Kaaneni Ukutontonkanya Kwalubana!

ILYO Yobo alepita mu bucushi, atandalilwe ne fibusa fyakwe fitatu Elifasi, Bildadi, na Sofari. Baishile mu kumulilila ubulanda no kumusansamusha. (Yobo 2:11) Uwakwetepo sana amaka kabili uwali nakalimo umukalamba pali bonse batatu ali ni Elifasi. E wa balilepo ukusosa kabili e wakwatishe ifya kusosa. Kutontonkanya kwa musango nshi Elifasi alangishe pa miku itatu iyo alandile?

Ukwibukisha icimonwa ca mupashi ico Elifasi amwene, atile: “Awe umupashi walelwike pa cinso candi; amasako ya mubili wandi yalyendele. Waliiminine, na ine nafililwe ukumone cata icali ku mulola wa menso yandi: kwali fye akantepentepe, naumfwile ne shiwi.” (Yobo 4:15, 16) Mupashi nshi uwalesonga ukutontonkanya kwa kwa Elifasi? Ifyaumfwikile amashiwi yamususha alandile pa numa filangisha ukuti ca cine umupashi tawali umo uwa bamalaika balungama aba kwa Lesa. (Yobo 4:17, 18) Cali cibumbwa ca mupashi icabipa. Nga te ifyo, mulandu nshi Yehova aebawilile Elifasi na banankwe babili pa kusosa ubufi? (Yobo 42:7) Ca cine, Elifasi asongelwe ne cibanda. Ifyo alandile fyalangile ukuti ukutontonkanya kwakwe kwalibipile.

Ni mfundo nshi twingamona mu fyo Elifasi alandile? Mulandu nshi cacindamina ukukaana ukutontonkanya kwalubana? Kabili finshi twingacita pa kukaana ukutontonkanya kwalubana?

“Ku Babomfi Bakwe Tatetekelako”

Pa miku yonse itatu iyo alandile, Elifasi atile Lesa alafwaisha ifyacilamo ica kuti takwaba ico ababomfi bakwe bacita icimutemuna. Elifasi aebele Yobo ukuti: “Mona, ku babomfi bakwe tatetekelako; na bamalaika bakwe atungo kulufyanya.” (Yobo 4:18) Pa numa Elifasi alandile pali Lesa ukuti: “Mona, tatetekela aba mushilo bakwe bene, imyulu na yo tayasanguluka mu menso yakwe.” (Yobo 15:15) Na kabili aipwishe kuti: “Bushe ca kucankilwa ku Wa maka yonse, ukuti walilungama?” (Yobo 22:3) Bildadi alisuminishe ifyo Elifasi alandile, pantu nao atile: “No mweshi wine taubalika, ne ntanda tashicelebuka, mu menso yakwe [Lesa].”—Yobo 25:5.

Tufwile ukucenjela sana ukukanasongwa no kutontonkanya kwa musango uyo. Kuti kwatulenga ukutontonkanya ukuti Lesa alafwaisha ifyacilamo kuli ifwe. Ukutontonkanya kwa musango uyu kulonaula bucibusa bwesu na Yehova. Na kabili, nga ca kuti twanakila ku kutontonkanya kwa musango uyu, tukacita shani lintu twasalapulwa? Ukucila ukupokelela ukusalapulwa mu kunakilila, umutima wesu kuti nalimo wa ‘bubukila Yehova,’ kabili kuti twamupaata. (Amapinda 19:3) Ifyo bucibusa bwesu na Lesa bwingonaulwa nga twacite fyo!

“Bushe Umuntu Engabo wa Mulimo Kuli Lesa”

Icayampana sana ku kulando kuti Lesa alafwaisha ifyacilamo, kutontonkanya ukuti alamona abantu kwati tabali nangu cimo. Ico Elifasi alandile icalenga butatu casanshishemo ilipusho lya kuti: “Bushe umuntu engabo wa mulimo kuli Lesa, Bushe uwashilimuka engabo wa mulimo kuli wene?” (Yobo 22:2, NW) Elifasi alepilibula ukuti umuntu taba nangu cimo kuli Lesa. Mu kupalako, Bildadi na o apashishe ukuti: “[Umuntunse umwina kufwa, NW] kuti alungama shani kuli Lesa? kuti asanguluka shani uwafyalwa ku mwanakashi?” (Yobo 25:4) Ukulingana no ko kutontonkanya, ni shani Yobo, umwina kufwa, engaaba uwalungama pa menso ya kwa Lesa?

