Tulemwita Mu Kulongana

NALIMO mwalimonapo Ing’anda ya Bufumu uko mwikalila no kutontonkanya ati bushe finshi bacitamo umu mwine? Bushe mwalishiba ukuti onse uulefwa kuti asangwako ku kulongana ukubako pa Mayanda ya Bufumu cila mulungu? Tulatemwa sana bambi nga baisalongana na ifwe.

Nomba, nalimo kuti kwaba fimo ifyo mwingafwaya ukwipusha. Cinshi Inte sha kwa Yehova balonganina? Cinshi cicitika pali uku kulongana? Kabili cinshi bambi abashili Nte sha kwa Yehova abasangwako ku kulongana balandapo pa fyo balongana?

“Longanyeni Abantu”

Ukufuma fye kale, abantu balalongana pa kuti bapepe Lesa no kusambilila pali ena. Imyaka nalimo 3,500 iyapita, abena Israele baebelwe ati: “Longanyeni abantu, abaume na banakashi na banono na balebeshi benu abali mu mpongolo shenu, pa kutila bakutike kabili basambilile, pantu bafwile ukulatiina Yehova Lesa wenu no kubika amano ku kukonka fyonse ifyalembwa muli ili funde.” (Amalango 31:12) Kanshi bonse abaice na bakalamba mu Israele balesambilishiwa ukupepa Yehova Lesa no kumumfwila.

Ilyo papitile imyaka iingi, lintu icilonganino ca Bena Kristu capangilwe, ukulongana kwali pa fintu fyacindeme ifyo balecita mu kupepa kwa cine. Umutumwa Paulo alembele ati: “Tuletontonkanya pa banensu pa kuti tulecincishanya mu kutemwa na mu kubomba imilimo iisuma, twilapuswa ku kulongana filya waba umusango wa bamo, lelo tulekoseleshanya.” (AbaHebere 10:24, 25) Filya fine kuba ukwikatana mu lupwa nga ca kuti muleikala pamo, na bafwaya ukubombela Lesa na bo balatemwana sana nga balelongana pamo ku kupepa Lesa.

Ukukonka ifi Baibolo yalanda kwalenga Inte sha kwa Yehova balelongana pa Mayanda yabo aya Bufumu imiku ibili mu mulungu. Uku kulongana kulafwa abasangwako ukwishiba ubucindami bwa fyaba mu Baibolo, ukufyumfwikisha, no kwishiba ifyo bengafikonka. Ilingi line, uku kulongana kuba fye cimo cine mu calo conse, kabili cila kulongana kwalikwata umulandu bakupekanishisha. Ilyo ukulongana kushilatampa na lintu kwapwa, abasangwako ‘balakoseleshanya’ ilyo balanshanya pa fintu ifisuma. (Abena Roma 1:12) Bushe cinshi cicitika pa kulongana konse ukubako?

Ilyashi lya Baibolo

Ukulongana kwa kubalilapo uko abengi basangwako, lyashi ilya Baibolo ilya cintubwingi, ilibako pa mpela ya mulungu. Yesu Kristu na o alelanda amalyashi ku cintubwingi, kabili limo pali aya malyashi, Lyashi lya pa Lupili ilyalumbuka nga nshi. (Mateo 5:1; 7:28, 29) Umutumwa Paulo alilandile na baume ba ku Atena. (Imilimo 17:22-34) Nga filya fine Yesu na Paulo balecita, Inte sha kwa Yehova balapekanya ukuti pa kulongana kwabo paleba ilyashi lya kwafwa abantu bonse, kabili bamo pa basangwako nalimo uba e muku wa kubalilapo ukusangwa mu kulongana.

Uku kulongana kutendekela no lwimbo ukufuma mu citabo citila Imbileni Yehova Amalumbo.a Bonse abalefwaya ukwima no kwimbako ulwimbo balema. Nga bapepa, umuntu uwaishiba ukusambilisha alafunda pa mamineti 30. (Moneni akabokoshi kaleti “Amalyashi ya Cintubwingi Yamo.”) Ifyo alanda fifuma muli Baibolo. Kabili ilingi aleba abasangilweko ukumona amalembo no kukonkamo ilyo alebelenga. Kanshi, kuti nalimo mwaisa na Baibolo yenu, nangu kuti mwaipusha Inte sha kwa Yehova ukuti bamupeeleko Baibolo ilyo ukulongana kushilatendeka.

Isambililo lya Ulupungu lwa kwa Kalinda

Mu filonganino ifingi ifya Nte sha kwa Yehova, ilyashi lya cintubwingi nga lyapwa pakonka Isambililo lya Ulupungu lwa kwa Kalinda pe awala limo, kabili muli ili sambililo kuba ukulanshanya pa fya mu Baibolo kabili uuletungulula alepusha amepusho e lyo abasangilweko baleasuka. Uku kulongana kukoselesha abasangilweko ukupashanya abena Berea aba mu nshiku sha kwa Paulo, abo “imitima yabo yafwaishe nga nshi ukupokelela amashiwi ya kwa Lesa. Balefwailisha mu Malembo.”—Imilimo 17:11.

