Nonkelenimo mu Masambililo Yacindamisha!

BAIBOLO itila Yehova Lesa e Kalenga wa fintu fyonse, ukusanshako na bantu. (Ukutendeka 1:27; Ukusokolola 4:11) Apo ni Kasambilisha Mukalamba, asambilishe Adamu na Efa pa kuti bakekale bwino mwi bala lya yemba ilya Edeni. Lesa afwaile ukutwalilila ukubasambilisha no kubasakamana ku ciyayaya. (Ukutendeka 1:28, 29; 2:15-17; Esaya 30:20, 21) Ala kwena balikwete ishuko!

Nomba, ku ca bulanda, aba bantu ba kubalilapo bapanishe lilye shuko. Bucintomfwa bwabo bwalengele imibele ne mibili ya bantunse ukonaika. (Ukutendeka 3: 17-19; Abena Roma 5:12) Baibolo ilanda pa bantu abaikeleko pa numa lintu abantunse ba kubalilapo babumbilwe, ukutila: “Yehova amwene ukuti ububi bwa bantu bwafula pano isonde, amwene no kuti amatontonkanyo ya mitima yabo yalola mu kucito bubi inshiku fye shonse.”—Ukutendeka 6:5, NW.

Imyaka mupepi na 4,500 naipitapo ukutula apo Yehova alandile ukuti abantunse balilemenene ku kucita ububi inshita yonse, pali lelo imibele ya bantu naibipisha ukucila kale lyonse. Abengi balabepa ubufi ukwabula no kumfwa insoni, baleba, nelyo ukusansa abantu bambi. Amafya yalefulilako fye cila bushiku, lelo ukusakamana umuntu munensu kwena kulecepelako fye. Bushe tatulemona uko bucibusa na bantu banensu nangu fye mu lupwa buli mu bwafya? Lelo, Lesa te ulenga imibele tumona ndakai, kabili te kuti tulande ukutila Lesa alileka ukusakamana abantu mu mafya bapitamo. Yehova alibika amano ku mikalile ya bantu, kabili alafwaisha ukusambilisha abafwaya ukutungululwa na wena pa kuti basange imikalile isuma. Imyaka mupepi na 2,000 iyapita Lesa atumine Umwana wakwe Yesu Kristu kwi sonde, kabili alangishe ukuti alefwaisha ukusambilisha abantu abalefwaya ukwikala bwino. Yesu ashile amasambilisho ayasuma sana pantu asambilishiwe na Kasambilisha Mukalamba pa myaka ishishibantu.

UbuKristu bwa Cine Bulasambilisha

Yesu Kristu e watendeke ubuKristu bwa cine, e kuti imikalile iyashimpwa pa kutemwa. Ifyo Abena Kristu ba cine batontonkanya, ne fyo bacita fifwile ukulingana ne fyo Lesa afwaya. Ubufwayo bwa kucitile fyo kuleta umucinshi no bukata kwi shina lyakwe. (Mateo 22:37-39; AbaHebere 10:7) Uwaletungilila Yesu mu fyo alesambilisha abantu pa fyo bafwile ukulaikala ni Wishi, Yehova. Pali Yohane 8:29 tubelengapo ifyo Lesa aleafwa Yesu, patila: “No wantumine aba na ine; tandeka neka iyo, pantu lyonse ncita ifya kumutemuna.” Ca cine, Wishi alitungilile no kutungulula Yesu mu butumikishi bwakwe bonse. Ilyo abakonshi ba kwa Yesu aba kubalilapo balepita mu mesho, lyonse Yehova alebatungulula. Alebasambilisha ukupitila mu Mwana wakwe, kabili ukulakonka amasambilisho ya kwa Yesu ne ca kumwenako cakwe kwabalengele ukuba abantu basuma. Ifi fine e fyo caba na ku basambi bakwe pali lelo.—Moneni umukululo uleti “Ifyo Amasambilisho ya kwa Yesu Yakumine Abantu,” pe bula 6.

Pa fishibisha ubuKristu bwa cine, paba na masambililo ayafika sana abantu pa mutima, ayalenga ukuti balule mibele yabo. (Abena Efese 4:23, 24) Ku ca kumwenako, ilyo Yesu asambilishe abantu pa kuba aba cishinka ku banabo ba mu cupo, atile: “Mwalyumfwa ifyo casoselwe aciti, ‘Wilacita bucende.’ Lelo ine ndemweba nati onse uwatwalilila ukulolesha umwanakashi no kumukumbwa, ninshi nacita kale ubucende nankwe mu mutima wakwe.” (Mateo 5:27, 28) Ilyo Yesu alelanda aya mashiwi, alesambilisha abasambi bakwe ukuti umutima ufwile ukusungwa uwa busaka. Na kabili atile mu fyo umuntu atontonkanya nga muli ifyabipa, nangula taficitile, kuti mwafuma ifintu fyabipa. Amatontonkanyo yabipa kuti yalenga umo ukucita ifintu ififulwisha Lesa no kucena bambi?

