Bushe Cibi Ukubomfya Ishina lya kwa Lesa?

MU Malembo ya ciHebere, ayo abengi beta ati “Icipangano ca Kale,” ayalembelwe pa kubala, ishina lya kwa Lesa lyabamo imiku mupepi na 7,000. Balilemba mu filembo fya musango yu יהוה (pa kubelenga kufuma ku kulyo ukuya ku kuso). Kanshi apasangwa ishina lya kwa Lesa paba ifilembo ifi fine, Yohdh, He, Waw, na He, ifyo balemba fye ukuti YHWH.

Kale sana abaYuda baletiina ukubomfya ishina lya kwa Lesa. Ici calengele balekaana ukulishimbula. Balilifumishe na mu malembo ya mu Baibolo kabili apo lyalembelwe babikilepo amashiwi yambi. Lelo abapilibula Baibolo abengi balemba ishina lya kwa Lesa ati “Yahweh” nelyo “Yehova.” Baibolo imo umo balemba ishina lya kwa Lesa ukuti “Yahweh” ni Baibolo ya baKatolika iyo beta ati, Jerusalem Bible. Iyi Baibolo itila, ilyo Mose aipwishe Lesa ifyo aali no kweba abena Israele nga bamwipwishe uwamutumine, Lesa ayaswike ati: “Ukebe abana ba kwa Israele auti: ‘Yahweh, Lesa wa bashinwe, Lesa wa kwa Abrahamu, Lesa wa kwa Isaki, kabili Lesa wa kwa Yakobo, nantuma kuli imwe.’ Ili e shina lyandi umuyayaya; e shina abantu bakalankuutilamo ku nkulo ne nkulo.”—Ukufuma 3:15.

Ilyo Yesu alepepa, alandile pe shina lya kwa Lesa ati: “Nabalengele ukwishibe shina lyenu kabili nkalenga liishibwe.” Kabili mwi pepo abantu beta ati Ipepo lya we Shifwe, Yesu atile: “Shifwe wa mu muulu, ishina lyenu libelwe akatiina.”—Yohane 17:26; Mateo 6:9, The Bible in Bemba.

Kanshi kuti catupapusha ukumfwa amashiwi Papa Benedict XVI alembele mu citabo ca nomba line ica kuti, Jesus of Nazareth, (Yesu wa ku Nasarete). Alandile pe shina lya kwa Lesa ukuti: “Abena Israele . . . balilungike ukukanalashimbula ishina Lesa aipeela umwine, ilyakwata ifi filembo YHWH, pantu abalalishimbula nga lyalemoneka kwati talyacindama nga filya amashina ya milungu ya basenshi yashacindama. Na bapilibula Baibolo muno nshiku, na bo bene balilufyanya pa kulembamo ili shina ilyo abena Israele bashaishibe kabili ilyo bashaleshimbula. Bakapilibula bamona kwati ili shina lyaba fye nga mashina yambi aya kale.”

Inga imwe muletipo shani? Bushe cilubo nelyo caliba fye bwino ukubomfya ishina lya kwa Lesa? Apo Yehova umwine e wasosa ukuti: “Ili e shina lyandi ku nkulo ne nkulo, Kabili ici e ciibukisho candi ku nkulo ne nkulo,” bushe pali uwakwata insambu sha kukaana ico asosa?

[Icikope pe bula 30]

Yesu alebomfya ishina lya kwa Lesa