Bushe Ifi Aba Mapepo Bondapa Lelo Ni Lesa Uubafwa?

MU FYALO fimo, caliseeka sana ukumona abantu baleya ku ncende sha kupepelako uko abengi batila balyundapwa amalwele ayashalepola. Mu fyalo fimbi, ing’anga shitunga ukuti shilondapa abantu ukubomfya amaka ya mipashi. E lyo mumbi mwena, kulaba ukupepela abantu abalwala kabili aba balatoloka ukufuma mu ncinga sha balemana nangu ukupoosa inkonto shabo isha kwendelako no kutila baundapwa.

Abondapa muli iyi nshila bapepa ukwalekanalekana kabili balapeelana ne milandu ya kuti ifyo abanabo bapepa fya bufi kabili fya busenshi. Kanshi kuti twaipusha ukuti, Bushe Lesa alondapa ukubomfya ifilonganino ifyalekanalekana ifishumfwana? Na kuba, Baibolo itila: “Lesa te wa cimfulunganya, ni Lesa wa mutende.” (1 Abena Korinti 14:33) E ico bushe ukundapa kwa musango uyu kufuma kuli Lesa? Bamo abondapa batila ni Yesu e ubapeela amaka ya kundapa. Natulande pa fyo Yesu aleundapa abantu.

Ifyo Yesu Aleundapa Abantu

Inshila Yesu aleundapilamo abalwele shalipusana sana ne sho abondapa muno nshiku bondapilamo. Yesu ena aleundapa bonse abaleisa ukuti abafwe. Taleundapa fye abantu bamo bamo abali mwi bumba e lyo abashala babwelelamo fye ukwabula ukundapwa awe. Ilyo Yesu aleundapa abantu, balepola kabili ilingi line alebondapa fye apo pene. Baibolo itila: “Ibumba lyonse lyalefwaya ukumukumya, pantu amaka yalefuma muli ena no kuundapa bonse.”—Luka 6:19.

Bashimapepo ba nomba nga ca kuti bafilwa ukundapa umuntu, balanda ukuti umulwele takwete icitetekelo. Nomba Yesu te fyo ali, pantu ena aleundapa abantu ninshi tabalamutetekela no kumutetekela. Ku ca kumwenako, inshita imo Yesu aile ku mpofu iishalombele ukuti ayundape kabili aliyundepe. Pa numa, Yesu aipwishe ati: “Bushe uletetekela Umwana wa muntu?” Uyu muntu ayaswike ati: “Mukwai, nani uyo wine ukuti imutetekele?” Yesu amwebele ati: “E ulelanda na iwe.”—Yohane 9:1-7, 35-38.

Nalimo kuti mwaipusha amuti, ‘Nga ca kuti umuntu talekabila ukuba ne citetekelo pa kuti Yesu amundape, cinshi Yesu ilingi ale-ebela abo aundapa ati: “Icitetekelo cobe nacikuposha”?’ (Luka 8:48; 17:19; 18:42) Pa kulanda aya mashiwi, Yesu aleti abo icitetekelo cabo calelenga ukumufwaya baleundapwa, lelo abashalemufwaya bena baleipusula ukundapwa. Abalepola, te citetekelo cabo calelenga ukuti bapole iyo; lelo baleundapwa ku maka ya kwa Lesa. Baibolo ilanda pali Yesu aiti: “Lesa amusubile umupashi wa mushilo na maka, kabili aendawike monse alecita icisuma no kuposha bonse abatitikishiwe na Satana Kaseebanya; pantu Lesa ali nankwe.”—Imilimo 10:38.

Ilingi line, aba mapepo abondapa balafwaya sana ukuti abo baleundapa balipila indalama. Baishibikwa ukuti balasembeleka sana abantu pa kulombelesha indalama. Bashimika ukuti umo alipangile indalama ukucila pa mabilioni ya makwacha 311 mu mwaka umo ukufuma mu mibombele yakwe iya mu calo conse. Amacalici na yo yalapanga indalama ukufuma ku bantu abaya kulya ukuti bondapwe. Lelo Yesu ena talepoka indalama ku bantu aleundapa. Inshita imo abapeele fye ne fya kulya. (Mateo 15:30-38) Ilyo Yesu atumine abasambi bakwe ukuya mu kushimikila, abebele ati: “Muleposha abalwele, mulebuusha abafwa, muleposha aba fibashi, mulefumya ifibanda. Mwapeelwe fye ubupe, na imwe mulepeela fye.” (Mateo 10:8) Cinshi ificita aba mapepo abondapa muno nshiku fyapusanina nga nshi ne fyo Yesu aleundapa?

Bafumya kwi Amaka ya Kundapila?