E ico Baibolo ifunda ukuti: “Mwipalana no bwikashi buno, lelo musangulwe pa kwalula amatontonkanyo yenu, ukuti mushininkishe mwe bene icabo kufwaya kwa kwa Lesa icisuma kabili icapokelelwa kabili icapwililika.” (Abena Roma 12:2) Kuti nalimo mwaipusha amuti : ‘Bushe ukusambilila kuti kwayalula ifyo umo atontonkanya?’ Ukwalula amatontonkanyo kusanshamo ukulenga umuntu ukutontonkanya ifintu fimbi ifipuseneko ne fyo acilatontonkanya. Kuti acita ifyo pa kulatontonkanya pa mafunde ne fishinte fyaba mu Cebo ca kwa Lesa. Ici kuti cacitika ngo muntu asumina ukusambilila ifyo Lesa apayanya mu Cebo cakwe.

Abantu Bayalulwa

“Icebo ca kwa Lesa ca mweo kabili ca maka.” (AbaHebere 4:12) Baibolo icili ilealula abantu umo umo, ubu bushininkisho bwa kuti tayaleka ukubomba. Kuti yalenga umuntu ukufwaisha ukwalula imibele yakwe, no kumulenga ukuba Umwina Kristu wa cine, kabili kuti aba umuntu musuma nga nshi. Ifya kumwenako fyalakonkapo fyalatulanga umulandu amasambililo ya Baibolo yacindamina.

BaEmilia, abalumbwilwe mu cipande cafumako, batila: “Ukwesha ukupwisha ubwafya ku maka yandi fye takwali na kunjafwa ukuwamye ifintu pa ng’anda. Lintu natendeke ukusambilila Baibolo ne Nte sha kwa Yehova, natendeke ukumona ukuti ifintu kuti fyawama kabili nalyalwile imibele yandi. Nasambilile ukuba uwatekanya kabili uushifulwa bwangu. Mu kupita kwa nshita, abalume bandi batendeke ukusambilila Baibolo pamo na ine. Tacabangukile ukuleka ukunwa, lelo balilekele. Ici calengele ukuti nomba tuwamye icupo cesu. Nomba, tuli Bena Kristu aba nsansa kabili tulasambilisha abana besu ifishinte fisuma ifya mu Baibolo.”—Amalango 6:7.

Amasambililo ayo ubuKristu bwa cine busambilisha yalalenga umuntu ukuleka ukucita ifintu fyabipa na bucisenene. Ici e cacitikile baManuel.a Ilyo bali ne myaka 13, balibutwike pa ng’anda kabili batendeke ukupeepa ibange. Mu kupita kwa nshita, batendeke ukubomfya heroin. Pa kusanga umwakulala ne ndalama, baleibimba muli bucisenene na baume banabo e lyo na banakashi. Limo limo pa kuti baManuel basange umwakulila, balepuma abantu no kubebila indalama. Inshita yonse balepeepa imiti ikola. Ulukaakala balecita lwalelenga ukuti libili libili baleingila mu cifungo. Inshita imo bakakilwe imyaka ine, kabili mulya mwine mu cifungo batendeke ukushitisha ifyanso. Ilyo, baManuel baupile, batwalilile fye ukucula umulandu ne misango yabo. Balanda abati: “Twatendeke ukwikala mu cali kale icitele ca nkoko. Ndeibukisha umukashi wandi ukwipikila pa matafwali. Imikalile yalibipile icine cine, ica kuti balupwa lwandi baebele umukashi wandi ukumbutuka.”

Cinshi calengele ukuti baaluke? BaManuel basosa abati: “Nte twaishibene nankwe aishile ku ng’anda ku mwesu no kulanda pali Baibolo. Nalisumine ukulantandalila pa kuti fye nkamulange ukuti takwaba Lesa uusakamana abantu. Namwene ukuti ine Lesa talensakamana. Nalipapile ifyo uyu Nte ali uwatekanya kabili uwa mucinshi ne ci calengele ukuti nsumine ukusangwa mu kulongana ku Ng’anda ya Bufumu. Nangu bamo mu Ng’anda ya Bufumu balishibe imibele yandi, balimpokelele bwino. Banengele ukuyumfwa kwati nali umo uwa bene. Ici calinkoseleshe apakalamba. Canengele ukupingulapo ukuleka ukubomfya imiti ikola, kabili natampile no kufwaya incito isuma. Ilyo papitile imyeshi ine apo natendekele ukusambilila Baibolo natampile ukushimikila, kabili pa numa ya myeshi ine na imbi nalibatishiwe ukuba umo uwa Nte sha kwa Yehova.”

Bushe ubuKristu bwa cine bwa-afwa shani baManuel no lupwa lwabo? BaManuel basosa abati: “Nshiletwishika ukuti nga nshasambilile Baibolo nga nafwile kale sana. Amasambilisho ya kwa Yesu Kristu yalengele ulupwa lwandi ukubwelela kuli ine. Abana bandi babili tabafwile ukupita mu fyo napitilemo ilyo nali umwaice. Ndayumfwa uwa cilumba kabili ndatasha kuli Yehova pa fyo tumfwana bwino no mukashi wandi. Abengi abaali abanandi kale balantasha no kunjeba ukuti imikalile yandi nomba naicilapo ukuwama.”

