Palameni Kuli Lesa
Kabumba Uwalinga Ukulumbanya
BUSHE mwalibala amuipushapo ati, ‘Cinshi fwe bantunse twapangiilwe?’ Abantu abasumina ukuti ifintu fyalesanguka fye mpaka fyaba ifyo fyaba ino nshita balafilwa ukwasuka ici cipusho. Lelo abasumina icishinka ca kuti Yehova Lesa e Ntulo ya bumi bena balishiba icasuko. (Amalumbo 36:9) Balishiba ukutila paliba umulandu atupangile. Uyu mulandu walilandwapo pa Ukusokolola 4:11. Natumone ifyo aya mashiwi, ayalembelwe no mutumwa Yohane, yalondolola ico twabela pano calo.
Yohane alembele ifyo aba ku muulu baleimba no kulumbanya Lesa abati: “Mwalilinga, mwe Yehova, mwe Lesa wesu, ukupokelela ubukata no mucinshi na maka, pantu ni mwe mwabumbile ifintu fyonse, kabili ni pa mulandu wa kufwaya kwenu fyabeleleko no kubumbwa.” Yehova fye eka e walinga ukucindikwa ifi. Mulandu nshi? Pantu e ‘wabumbile ifintu fyonse.’ Nomba cinshi abantu bakwe balingile ukucitapo?
Ili lembo litile Yehova alilinga “ukupokelela” ubukata, umucinshi, na maka. Te kuti tutwishike ukuti e wacindamisha, uwacindikwa sana, kabili uwakwatisha amaka mu muulu na pe sonde. Nomba abantu abengi tabasumina ukuti Lesa e wapangile ifintu fyonse. Lelo, kwaliba abantu abengi abamona bwino “imibele” ya kwa Lesa pa kumona ifyo abumba. (Abena Roma 1:20) Pa mulandu wa kuti balatasha nga nshi pa fyo acita, balapeela Yehova ubukata no mucinshi. Balabila kuli bonse abengomfwa ubushininkisho bwine bwine ubwa kuti Yehova e wapangile bwino ifintu fyonse kabili e walinga ukucindika.—Amalumbo 19:1, 2; 139:14.
Lelo, Yehova apokelela shani amaka ukufuma ku bamupepa? Kwena, takwaba icibumbwa icingapeela Kabumba wa maka yonse amaka. (Esaya 40:25, 26) Lelo, apo twapangwa mu cipasho ca kwa Lesa, twalipeelwako imibele ya kwa Lesa, kabili pali iyo mibele paba na maka. (Ukutendeka 1:27) Nga ca kuti tulatasha pa fyo Kalenga wesu atucitila, tukafwaya ukubomfya amaka yesu ukumucindika no kumulumbanya. Ukucila ukulabomfya amaka yesu yonse ku kucita fye ifyo tulefwaya, twalishiba ukuti Yehova Lesa alilinga ukupokelela amaka yesu yonse ilyo tulemubombela.—Marko 12:30.
Nomba cinshi twabela pano calo? Amashiwi ya kulekelesha mu Ukusokolola 4:11 yalasuka ayati: “Ni pa mulandu wa kufwaya kwenu [fyonse ifyo mwapangile] fyabeleleko no kubumbwa.” Tatwaipangile fye iyo. Lesa e watupangile. E ico, umuntu nga alecita fye ifingamusekesha umwine, taba ne nsansa nakalya. Pa kuti tube no mutende, insansa, no kusekelela mu mutima, tufwile ukusambilila pa kufwaya kwa kwa Lesa no kulakukonka. Nga twacita ifi, e lyo tukeshiba ico twapangiilwe ne co twabelako.—Amalumbo 40:8.
[Abatusuminishe Ukubomfya Icikope pe bula 31]
NASA, ESA, and A. Nota (STScI)