Pa mulandu wa fyo bapitamo, abantu bamo lelo, balacushiwa na matontonkanyo yalubana. Ifintu pamo nge fyo bakushiwe, ukutitikishiwa na mafya ya mu bumi, nelyo ukuba ifinakabupalu ku lupato lwa mishobo ne fikulilo kuti fyalenga balatontonkanya ukuti tabacindama. E lyo Satana ne fibanda fyakwe na fyo filatemwa ukucululusha abantu. Nga kuti fyalenga umuntu ukuyumfwa ukuti ifili fyonse ifyo acita te fisuma sana kuli Lesa Wa maka yonse, kanshi uyu muntu kuti apopomenwa. Mu kuya kwa nshita uyo muntu kuti asensenunwa nangu fye ukufutukako kuli Lesa wa mweo.—AbaHebere 2:1; 3:12.

Ukukota no kulwala filalenga twafilwa ukucita ifyo tulekabila ukucita. Inshita tupoosa mu mulimo wa Bufumu kuti yamoneka inono nga twailinganya ku fyo twalecita ilyo twali abaice, na maka ayengi, no bumi busuma. Fintu cacindama ukwishiba ukuti Satana ne fibanda fyakwe fifwaya ukuti tuleyumfwa ukuti ifyo tucita tafyafikapo sana ukulingana na fintu Lesa afwaya! Tufwile ukukaana ukutontonkanya kwa musango uyo.

Ifya Kukaana Ukutontonkanya Kwalubana

Te mulandu no kucula uko Satana aletele pali wene, Yobo atile: “Nsuke ndeke umweo te kuti ndeke bumpomfu bwandi.” (Yobo 27:5) Pa mulandu wa kuti Yobo alitemenwe Lesa, alipampamine pa kutwalilila uwa mpomfu te mulandu ne fyacitike, kabili takwali icili conse icali no kwalula ilyo ipange. Ici cishinka cacindama kuti calenga tulekaana ukutontonkanya kwalubana. Tufwile ukwishiba bwino bwino ifyo kutemwa kwa kwa Lesa kwaba, no kutwalilila ukulanga ukutasha kwa kufuma pa nshi ya mutima pali uku kutemwa. Tulekabila na kabili ukukusha ukutemwa kwesu ukwa kuli wena. Kuti twacite fyo ukupitila mu kusambilila Icebo ca kwa Lesa lyonse no kulatontonkanya pa fyo tulesambilila pamo no kulapepa ukuti Lesa atwafwe.

Ku ca kumwenako, Yohane 3:16 itila: “Pantu Lesa atemenwe aba pano calo ukutemwa kwa kuti apeele Umwana wakwe uwafyalwa eka.” Yehova alitemwa sana abantu, kabili ici calimonwa ku fyo abomba na bene pa nshita yapita. Ukulatontonkanya pa fya kumwenako fya ku kale kuti kwalenga ifyo tutasha Yehova no kumutemwa ukulakulilako, kabili kuti kwatwafwa ukukaana ukutontonkanya kwalubana.

Tontonkanyeni pa fyo Yehova asungile Abrahamu pa nshita lintu imisumba ya Sodomu na Gomora yalesungamina ukonaulwa. Abrahamu aipwishe Yehova imiku 8 ukulosha ku fyo Ali no kupingula iyi misumba. Lelo Yehova tabalile akalifiwa. Lelo Abrahamu, alikoseleshiwe no kusansamushiwa pa fyo Yehova amwaswike. (Ukutendeka 18:22-23) Lyena pa numa lintu Lesa apuswishe Lote no lupwa lwakwe ukufuma mu Sodomu, Lote aipwishe Yehova ukuti engafulumukila ku musumba wali mupepi ukucila ukuya ku mpili. Yehova ayaswike ati: “Mona na kuli ici na co nakusuminisha, nshaonaule umusumba uo walandapo.” (Ukute. 19:18-22) Bushe aya Malembo yalangisha Yehova ngo ufwaya ifyacilamo, uushaba na kutemwa, kateka uubomfya amaka yakwe bubi bubi? Awe nakalya. Yalelangilila fye fintu aba, ukuti ni Lesa wa kutemwa, wa cikuuku, wa luse no kuti ni Kateka uulangulukilako.

