Ikalashi Lyalenga 124 Ilya Bamishonari Lyapwisha Isukulu
Bamishonari Babapashanya Kuli Makanta
LYONSE pa numa ya myeshi mutanda, ilyo bamishonari bapwisha isukulu, kulaba ukulongana. Isukulu lya bamishonari ilya Watchtower Bible School of Gilead lileeta bonse aba pa Bethel ya ku United States ukusangwako kuli uku kulongana. Pa March 8, 2008, abantu ukufuma mu fyalo ukucila pali 30 balongene pamo na ba pa Bethel ilyo abana be sukulu aba mwi kalashi lyalenga 124 balepwisha amasambililo yabo. Bonse abasangilweko, abali 6,411 basekelele capamo na bana be sukulu pali ubu bushiku bwaibela ku bana be sukulu.
Ba Stephen Lett, aba mwi Bumba Litungulula, e bali baceyamani pali uku kulongana. Balandile ilyashi lya kubalilapo ilyaleti “Bombeleni Pamo na Makanta wa Mampalanya uwa kwa Yehova.” Ukusokolola 9:1-4 kupashanya ibumba linono ilya Bena Kristu basubwa, ababukulwile umulimo wa kubombela Lesa mu 1919, kuli makanta iyaima. Abana be sukulu balibebukisheko ukuti apo baba mwi bumba lya “mpaanga shimbi,” balabombela pamo no yu makanta wa mampalanya.—Yoh. 10:16.
Ba Lon Schilling, ababa muli Komiti wa Musambo uwa mu United States, e balandile ilyashi lyakonkelepo ilyaleti “Muletungililana.” Muli ili lyashi balandile sana pa mulume no mukashi, abalembwa mu Baibolo, e kutila Akula na Priska (nelyo Prisila), abali pa Bena Kristu ba kubalilapo. (Rom. 16:3, 4) Muli ili kalashi mwali abaupana 28. Babebukisheko ukuti nga balefwaya bakabombe bwino bumishonari, bafwile ukukosha ifyupo fyabo. Lyonse ilyo Baibolo yalanda pali Akula taishako umukashi wakwe, Priska. E co kanshi umutumwa Paulo ne cilonganino balemwena aba babili kwati muntu umo pantu balebombela pamo. E fyo cifwile ukuba na pali lelo kuli bamishonari abaupana. Bafwile ukulabombela pamo, ukupepela pamo, kabili bafwile ukwikatana lintu baponenwa na mafya yaba mu kubombela mu calo cimbi. Nga balecita ifi ninshi cila muntu aletungilila umunankwe.—Ukute. 2:18.
Ilyashi lyakonkelepo, ilyaleti “Citenipo Cimo pa Busuma bwa kwa Yehova,” lyalandilwe na ba Guy Pierce aba mwi Bumba Litungulula. Munyinefwe Pierce alondolwele ukuti ukuba umuntu umusuma kwalicila pa kukanacita fye ifyabipa. Umuntu umusuma alacitila abantu banankwe ifisuma. Yehova Lesa musuma nga nshi. (Seka. 9:16, 17) Ubusuma bwa kwa Lesa no kutemwa kwakwe kuti kwalenga twalacitila bambi ifisuma. Munyinefwe Pierce asondwelele ilyashi lyakwe na mashiwi ya kutasha abana be sukulu. Abebele ati: “Mulacita ifisuma. Natucetekela ukuti pa mulandu wa busuma bwa kwa Lesa tamwakaleke ukulacitila abantu ifisuma mu mulimo uuli onse uo Yehova Lesa akamupeela.”
Ilyashi lyakonkelepo abalandile ni ba Michael Burnett, ababombelepo bumishonari lelo pali nomba bapeelwa umulimo wa kusambilisha bamishonari. Ilyashi balandile lyaleti, “Cifwaleni nge ca Kukaka pa Mpumi.” Ku bena Israele, ukulaibukisha ifyo Yehova abapuswishe mu cisungusho ukufuma mu Egupti kwali kwati kufwala “ica kukaka pa mpumi.” (Ukufu. 13:16) Abana be sukulu babebele ukulaibukisha ifyo basambilile mwi sukulu lya Gileadi nga filya umuntu engebukisha ukuti nafwala ica kukaka pa mpumi. Munyinefwe Burnett akomailepo ukuti balekabila ukuba abaicefya kabili abafuuka no kulakonka ifishinte fya mu Baibolo nga ca kutila bapusana na bamishonari banabo nangu na bantu bambi.—Mat. 5:23, 24.
