Amepusho Ukufuma ku Babelenga

Bushe ukuteya ifyangalo fya pa kompyuta ifya lukaakala kuti kwaonaula bucibusa bwesu na Yehova?

Imfumu Davidi iya mu Israele wa ku kale yalembele aiti: “Yehova aceeceeta umulungami no mubifi, Na onse uwatemwa ulukaakala alimupata.” (Amalumbo 11:5, NW) Ishiwi lya ciHebere ilyapilibulwa ukuti “ulupato” kuti lyalosha na ku muntu “umulwani.” E ico, onse uwatemwa ulukaakala alaicito mwine umulwani wa kwa Lesa. Kanshi icipusho ico tufwile ukutontonkanyapo ca kuti: Bushe ukuteya ifyangalo fya pa kompyuta fimo kuti kwatulenga ukutemwa ulukaakala?

Ifyangalo fya pa kompyuta ifya lukaakala fikoselesha ukubomfya ifyanso. Ilingi line fisambilisha uulefiteya ifya kulwa inkondo. Magazini wa The Economist atile: “Icalo ca Amerika cilabomfya sana ifyangalo fya pa kompyuta nge ca kusambilishishako abashilika ifya kulwa inkondo. Ifyangalo fimo fimo ifyo abashilika babomfya filasangwa na ku bantu abashili bashilika.”

Ca cine ukuti abateya ifyangalo fya pa kompyuta ifya lukaakala tabepaya abantu ba cine cine. Lelo apo balasala ukuteya ifi fyangalo, cinshi ici cilangilila ku cilecitika ku mitima yabo? (Mateo 5:21, 22; Luka 6:45) Bushe kuti mwamona shani umuntu uumfwa bwino ukulasaula abantu aba kwelenganya fye, ukubapike mfuti, ukubalemanika, no kubepaya? Tutile uyu muntu alepoosa ama-awala ayengi cila mulungu ukulateya ifi fyangalo, ica kuti cikanga akunkume no kukunkuma kuli fyena. Kwena, kuti mwatila aleluminisha ukutemwa ulukaakala, kwati fye ni filya umuntu uutamba ifye shiku aluminisha ulunkumbwa lwalubana.—Mateo 5:27-29.

Bushe Yehova apata shani uwatemwa ulukaakala? Davidi atile Yehova ‘alimupatisha.’ Mu nshiku sha kwa Noa, Yehova alangile ukuti alipata sana abatemwa ulukaakala. Yehova atile kuli Noa: “Impela ya bantunse bonse naiisa pa cinso candi; pantu pe sonde paisulapo [ulukaakala, NW] ulwafuma kuli bene; kabili, mona, ine ndebonawila kumo ne sonde.” (Ukutendeka 6:13) Lesa wa cine aonawile balya bantu bonse pa mulandu wa mibele yabo iya lukaakala. Apuswishe fye Noa no lupwa lwakwe—abantu 8 abashatemenwe ulukaakala.—2 Petro 2:5.

Abafwaya ukuba ifibusa fya kwa Yehova ‘balafule mpanga shabo shibe ifya kuliminako umushili, na mafumo yabo yabe ifya kutungwilako imiti.’ Ukucila ukusambililo kutemwa ulukaakala ‘tabasambilila kabili ubulwi.’ (Esaya 2:4) Pa kutwalilila ukuba ifibusa fya kwa Lesa, tufwile ‘ukutaluka ku cabipa no kucita icisuma.’ Tufwile ‘ukufwaya umutende no kuukonkelela.’—1 Petro 3:11.

Tutile twalitendekako kale ukuteya ifyangalo fya pa kompyuta ifya lukaakala, cinshi tufwile ukucita? Lyena tulekabila ukupampamina pa kutemuna Yehova ukupitila mu kukaana ukucita ico apata. Tufwile ukupepela sana ukwafwa kwa mupashi wa kwa Lesa pa kuti tuleke imisango iingonaula bumupashi bwesu. Kuti twaleka nga ca kutila twasuminisha imibele pamo nga umutende, ubusuma, no kuilama ukulatungulula imikalile yesu aya bukapepa.—Luka 11:13; Abena Galatia 5:22, 23.