Ababelenga Ino Magazini Balepusha Ukuti . . .
Bushe Inte sha kwa Yehova Balapepelela Abalwele pa Kuti Bapole mu Cisungusho?
▪ Inte sha kwa Yehova tabatala abapepelelapo abalwele pa kuti bapole mu cipesha mano. Nga filya Yesu asumine, nabo basumina ukuti umulimo wabo uukalamba wa kubilisha imbila nsuma iya Bufumu bwa kwa Lesa. Basumina no kuti kwaliba icintu icacindama nga nshi icishibisha Abena Kristu ba cine, te kupepelela abalwele iyo.
Ukwabula no kutwishika, ukundapa abalwele uko Yesu Kristu acitile ilyo ali pano calo kwalicindama nga nshi kuli ifwe bonse. Filya aleundapa abalwele fyalelanga ukuti ilyo akalateka mu Bufumu bwa kwa Lesa, “takuli umwikashi uukatila: ‘Nindwala.’”—Esaya 33:24.
Inga muno nshiku mwena caba shani? Bashimapepo abatila Bena Kristu e lyo na ba mu mipepele ishili ya Bena Kristu abapepelela abalwele, batila balondapa abantu mu cipesha amano. Nomba Yesu alisokele sana abasambi bakwe pa bantu abaleitunga “ukucitila ifipesha amano” mwi shina lyakwe. Akeba balya bantu ukuti: “Nshatalile imwishiba! Fumeni apa, mwe bampulamafunde mwe.” (Mateo 7:22, 23) E ico, bushe abatila balapepelela abalwele muno nshiku bafumya amaka kuli Lesa?
Tontonkanyeni pa kundapa Baibolo yalandapo uko Yesu acitile. Nga twalinganya ifyo Yesu aleundapa ku fyo abantu muno nshiku bacita pa kundapa abalwele, kuti twamona nga ca kutila Lesa e upeela aba bantu amaka nelyo iyo.
Yesu taleundapa abalwele pa kuti ongole abantu abengi aba kumukonka. Pa kundapa abalwele aleya ku ncende ukushili abantu. Ilingi line ale-eba abo aleposha ukuti be-ebako umuntu nangu umo.—Luka 5:13, 14.
Yesu talelipilisha indalama pa fisungusho alecita. (Mateo 10:8) Kabili talefilwa ukucita ifipesha mano. Abalwele bonse abaleisa kuli ena alebondapa, kabili pa kundapa umuntu taleti kano nakwata icitetekelo. (Luka 6:19; Yohane 5:5-9, 13) Na kuba, alebuusha fye na bafwa!—Luka 7:11-17; 8:40-56; Yohane 11:38-44.
Nangu ca kutila alecita ifi fipesha mano, Yesu talefwaya abantu balemukonka pa mulandu wa fipesha mano. Lelo umulimo wakwe uukalamba wali wa kubila imbila nsuma iya Bufumu bwa kwa Lesa. Yesu akanshishe abasambi bakwe ukulabomba umulimo wa kulenga abantu ukuba abasambi, ukulasambilisha bambi ukuti ilyo Ubufumu bwa kwa Lesa bukalateka, abantu bonse bakaba abapwililika.—Mateo 28:19, 20.
Ca cine, abasambi ba kwa Yesu bamo mu nshita sha batumwa balikwete ifya bupe fyaibela ifya kundapa, lelo ifi fya bupe fyali no kupwa. (1 Abena Korinti 12:29, 30; 13:8, 13) Abena Kristu ba cine tabeshibikilwa ku kundapa abalwele lelo beshibikilwa ku kutemwa kwa cine cine. (Yohane 13:35) Ukupepelela abantu muno nshiku takwalenga abantu aba nkulilo shapusanapusana kabili abafuma ku fyalo fyalekanalekana ukuba Abena Kristu abaikatana kabili abatemwana nga nshi.
Lelo, kwaliba ibumba lya Bena Kristu abaikatana pa mulandu wa kuti balitemwana. Aba bantu balitemwana nga nshi ica kuti balakaana ukulwako inkondo nangu ifintu fyafye shani. Bushe ni bani aba bene? Ni Nte sha kwa Yehova. Mu calo fye conse, baishibikwa ukuti bakwata ukutemwa nga kulya kwakweteko Kristu. Kuti twatila ukwikatanya abantu abafuma mu fyalo ifyapusana, aba mitundu yapusana, kabili abakwata intambi shapusana ne fikulilo, cipesha mano kabili umupashi wa mushilo uwa kwa Lesa fye e wingalenga ukuti ici cicitike. Bushe te kuti mutemwe ukulongana na bo pa kuti mwingaimwena mwe bene ifyo batemwana?
[Icikope pe bula 13]
Bushe abapepelela abantu mu cisungusho muno nshiku bafumya amaka kuli Lesa?