Lekeni Bonse Tucindike Yehova no Mwana Wakwe
Ifyo Bonse Abakasangwa ku Cibukisho pa April 8 Bengamwenamo Sana
1 Ni bani lelo abapeelwa umucinshi waibela? Ni balya abacita fimo ifyo abantu bamona ukutila e fyacindama sana mu calo. Lelo kwena, ilingi line imilimo yabo bwangu bwangu ilalabwako. Ni shani ku lwa milimo yacindama iilenga abantunse bonse ukumwenamo? Imilimo ikalamba e yo tukatontomeshapo sana ilyo tukasefya Umulalilo wa kwa Shikulu cilya akasuba kawa pa April 8, 2001.
2 Nani alinga ukucindikisha? Baibolo yasuka ukuti: “Mwaliwamina, mwe Shikulwifwe . . . ukupokelelo bukata no mucinshi na maka; pantu ni mwe mwalengele ifintu fyonse.” (Ukus. 4:11) Apo Yehova e Kabumba, ni Mulopwe kabili Kateka wa bubumbo bonse. Akaba uwalinga ukucindikwa umuyayaya!—1 Tim. 1:17.
3 Yesu Kristu, Umwana wa kwa Lesa, abombele imilimo yacindama iikaleta amapaalo ya muyayaya ku bantunse. Apashenye Wishi bwino bwino. (Yoh. 5:19) Icumfwila cakwe icapwililika no mulimo wakwe uwa bucishinka, fyalengele ‘awamine ukupokelela amaka, no bucindami, na mano, no kukosa, no mucinshi, no bukata, ne paalo.’ (Ukus. 5:12) Wishi alimucindike pa kumuteka pa Bufumu. (Amalu. 2:6-8) Kumfwa kuli ifwe, tukaba ne shuko lya kucindika bonse babili Wishi no Mwana ilyo tukasefya Umulalilo wa kwa Shikulu pa April 8, 2001.
4 Icabipako fye ca kuti, apo abantunse babela pa calo, banono fye abapeela Yehova no Mwana wakwe umucinshi wabalinga. Limo, nelyo fye bantu ba kwa Lesa bene aba ku kale, abena Israele, balebombela fye Yehova ico cine. Uyo wali musaalula uwine wine. (Mal. 1:6) Umucinshi wine wine upinda umuntu ukuba ne cumfwila ca cishinka icashimpwa pa kutemwa no kutasha pali fyonse ifyo Yehova no Mwana wakwe baatucitila. Ukuba no mucinshi wine wine ukwa musango yo kukalanga ukuti twaba na katiina ka bulesa kuli Yehova na Yesu mu mikalile yesu yonse. Icilonganino ca Bwina Kristu cilatukuta ukusambilisha no kwafwilisha bambi ukucita cimo cine.
5 Inshita Yaibela iya Kucindika Yehova na Yesu: Icibukisho e kulongana kwacindamisha ku bantu ba kwa Yehova cila mwaka. Umuntu onse uufwaya ukubombela Yehova no kumucindika afwile ukusangwako. (Luka 22:19) Tulesubila ukuti ukulunda ku Nte abali amamilioni 6, abantu na bambi abatemwa icine bakasangwako kabili bakalenga impendwa ikafike ukucila na ku mamilioni 14. Mwandini ikaba ni nshita yaibela iya kucindika Shifwe wa ku muulu! Ilyo kwena uku kusefya kutontomesha pali Yesu, ubukata no mucinshi tulanga ku co acitile, ficindika Wishi, uwamutumine.—Yoh. 5:23.
6 Cinshi twingacita ku kutungilila uku kusefya kwaibela? Kuti twayafwa abapya abalefwaya ukusambilila icine ukumwenamo sana. Bacincisheni ukusangwako, kabili nga balekabila ubwafwilisho, beni aba cikuuku no kubafwa pa kuti bakasangweko. Balondolweleni ubufwayo bwa lyashi. Beshibisheni kuli bambi. Ifyo bakamona no kumfwa kuti fyabacincisha ukufwaya ukwikatana na ifwe mu kucindika Yehova.
7 Mwimona kwati umuntu nangu asangwe ku Cibukisho te kuti asambilileko ifingi sana. Umusambi umo uwa pa yuniversiti atile: “Nalisangwa sana ku kulya umukate no kunwa umwangashi ku calici ku mwandi, lelo ifyo mucita kuno fyena fyaibela. Ifi e filya fine Baibolo ilanda, imwe mufwile ni mwe musambilisha icine.” Atendeke ukusangwa ku kulongana lyonse kabili bwangu bwangu alibatishiwe.
8 Afweni Abapya Ukuti Balunduluke: Sungeni amashina ya bapya abakasangwa ku Cibukisho, no kubatandalila bwangu bwangu pa numa ya kupituluka mu fisuma ifyo basambilile ne fyo bamwene. Balondolweleni ukulongana na kumbi uko bengasangwako ku kulundako ukwishiba kwabo ukwa fya mu Baibolo. Nga mwasambilila na bo icipandwa 17 mu citabo ca Ukwishiba, icitila: “Sanga Umutelelwe pa Kati ka Bantu ba kwa Lesa,” bakomfwa amapaalo ayengi aya ku mupashi ayaba mu cilonganino, ayo na bo bene bengakwata. Nga kuti mwasanga ifya kutambilako vidio, pekanyeni ukubatambisha tepu wa Our Whole Association of Brothers pa kuti bakaimwene ukwikatana, ukusekelela, no kupimpa kwa bantu ba kwa Yehova!
9 Calicindama ukuti abalefwaya ukusambilila icine beshibe ifyo pa lwabo bengakatamika Yehova no kumupeela umucinshi. Balondolweleni ukuti ipepo lya kufuma ku mutima lilasekesha Yehova kabili lyonse lilapembula lwa ku mupashi. (1 Yoh. 5:14) Bomfyeni amasambililo 8 ukufika ku 12 muli broshuwa wa Cintu Lesa Afwaya, ukulondolwela umuntu imibele icindika Yehova. Ukupitila mu kulanshanya ifyalandwa muli broshuwa wa Inte sha kwa Yehova—Ni Bani? Finshi Basuminamo?, pa amabula 30 na 31, koselesheni abapya ukutontonkanya pa kucindika Yehova ukupitila mu kubombako umulimo wa kushimikila.
10 Ukutasha nga nshi pe lambo lya kwa Yesu na pe shuko lya kuba abasambi bakwe, kulacindika Wishi no kulenga bambi ukupaalwa. Yesu alaile ukuti: “Ngo muntu ampyungila, Tata akamucindika.”—Yoh. 12:26.