Kafundisha umukokole uwa pali ili sukulu, ba Mark Noumair, balandile ilyashi lyaleti “Lwimbo Nshi Bakemba Pali Imwe?” Mu nshiku sha ku kale, abaleya ku nkondo nga babwela nabacimfya, kwaleba ukusekelela no kwimba inyimbo. Ulwimbo lumo pa sho baleimba lwasokolwele umukowa wa kwa Rubene, no mukowa wa kwa Dani, e lyo no mukowa wa kwa Ashere ukuti tabalefwaya ukubombesha, lelo umukowa wa kwa Sebuluni wena baliutashishe pa fyo waipeeleshe. (Abapi. 5:16-18) Ukupala yalya mashiwi ya muli ulu lwimbo, ifyo Umwina Kristu onse acita abantu balasuka bafishiba. Ifyo umuntu aipeelesha mu mulimo wa kwa Lesa ne fyo akonka no mweo onse ubutungulushi ubufuma ku kuteyanya kwa kwa Lesa, Yehova takafilabe kabili ukucita ifi kukalenga bamunyina ukufwaya ukulamupashanya. Ilyo bambi mu cilonganino baleumfwa ulwimbo lwa mampalanya ulwa fyo tucita, bakafwaya ukutupashanya.
Apo umulimo wa kushimikila e po waba pa fyo basambilisha bamishonari, abana be sukulu aba mwi kalashi lyalenga 124 babombele ama-awala yonse pamo mupepi na 3,000 mu mulimo wa kushimikila. Mu lyashi lyaleti “Ukulakonka Ubutungulushi bwa Mupashi wa Mushilo,” e mo abana be sukulu balondolwelele ba Sam Roberson ababa mu Dipartmenti ya Masukulu ya Bulesa ifyo balekumanya mu mulimo wa kushimikila, no kulangililako fimo fimo ifyo fyaleba. Pa numa ya kukutika ku fya kukumanya ifya koselesha pakonkele ilyashi umwali ukwipusha bamishonari abapitile muli ili line isukulu lya Gileadi ababombela mu fyalo fimbi pali nomba. Abatungulwile ili lyashi lya kwipusha ni ba Patrick LaFranca ababa muli komiti wa Musambo uwa ku United States. Abana be sukulu balitashishe nga nshi ukupanda amano uko baumfwile kuli aba bamunyinabo.
Ba Anthony Morris aba mwi Bumba Litungulula e balandile ilyashi lya kulekelesha ilyaleti, “Ibukisheni Ukuti Ifimoneka fya pa Nshita fye Iinono.” Amalembo yatukoselesha ukulatontonkanya pa mapaalo Yehova akatupeela ukucila ukulatontonkanya pa mafya aya pa nshita fye iinono ayo napamo tuleculako. (2 Kor. 4:16-18) Ubupiina bwa kapeleko, ulufyengo, umutitikisha, amalwele, ne mfwa e fyo tumona cila bushiku. Amafya ya musango yu kuti yaponena na bamishonari. Lelo ukulaibukisha ukuti ifi fintu fya pa nshita fye iinono, kukatulenga ukukanaleka ukubombela Lesa kabili kukalenga ukuti tube ne subilo.
Uku kulongana kwapwile ninshi abana be sukulu bonse nabekala pa cisebele balekutika ku mashiwi ya kulekelesha aya kwa Munyinefwe Lett. Abakoseleshe ukukanaleka kabili abebele ati: “Nga ca kuti Yehova aletutungilila takuli ubwesho nangu bumo ubwingatupaatulako kuli ena.” Acincishe bamishonari ukuba nga makanta, ukukanaleka ukubombela Yehova kabili ukuba abacincila, aba cishinka, kabili aba cumfwila umuyayaya.
[Akabokoshi pe bula 30]
IFYEBO NA FIMBI PA BASAMBI
Bafumine mu fyalo: 7
Batumwa ukuyabombela mu fyalo: 16
Abasambi bonse bali: 56
Imyaka ya kufyalwa: 33.8
Imyaka baba mu cine: 18.2
Imyaka babomba umulimo wa nshita yonse: 13.8
[Icikope pe bula 31]
Aba mwi Kalashi Lyalenga 124 Ilya Bamishonari Bapwisha Isukulu
Amashina yali pe samba yalingene na bali pa cikope ukutendekelako no uli ku kuso ukuya ku kulyo, ukutendekela pali aba bali pa ntanshi mpaka na bali ku numa.
(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.
[Icikope pe bula 32]
Isukulu lya Gileadi lyaba pa Watchtower Educational Center