Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Nga e fyo cali, moneni nga kuti mwayasuka amepusho yakonkapo:

• Cinshi cingamwafwa ukushipikisha nga ca kutila lupwa lwenu aleka ukupepa Yehova?

Ikuuleni mu citetekelo kabili kuuleni na bambi aba mu lupwa lwenu abacili balepepa Yehova pamo na imwe. Mulebombesha imilimo ya Bwina Kristu. Muleafwako bambi. Mwileka isubilo lyenu ukupwa ilya ukuti bushiku bumo lupwa lwenu akabwela kuli Yehova. Mwilaipeela imilandu. Cindikeni umusango Yehova afundilamo abalufyanya kabili shimikileniko ifibusa fyenu ifili ku mutima.—9/1, amabuula 18-21.

• Fintu nshi fibili ifyo Amalembo yalandapo ifitwafwa ukwishiba “inshiku sha kulekelesha”?

Baibolo ilalanda pa fintu ifili no kucitika “ku mpela ya bwikashi.” (Mateo 24:3, 7, 8; Luka 21:11) Kabili ilalanda na pa fyo abantu “mu nshiku sha kulekelesha” bakaaluka mu mibele e lyo na mu fyo bacita. (2 Timote 3:1-5) Icacindamisha ca kutila imbila nsuma iya bufumu ifwile ukushimikilwa pali iyi ine nshita.—9/15, amabuula 4-6.

• Cinshi icilonganino cilingile ukucita nga ca kuti Umwina Kristu uuleensha motoka apanga ubusanso ica kuti mwafwa na bantu?

Baeluda abalebombela pa mulandu kuti basanga ukutila tali no mulandu wa mulopa pantu tapali ico ali no kucita ku kucilikila ubusanso. Lelo nga ca kuti ali no mulandu wa mulopa kabili uulufyenye alapila, bakamwebaula ukulingana na Malembo kabili akaba pa fibindo, e kuti bakamulesha ukubombako imilimo ya mu cilonganino.—9/15, ibuula 30.

• Mulandu nshi ukwikala umuyayaya kushashintilila pa kulunduluka kwa bantunse mu fya sayansi?

Basayatisiti baleesha na maka ukufwaisha ukulefyako ubumi bwa muntu pa kucitapo fimo ifingalenga insandesande ukutwalilila fye ukulapanga isha kupyana pa shibiye ilyo shafwa nelyo ukubomfya insandesande ishituntulu ukufuma mu cilundwa cimbi. Lelo Baibolo itila inshila yeka fye iyo abantunse bengabela no mweo wa muyayaya kupitila mu cilubula ca kwa Yesu.—10/1, amabuula 3-5.

• Bushe ulubatisho lwafuma ku lutambi abaYuda balekonka pa kusamba?

Awe nakalya. Ukulingana ne Funde lya kwa Mose, lyonse ilyo kapepa wa kwa Lesa akowela alekabila ukuisangulula, ifi te fyo cali ku lubatisho lwa kwa Yohane. Umwina Kristu alebatishiwa fye umuku umo, takwaleba ukubwekeshapo.—10/15, amabuula 12-13.

• Bushe Isukulu lya Kukansha Ilya Butumikishi lisukulu nshi?

Iisukulu lya baeluda na babomfi batumikila abashimbe ilisenda imyeshi ibili kabili abasangwako ni balya balefwaya ukubatuma ukuyabombela ukuli ukukabila. Limo balabwelela ku filonganino bafumineko, limbi balabatuma ku cilonganino cimbi mu calo cabo cine, nelyo ku calo cimbi.—11/15, amabuula 10-11.

• Bushe mukaanya Kristu uwalumbulwa pali 1 Yohane 2:18; 4:3 e nani?

Mu cinkumbawile ishiwi lya kuti “mukaanya Kristu” lilosha kuli bonse fye abakaanya nelyo ababepa ukuti ni ba Kristu nelyo abatila balamwimininako. Amashiwi ya kwa Yesu na ya kwa Yohane yalelanga ukuti mukaanya Kristu te muntu umo lelo bantu abengi abafwaya sana kufutika abantu mu fya mapepo no kukaana Ubufumu bwa kwa Lesa.—12/1, amabuula 4-6.