Ifya kumwenako fya kwa Aarone, Davidi, na Manase abena Israele ba ku kale, filasusha imfundo ya kuti Lesa alafwailikisha imilandu no kuti takuli uwingacita ifintu ifisuma ifyo engasekelamo. Aarone acitile imilandu itatu iyabipisha. Apangile umutepa wa mwana wa ng’ombe uwaengwa, ailundile kuli nkashi yakwe Miriamu mu kulengulula Mose, na kabili afililwe ukushisha no kucindika Lesa pa Meriba. Nangu cibe ifyo, Yehova alimwene imibele iisuma muli wena kabili amusuminishe ukutwalilila ukubomba nga shimapepo mukalamba ukufikila ne mfwa yakwe.—Ukufuma 32:3, 4; Impendwa 12:1, 2; 20:9-13.

Imfumu Davidi yacitile imembu ishabipisha ilyo yaleteka. Muli ishi membu mwasanshishe ubucende, ukulenga imfwa ya muntu uwabula umulandu, no kupenda abantu ukwapusene ne funde. Nangu cibe ifyo, Yehova alimwene ukulapila kwa kwa Davidi. Kabili muli bucishinka Yehova asungilile icipingo ca Bufumu pa kusuminisha Davidi ukutwalilila ukube mfumu ukufikila imfwa yakwe.—2 Samwele 12:9; 1 Imilandu 21:1-7.

Imfumu ya ku Yuda Manase apangile ifipailo kuli Baali, apishishe abana bakwe abaume mu mulilo, akoseleshe ifibelesho fya kupepa imipashi, kabili akuulile fye ne fipailo fya kupepa kwa bufi mu kati ka lubansa lwe tempele. Lelo pa numa ya kulapila ukufuma ku mutima, Yehova alimwelele, amulubwile ukufuma muli bunkole, kabili amubweseshe ubufumu. (2 Imilandu 33:1-13) Bushe ifi e fingacita Lesa uo umuntu nangu umo ashingasekesha? Awe nakalya!

Kashinina wa Bufi E Waba no Mulandu

Tacifwile ukutupapusha ukuti Satana e mwine wine wa misango iyo abepesha Yehova ukukwata. Satana mukalushi kabili alafwaya ifyacilamo. Ici kuti camonwa bwino ku cibelesho ca kupeela abana amalambo icayampene no kupepa kwa bufi kale. Abena Israele abasangu baleoca abana babo abaume na banakashi mu mulilo, icintu icishaimine mu mutima wa kwa Yehova.—Yeremia 7:31.

Ni Satana e ufwailikisha imilandu te Yehova iyo. Ukusokolola 12:10 kulosha kuli Satana nga “uubepesha bamunyinefwe, uubabepesha . . . akasuba no bushiku ku cinso ca kwa Lesa wesu!” Lelo kemba wa malumbo aimbile pali Yehova, ukuti: “Amampuulu nga mwayamwensekesha, mwe Yehova, mwe Shikulu, nani uwingeminina? Pantu kuli imwe kwabo kulekelela abalapila.”—Amalumbo 130:3, 4.

Ilyo Ukutontonkanya Kwalubana Kushakabeko

We kwilulukwa uko ifibumbwa fya mupashi bayumfwile ilyo Satana Kaseebanya ne fibanda fyakwe fyapooselwe ukufuma mu muulu! (Ukusokolola 12:7-9) Pa numa ya ico, iyi mipashi yabipa tayakwete amaka pa fyo ulupwa lwa bamalaika aba kwa Yehova lwalecita.—Daniele 10:13.

Ku nshita ya ku ntanshi iipalamishe abekashi ba mu calo bakasekelela. Nomba line, malaika ukufuma ku muulu no lufungulo lwa cilindi ca ku mbo no munyololo ukalamba mu minwe yakwe akekata Satana ne fibanda fyakwe ukufipoosa mu cilindi umo fishakakwete amaka ya kucita ifyabipa. (Ukusokolola 20:1-3) Ifyo tukelulukwa ico nga cacitika!

Lelo pali ino nshita, tufwile ukuibaka ku kutontonkanya kwalubana. Ilyo lyonse twasanga ukuti amatontonkanyo yabipa yaleisa mu muntontonkanya wesu, tufwile ukuyakaana pa kutontomesha amatontonkanyo yesu pa fyo Yehova atutemwa. Nga twacita ifyo lyena, ‘umutende wa kwa Lesa uwacila amatontonkanyo yonse ukalalinda imitima yesu na matontonkanyo yesu.’—Abena Filipi. 4:6, 7.

[Icikope pe bula 26]

Yobo alikeene amatontonkanyo yabipa

[Icikope pe bula 28]

Lote asambilile ukuti Yehova ni Kateka uumfwikisha