Masambililo Nshi Ayengamulenga Ukwikala Bwino?

BUSHE mwalitala amupeshiwapo amano ku mafya ica kuti mwafilwa ne fya kucita? Ifyo mwingacula nga mwapingwilepo bubi bubi ilyo mulepwisha ayo mafya! Takwaba umuntu uutila fyonse ifyo apingula ninshi fili bwino, kabili uufyalwa na mano aya kupwisha amafya yonse. Uyu e mulandu wine ukusambilila kwacindamina. Lelo ni kwi mwingasambilishiwa bwino ifya kupwisha amafya?

Abantu abengi, abakalamba na banono, balicindamika sana amasambililo. Abasoma bamo basosa fye no kuti “balisumina ukwabula no kutwishika ukutila umuntu te kuti asange incito isuma nga tasambilila sana.” Lelo, kwaliba imibele iyo abantu bafilwa ukukwata nangu basambilile shani. Ku ca kumwenako, bushe ukusambilila sana kuti kwamwafwa ukuba umufyashi, umulume, umukashi nelyo cibusa musuma? Na kuba, abantu abo bakumbwa ukutila balisambilila sana, limo balaba ne mibele iyabipa, balafilwa ukusunga bwino ulupwa lwabo, e lyo limo balaipaya fye no kuipaya.

Abantu bamo bamona kwati ku macalici eko bengasambilishiwa bwino, lelo balafuupulwa pantu tababasambilisha ifintu ifingabafwa ukupwisha amafya bapitamo. Ukulangilila ifyo ciba baEmiliaa abena Mexico batila: “Napapita imyaka 15 apo nayumfwile ukuti ine no mulume wandi te kuti tutwalilile ukwikala pamo. Twaleumana fye umo shacela. Nalyeseshe ukumulesha ukunwa lelo nalifililwe. Ilingi line nalesha abana besu abanono beka ukuya ndefwaya umulume wandi. Nshaishibe ne fya kucita. Ilingi line naleya ku calici ukufwayako icinganjafwa ukupwisha ubwafya. Nangu cingatila Baibolo yalebelengwa lyonse, nshaumfwilepo ukufunda ukuli konse ukwalelanda pa bwafya nakwete mu kulungatika, takwali fye nangu umo uwanjebeleko ifya kuti ncite. Ukwikala mwi calici pa kashita kanono ukulabwekeshapo fye amapepo yamo yamo, takwanjafwile.” Bambi na bo kuti bafulunganishiwa ilyo bamona abalebatungulula mu mapepo balecita ifintu fyabipa. Ne ci calilenga abengi ukusuula amapepo, bamona kwati tapali ifyo bengasambililako ifingabalenga ukwikala bwino.

E ico, nalimo kuti mwayipusha amuti, ‘Masambililo nshi ayenganenga ukwikala bwino?’ Bushe ubuKristu bwa cine kuti bwayasuka ili lipusho lyacindama? Ifi e filelandwapo mu cipande icikonkelepo.

[Futunoti]