Uwapashenye “Umukashana Umwina Israele”

MU 2006, ilyo kwashele fye imilungu ibili ukuti kube Icibukisho ca mfwa ya kwa Yesu, bonse aba pa ng’anda ya ba Sales abekala mu musumba wa Praia Grande ku Brazil, balilembele amashina ya bo balefwaya ukwita ku Cibukisho. Abigayl umwana wabo umukashana uwa myaka 6, na o balimupeeleko akapepala ka kwitilapo umuntu alefwaya ukuti akasangweko. Balimwipwishe uo alefwaya ukwita.

Abigayl atile, “Ndefwaya nkapeele balya baume abansekela lyonse.”

Abafyashi bakwe bamwipwishe ukuti, “Ni besa abo bene?”

Abigayl atile, “Balya abalemana abendela pa ncinga.”

Ilyo papitile inshiku shine, Abigayl alangile abafyashi bakwe abaume alelandapo. Ishina lyabo ni ba Walter, kabili baleikala mupepi ne Ng’anda ya Bufumu. Imyaka 15 iyapita, ilyo ba Walter baali ne myaka 28, baali mu busanso bwa pa musebo ubwabasha no bulebe ukutampila mu musana ukufika ku makasa. Apo ba Walter bakankaala, balikwata abaume babili ababalinda. Ilyo Abigayl apokele uluusa lwa kulanda na ba Walter, abafyashi bakwe baebele ba Walter ukuti umwana wabo alefwaya ukubeta ku Cibukisho.

Ilyo Abigayl abapeele akapepala atile: “Bonse abo tupepa na bo bakwete utupepala twa kwitilapo abantu utwingi, nomba ine bampeeleko fye kamo. Kanshi ni mwe mweka fye ndeita ukuti mukasangweko. Nga mwaisa ninshi na ine nkakwatako umuntu uo njitile. E ico nkatemwa sana nga mwaisa, nga ni Yehova ena akatemwa ukucilapo.”

Pa bushiku bwa Cibukisho, baNte abengi pamo na Abigayl, balewamya pa Ng’anda ya Bufumu apo bali no kukwatila Icibukisho icungulo. Lilya line balewamya Ing’anda ya Bufumu, akasuba, ba Walter balipitile mupepi, kabili ilyo bamwene Abigayl, baebele namutekenya ukuti eminike motoka. Baiswile iwindo no kwipusha Abigayl ifyo alecita. Abigayl ayaswike ukuti balewamya apa kulonganina pa kuti ba Walter basange napawama.

Cilya cungulo umutima wa kwa Abigayl tawaikele. Ilyo ilyashi lyatendeke, alitwalilile ukucebaceba pa kuti amone nga ca kuti ba Walter nabesa. Awe aishilemona fye bafika ninshi bali na balumendo ababalinda. Abigayl alimwentwile icine cine pa mulandu wa nsansa. Ilyo ilyashi lyapwile, ba Walter balandile ukuti, balimine ubulendo bwa kuya ku musumba umbi lelo balibwelulwike no kuya ku Cibukisho pa mulandu fye wa kwa Abigayl. Ba Walter balandile no kuti: “Caliweme nalisangilweko pantu ilyashi lyaliweme sana.” Balombele ukuti babapeleko Baibolo kabili balitampile no kusambilila Icebo ca kwa Lesa no kusangwa ku kulongana.

Bankashi ya ba Walter batile balefwaya sana ukumona Abigayl, uo bandume yabo balelandapo sana. Ilyo bamwishibe, balitemenwe sana ukusanga ukuti Abigayl mwana musuma. Balandile ukuti: “Nomba naishiba ico ndume yandi abela ne nsansa sana.”

Ba Walter balitwalilila ukusambilila Baibolo no kusangwa ku kulongana. Kabili balasukako na mepusho bepusha pa kulongana, e lyo balebako na bantu bambi ifyo balesambilila. Cine cine Abigayl apala umukashana umwina Israele uwayafwilishe Naamani ukwishiba Lesa wa cine Yehova.—2 Ishamfumu 5:2-14.