Imyaka yapita, badokota abengi balabebeta sana ifi aba mapepo batila balondapa. Cinshi basanga? Ulupapulo lwa ku London ulo beta ati Daily Telegraph lwatile dokota umo ku England uwapoosele imyaka 20 alebebeta ili lyashi atile: “Takwaba ubushininkisho ubuli bonse ubwa kuti aba mapepo balondapa abantu.” Lelo, abantu abengi balisumina ukuti balyundapwa ku fintu pamo nga ifipe fya kale sana ifyo abantu balepepa Lesa balebomfya, na ku fintu fimbi ifibomfiwa mu mapepo, e lyo na kuli bashimapepo bene. Bushe nalimo abalanda ifi bababepa fye ukuti nabapola?

Mu Lyashi lyakwe ilyalumbuka ilya pa Lupili, Yesu atile aba mu mipepele ya bufi bakesa kuli ena no kuti: ‘Mwe Shikulu, mwe Shikulu, bushe tatwacitile ifipesha amano ifingi mwi shina lyenu?’ Lelo akabasuka ati: “Nshatalile imwishiba! Fumeni apa, mwe bampulamafunde mwe.” (Mateo 7:22, 23) Ilyo umutumwa Paulo alesoka pa ko aba bantu bafumya amaka, atile: “Ukubapo kwa kwa mpulamafunde kwaba ukulingana no kubomba kwa kwa Satana mu fya maka fyonse ne fishibilo ne fipesha amano ifya bufi kabili akabomfya imisango yalekanalekana iya bufi ku kubepa abali no kuloba.”—2 Abena Tesalonika 2:9, 10.

Kabili ukundapa umo babomfya ifilubi, ifipasho, e lyo na fimbi te kuti kufume kuli Lesa. Mulandu nshi? Pantu Icebo ca kwa Lesa citweba mu kulungatika ukuti: “Fulumukeniko ku kupepa utulubi” e lyo no kuti “Muletaluka ku tulubi.” (1 Abena Korinti 10:14; 1 Yohane 5:21) Kanshi uku kundapa kwaba pa micenjelo ya kwa Satana iya kufumishamo abantu ku kupepa kwa cine. Baibolo itila: “Satana umwine alaifungushanya kwati ni malaika wa lubuuto.”—2 Abena Korinti 11:14.

Ico Yesu na Batumwa Baleundapila Abantu

Ukundapa kwa cine ukwalembwa mu Malembo ya ciGriki aya Bena Kristu kulanga ukuti Yesu na batumwa bali bantu ba kwa Lesa. (Yohane 3:2; AbaHebere 2:3, 4) Ukundapa kwa kwa Yesu na kabili kwalelanga ukuti ifyo aleshimikila fya cine, pantu Baibolo itila: “Ashingulwike mu Galili monse, alesambilisha mu masunagoge yabo no kubila imbila nsuma ya bufumu no kuposha imisango yonse iya malwele ne misango yonse iya ntenda mu bantu.” (Mateo 4:23) Ifipesha amano fya kwa Yesu, apali ukundapa abalwala, ukuliisha abantu abengi, ukutalalika icikuuku ca mwela, no kubuusha abafwa, fyalangile ifyo akacitila abantunse aba cumfwila ilyo Ubufumu bwakwe bukalateka. Iyi ni mbila nsuma icine cine!

Lelo ifi fipesha amano nelyo ifya bupe fya mupashi, fyaishilepwa lintu Yesu na batumwa bakwe pamo na bambi abapeelwe amaka bafwile. Umutumwa Paulo alembele ati: “Nangu kube ica bupe ca kusesema, nangu ica kulandila mu ndimi [mu cipesha amano], nangu ica bupe ca kwishiba ifintu mu cipesha amano, fyonse ifi fikapwa.” (1 Abena Korinti 13:8) Mulandu nshi? Pantu ico Lesa abikileko ifipesha amano ca kutila abantu beshibe Yesu ukuti e Mesia walaiwe no kuti Lesa alepaala icilonganino ca Bena Kristu. Kanshi iyi milimo ya maka pamo no kundapa abantu, taikabilwa ino nshita; ‘yalipwa.’

Lelo ifipesha amano fya kwa Yesu ifya kundapa filatusambilisha icintu cacindama lelo. Nga tulebika amano ku Bufumu bwa kwa Lesa no kutetekela ifyo Yesu asambilishe pali ubu Bufumu, kuti twacetekela ukuti inshita ikesa ilyo ukusesema kwafuma kuli Lesa kukafikilishiwa mu kwampana kwesu na Lesa e lyo na ku mibili yesu, ukwa kuti: “Takuli umwikashi uukatila: ‘Nindwala.’”—Esaya 33:24; 35:5, 6; Ukusokolola 21:4.