BaJohn, abekala mu ncende ikalamo abapiina sana mu South Africa, baishileishiba ukuti imikalile ya Bwina Kristu ipilibula ukuba uwa busaka mu mibele na ku mubili. Balondolola ukuti: “Inshita shimo umwana wesu umukashana talesamba pa mulungu untuntulu, kabili takwali no walepoosako amano ukuti tasambile.” Abakashi babo basumina ukuti ing’anda yabo yali iyafiko sana. Lelo pa mulandu wa masambililo ya Bwina Kristu, ifintu fyaliwemeko. BaJohn balekele ukwangala na bapuupu abaleiba imyotoka, kabili batendeke ukulapoosako sana amano ku lupwa lwabo. BaJohn batila: “Twasambilile ukuti nga Bena Kristu, tufwile ukusunga imibili yesu ne fya kufwala ifya busaka. Nalitemwa amashiwi yaba pali 1 Petro 1:16, apa tukonkomesha ukuba aba mushilo pantu Yehova Lesa wa mushilo. Nomba tuleesha ukuwamya ing’anda yesu pa kuti ilemoneka bwino.”

Kuti Mwasanga Amasambililo Yacindamisha

Ifya kumwenako filandilwepo pa muulu e ficitika ilingi line. Ukusambilila Baibolo kwalenga ukuti abantu abengi baleikala bwino. Balabatasha ku babengisha incito pa mulandu wa kuti balabombesha kabili bafumacumi. Balisanguka abena mupalamano basuma ne fibusa fisuma, abasakamana abantu banabo. Bapampamina pa kukanacite fyabipa ne fintu fimbi ifyalubana ifyo umubili ufwaisha. E mulandu wine balaisakamana bwino ku mubili, ku mutontonkanya, na mu nkuntu. Mu nshita ya kuti baleonaula indalama shabo pa fibelesho fyabipa, balashibomfya ukushitamo ifintu ifingabafwa pamo no lupwa lwabo. (1 Abena Korinti 6:9-11; Abena Kolose 3:18-23) Ukwabula no kutwishika, ififuma mu kubomfya ifyo Yehova alanda mu Baibolo filangilila fye ukuti ukwikala mu kufwana no buKristu bwa cine e mikalile isuma sana mu bumi, iipeela amasambililo yacilapo ubusuma. Umuntu uucita ifyo amafunde ya kwa Lesa yalanda, Baibolo itila: “Conse ico acita cikalengwo kushuka.”—Amalumbo 1:3.

Caliwama ukwishiba ukuti Lesa Wa maka yonse Yehova alafwaisha ukutusambilisha. Yehova alanda pa lwa mwine wine ukuti: “Ine ndi Yehova Lesa obe, uukusambilisho kuti ucenjele, uukwensha mu nshila iyo ufwile ukuyamo.” (Esaya 48:17) Ca cine, Yehova alitulanga inshila ukupitila mu ca kumwenako na mu masambilisho ya Mwana wakwe, Yesu Kristu. Amasambilisho ya kwa Kristu yalyalwile imikalile ya bantu abengi abamwishibe ilyo ali pe sonde. Cimo cine na lelo, abengi abakonka amasambilisho yakwe baleyalula imikalile yabo. Mulandu nshi te kusanga inshita iya kuti musambilile ifingi pali aya masambilisho? Inte sha kwa Yehova uko mwikala bakafwaisha ukumwafwa ukusambilila ifyo fintu fyacindama.

[Futunoti]

[Akabokoshi ne Cikope pe bula 6]

Ifyo Amasambilisho ya kwa Yesu Yakumine Abantu

Ukubomfya icifulo ca kwe nga kasonkesha mukalamba, Sakeo alinonkele pa kulapokolola indalama no kwibila abantu yaweyawe. Lelo alyalwile ubumi bwakwe pa kubomfya ifyo Yesu asambilishe.—Luka 19:1-10.

Sauli umwina Tarsi alilekele ukupakasa Abena Kristu kabili asangwike Umwina Kristu, uwaishileba umutumwa Paulo.—Imilimo 22:6-21; Abena Filipi 3:4-9.

Abena Kristu bamo mu Korinti baali ‘abalalelale, abapepo tulubi, abaume abalaala na baume banabo, abapuupu, abafunushi, bacakolwa, kabili abatukana.’ Lelo, pa numa ya kusambilila pa buKristu bwa cine, ‘balisambilwe, ukushishiwa, no kulungamikilwa mwi shina lya kwa Shikulwifwe Yesu Kristu.’—1 Abena Korinti 6:9-11.

[Icikope pe bula 7]

Baibolo kuti ya musambilisha ifyo mwingekala bwino