba, ni kuli bani tulingile ukuba aba cishinka kabili kuti twalanga shani icishinka? Busuma nshi bwaba mu kuba aba cishinka?
[Futunoti]
a Amashina yamo muli cino cipande ne cikonkelepo nayalulwa.
[Amashiwi pe bula 3]
Bucishinka mibele iyo abantu batila isuma sana lelo iyo bashakwata