Ifilamba mu Nyambi

UMULUMENDO umo ali ni mbutushi. Alifuupwike icibi ica kuti ifilamba fyalelengalenga mu menso yakwe kabili alombele Lesa wakwe Yehova ukuti abe ne nkumbu no luse kuli ena, kabili atile: “Bikeni ifilamba fyandi mu nyambi yenu.” (Amalumbo 56:8) Uyu mulumendo tulelandapo ni Davidi, uwaishileba imfumu ya bena Israele. Nomba bushe iyi nyambi alelandapo yali ya musango nshi, kabili Lesa kuti abika shani ifilamba fyesu mu nyambi?

Davidi alishibe bwino sana inyambi. Mu nyambi emo balesendela amenshi, amafuta, umwanganshi, nelyo umukaka watikama. Abendauka mu ciswebebe ca Sahara pamo nga ba Tuareg, na nomba balabomfya inyambi isho bapangila ne mpapa sha mbushi nelyo impaanga. Mu nyambi kuti basendelamo amenshi ayengi ukulingana ne fyo inama ikulile. Kabili amenshi basendelamo yalaba ayatalala bwino sana, nangu ca kuti balepita mu ciswebebe umukabile icipesha amano. Kale sana abantu balebomfya impunda nelyo ingamila pa kusenda inyambi. Shino nshiku, abantu balakobeka inyambi pa ntanshi ya myotoka isho babomfya nga bale-enda mu misebo yabipa na mu mpanga!

Filya Davidi alandile pa nyambi kuti fyatusambilishako fimo na ifwe bene. Ukutusambilisha finshi? Baibolo itila icalo twikalamo citungululwa na Satana kabili shino nshiku nakwata “icipyu cikalamba.” Uyu e mulandu muno calo mwabela ubulanda ubwingi nga nshi. (Ukusokolola 12:12) E calenga no kutila abantu abengi abafwaya ukusekesha Lesa baleumfwa kwati ni filya na Davidi aleumfwa. Balacula ne mitima na matontonkanyo kabili balomfwa no bukali mu mibili yabo. Bushe na imwe e fyo mumfwa? Aba bantu tabaleka ukuba ne cishinka kuli Lesa, balatwalilila ukushipa kabili limo “balalila no kulila.” (Amalumbo 126:6) Kuti bacetekela ukuti Shibo uwa ku muulu alamona amesho balekwata kabili aleshiba ne fyo bomfwa. Cine cine alomfwa ububi pa kucula kwa babomfi bakwe, kabili apo wa cikuuku alebukisha ifilamba fyabo na macushi, ica kuti ciba kwati alefisungila mu nyambi.