Palameni Kuli Lesa
Umufyashi Umusuma Sana Pali Bonse
ISHIWI lya kutila “batata” lilomfwika bwino sana ku bantu abengi. Wishi uwatemwa abana bakwe ukufuma pa nshi ya mutima, alabafwa ukukula bwino. E calenga na Baibolo ileita Yehova Lesa ukutila, “Shifwe.” (Mateo 6:9) Bushe Yehova mufyashi wa musango nshi? Pa kwasuka ici cipusho, natulande pa mashiwi Yehova aebele Yesu ilyo alebatishiwa. Pantu na kabushe ifyo wishi alanda no mwana filalanga nampo nga mufyashi musuma nelyo iyo.
Mu mwaka wa 29 C.E., muli ba October, Yesu aile ku mumana wa Yordani ku kubatishiwa. Baibolo ishimika ukutila: “Ilyo abatishiwe, Yesu apo pene aninine ukufuma mu menshi; kabili, moneni! umuulu waliceneme, kabili amwene umupashi wa kwa Lesa uleika kwati ni nkunda uleisa pali wene. Moneni! kabili, kwali ne shiwi ukufuma mu muulu aliti: ‘Uyu e Mwana wandi, uwatemwikwa, uo mbekelwamo.’”a (Mateo 3:16, 17) Apo uwalandile aya mashiwi ni Yehova umwine, yaletulanga fye ifyo uyu mufyashi aba. Moneni ifintu fitatu ifyo Yehova aebele Umwana wakwe.
Intanshi, ilyo Yehova atile “uyu e Mwana wandi,” aleeba Yesu ukutila ‘Ndomfwa bwino ukuti nine Wiso.’ Wishi uwiluka alabika amano ku bana bakwe no kubasakamana. Cila mwana afwile ukulamona ukutila alicindama mu lupwa aba. Elenganyeni ifyo Yesu aumfwile bwino ilyo Wishi amwebele aya mashiwi nangu ca kutila iyi nshita Yesu ninshi mukalamba!
Ica bubili, ilyo Yehova alandile pa lwalala ukutila Yesu mwana wakwe “uwatemwikwa,” alelanga ifyo atemwa Yesu. Ico Yehova aleeba umwana wakwe ca kutila, ‘nalikutemwa.’ Wishi umusuma aleba abana bakwe ukutila alibatemwa sana. Nga ca kutila umufyashi ale-eba abana ukuti alibatemwa, alecita ne filanga ukuti alibatemwa, abana balakula bwino. Yesu afwile alyumfwile bwino sana ukumfwa Wishi alanda ukuti alimutemwa!
Ica butatu, amashiwi ya kutila “e mo mbekelwa,” yalanga ukutila Yehova alabekelwa mu Mwana wakwe. Muli aya mashiwi, Yehova aleeba Yesu ukutila, ‘Mwana wandi, natemwa sana pa fyo wacita.’ Wishi uwatemwa abana, alafwaya ukubalanga ukuti alomfwa bwino pa fisuma ifyo balanda ne fyo bacita. Abana tabanenuka kabili balashipa nga ca kutila abafyashi balebalanga ukuti ifyo bacita fisuma. Na Yesu wine afwile alikosele ilyo aumfwile Wishi amweba ukutila alitemenwe ifyo acitile!
Cine cine, Yehova mufyashi umusuma sana ukucila bonse. Bushe mulafwaya ukukwata umufyashi wa musango yu? Nga mulafwaya ico, ishibeni ukutila na imwe Yehova kuti aba mufyashi wenu nga mwapalama kuli ena. Nga ca kutila mwamwishiba no kumucetekela, mwatendeka no kucita ukufwaya kwakwe no mutima wenu onse, akamutemwa. Baibolo itila: “Palameni kuli Lesa, na o akapalama kuli imwe.” (Yakobo 4:8) Ala ukupalama kuli Yehova Lesa, umufyashi umusuma sana pali bonse, kukamuletela insansa ishingi sana!
[Futunoti]
a Mu lyashi limbi ililanda pali uyu mulandu ilyaba mwi buuku Luka alembele, Yehova atile “Ni we Mwana wandi, uwatemwikwa; muli iwe e mo mbekelwa.”—Luka 3:22.