Ababelenga Ino Magazini Balepusha Ukuti
Bushe Lesa E Uleta Amasanso Yafuma ku Fyabumbwa pa Kuti Atukande?
Amasanso yafuma ku fyabumbwa, te Lesa ayaleta pa kuti akande abantu. Tacitapo ica musango yu kabili takabale acicita. Mulandu nshi? Pantu pali 1 Yohane 4:8, Baibolo isosa ukutila, “Lesa kutemwa.”
Muli fyonse ifyo Lesa acita mulaba ukutemwa. Umuntu uwaba ne citemwiko tacusha bakaele pantu Baibolo itila, “ukutemwa takucita cabipa ku munensu.” (Abena Roma 13:10) Pali Yobo 34:12, na po Baibolo itila: “Cine cine Lesa tabifya.”
Ca cine, Baibolo yalisobele ukuti mu nshiku shesu mukaba amasanso pamo nga “ifinkukuma fikalamba.” (Luka 21:11) Lelo te kuti tutile Yehova e ulenga amasanso yafuma ku fya bumbwa ukucitika, nga filya fine tushingalanda ukuti ababilisha ukuti kuli no kuba inkuuka e balenga yabako. Nga ca kuti Lesa te uleta amasanso yacitika pano isonde, ninshi cinshi cilenga yalecitika?
Baibolo isosa ukuti: “Icalo conse calala mu maka ya mubifi,” Satana Kaseebanya. (1 Yohane 5:19) Ukutula apo apondokele, lilya line fye abantu babumbilwe, ukufika na lelo, Satana alepaya abantu. (Yohane 8:44) Satana tacindika ubumi bwa bantu, kuli ena bwa cabe cabe. Ifyo acita fyonse fya bukaitemwe, e calenga na bantu bakwe bonse pano calo, babe abaitemwa. Muno nshiku abantu tabamona ukuti cibi ukuliila abanabo pa mutwe, kabili abengi abashakwata ba kubalandilako balasuka balaikala mu fifulo umuba amasanso yafuma ku fyabumbwa nelyo ayo abantu abene baleta. (Abena Efese 2:2; 1 Yohane 2:16) Kanshi abafunushi e balenga kwaba amasanso yamo ayaponena abantu. (Lukala Milandu 8:9) Mulandu nshi twasosela ifyo?
Abantu na bo balacitako fimo ifilenga kwaba amasanso. Tontonkanyeni pa cacitike ku bekashi mu musumba wa New Orleans, ku United States, uwabundile ilyo kwaishile amenshi ukufuma muli bemba. E lyo tontonkanyeni na pa fyo amayanda yaonawilwe ku fimatipa fya maka mu mpili shabela mu lulamba ku Venezuela. Muli aya masanso yonse yabili, umwela ne mfula fyalengele kwaba akayofi pa mulandu wa kutila abantu muli ishi ncende tabaishibe nangu cimo pa masanso yafuma ku fyabumbwa. Cimbi na co kukanakuula bwino amayanda, no kukanaumfwila ukusoka, e lyo kabili aba buteko tababika amano ku milimo yabo.
Natulande pa busanso Baibolo yalandapo ubwacitike ilyo Yesu ali pano calo. Kwali ulupungu lwabongolweke ulwaipeye abantu 18. (Luka 13:4) Napamo icalengele, ni co tabalukuulile bwino, nangu limbi ni “nshita ne ca mankumanya,” atemwa fyonse fibili. Lelo ico tushitwishika ca kutila, te Lesa wabongolwele lulya lupungu pa kuti akande abantu.—Lukala Milandu 9:11.
Lelo bushe Lesa alibala aletapo amasanso? Ee, nomba tayali nga yafuma ku bantu, pantu amasanso Lesa aleleta yaleipaya fye incitatubi lelo abakaele balepusuka. E lyo kwali ne calelenga ukuti Lesa alete amasanso, lelo amasanso aleleta yaleba fye ya limo limo. Amasanso yabili ayo Lesa aletele ku bena kale, Lyeshi lyakumene fye isonde lyonse mu nshiku sha kwa Noa, e lyo no konaulwa kwa misumba ya Sodomu na Gomora mu nshiku sha kwa Lote. (Ukutendeka 6:7-9, 13; 18:20-32; 19:24) Muli yalya mapingushi, Lesa aonawile fye ababifi lelo abalungami alibapuswishe.
Icishinka ca kutila, Yehova Lesa alafwaya sana ukupwisha ukucula, kabili alikwata amaka e lyo alishiba ne fya kupwisha aya masanso yacusha abantu. Amalumbo 72:12 yalanda pali Yesu Kristu Imfumu Lesa asonta ayati: ‘Akapokololo mubusu uwakuuta, no mulanda, no ushikwete wa kumwafwa.’