Isambililo lya Ulupungu lwa kwa Kalinda litendekela no lwimbo. Ifyo balanshanyapo na mepusho ayo uuletungulula epusha fiba muli magazini ya kusambililamo. Kuti mwapokako iyi magazini ya kusambililamo ku Nte sha kwa Yehova. Yamo amalyashi twalesambililapo nomba line ni aya: “Mwe Bafyashi—Beni ne Citemwiko pa Kukansha Abana Benu,” “Mwiba Ababwesesha Umuntu Nelyo Umo Ububi pa Bubi,” e lyo na “Ukucula Konse Kuli no Kupwa Nomba Line.” Nangu ca kuti pali uku kulongana uuletungulula alepusha amepusho e lyo abasangilweko baleasuka, abantu tabapatikishiwa ukwasukapo kabili ilingi line, abasukapo ni balya aba kuti nababelengamo kale no kwishiba ifyo twalasambilila e lyo na malembo ayalimo. Pa mpela ya uku kulongana kulaba ukwimba ulwimbo no kupepa.—Mateo 26:30; Abena Efese 5:19.

Isambililo lya Baibolo Ilya pa Cilonganino

Ubushiku bumo cila mulungu, Inte sha kwa Yehova balalongana na kabili pa Ng’anda ya Bufumu pa kuti bakwate ukulongana kutatu ukusenda iawala limo na mamineti 45. Ukulongana kubalilapo kwa mamineti 25, kabili tukwita ati Isambililo lya Baibolo ilya pa Cilonganino. Ili isambililo lilafwa abasangwako ukwishiba bwino Baibolo, ukwalula ukutontonkanya kwabo ne misango yabo, no kuba abasambi ba kwa Kristu abasuma. (2 Timote 3:16, 17) Nga filya fine ciba pe Sambililo lya Ulupungu lwa kwa Kalinda, pali uku kulongana na po palaba uutungulula uwipusha amepusho e lyo abasangilweko baleasuka pa lyashi limo ilya mu Baibolo. Abasukapo tababapatikisha, bene fye bafwaya. Pa kusambilila babomfya ifitabo ifyalembwa ne Nte sha kwa Yehova.

Cinshi babomfesha ifitabo filanda pa fya mu Baibolo pali uku kulongana? Kale sana pa nshita Baibolo yalelembwa, tabalebelenga fye amashiwi yaba mu Cebo ca kwa Lesa. “Baleyalondolola, no kubeba umo yalola; kabili balelenga abantu ukumfwikisha ifyalebelengwa.” (Nehemia 8:8) Mu myaka yapita, ukulanshanya pa mabuuku yalembelwe na Esaya na Daniele, e lyo ne buuku lya Ukusokolola kwalyafwa abasangwa pali uku kulongana ukwishiba bwino ifyaba muli aya mabuuku.

Isukulu lya Butumikishi bwa Bulesa

Isambililo lya Baibolo ilya pa Cilonganino nga lyapwa, pakonka Isukulu lya Butumikishi bwa Bulesa. Uku kulongana ukwa mamineti 30 kwa kwafwa Abena Kristu ukwishiba “ukusambilisha bwino.” (2 Timote 4:2) Ku ca kumwenako, bushe umwana wenu nangu umunenu alimwipushapo icipusho pali Lesa nelyo pali Baibolo ico mwafililwe ukwasuka bwino? Isukulu lya Butumikishi bwa Bulesa kuti lyamusambilisha ifya kwasuka ifyasuko ifisuma ifya mu Baibolo ku fipusho fyakosa ifyo bengamwipusha. E ico kuti twalanda ifyalandile kasesema Esaya, uwatile: “Shikulu Mulopwe Yehova umwine alimpeela ululimi lwa basambilila, ukuti njishibe ifya kwasuka uwanaka ku cebo.”—Esaya 50:4.

Isukulu lya Butumikishi bwa Bulesa litendekela ne lyashi ililanda pa ciputulwa ca mu Baibolo ico abasangilweko bakoseleshiwe ukubelenga muli uyo mulungu. Ilyo kalanda wa ili lyashi apwisha ukulanda, aleba abasangilweko ukulandapo panono pali fimo ifili muli ico ciputulwa ifyo batemenwemo. Pa numa ya ili lyashi, abasambi abalembesha muli ili sukulu balalanda amalyashi bapeelwa.

Abasambi balebwa ukubelenga iciputulwa cimo ica mu Baibolo pa cisebele nelyo ukulanga ifya kusambilisha umuntu ifya mu Baibolo. Ilyo ilyashi lyapwa, kafundisha uwafikapo alatasha abasambi pa fyo bacicita bwino, kabili pa kucita ifi abomfya icitabo icitila Nonkelenimo mu Masambililo ye Sukulu lya Bulesa. Ilyo ukulongana kwapwa, pa mbali uyu kafundisha kuti aeba umusambi fimo ifyo ashacicita bwino e lyo ne fyo engacita pa kuti alelanda bwino.

Uku kufunda abasambi, ukushipoosa sana inshita, te kwa kwafwa fye abasambi lelo kwa kwafwa na bonse abasangilweko abalefwaya ukwishiba ukubelenga bwino, ukulanda bwino, no kusambilisha bwino. Isukulu lya Butumikishi bwa Bulesa nga lyapwa, kulaba ukwimba ulwimbo ulufuma mu Baibolo pa kutendeka Ukulongana kwa Mulimo.

Ukulongana kwa Mulimo

Ukulongana kulekeleshako Kulongana kwa Mulimo. Abasangwako kuli uku kulongana balasambilila ifya kusambilisha icine ca mu Baibolo bwino ilyo balekutika ku malyashi, ilyo balemona ifilangililo, ilyo balekutika lintu bambi baleshimika ifyo bapitamo, e lyo no kwasukapo pali uku kulongana. Ilyo Yesu ashilatuma abasambi bakwe ukuya mu kushimikila, alibalonganike no kubalondolwela bwino ifya kubomba. (Luka 10:1-16) Apo nomba bali-ipekenye bwino ukubomba umulimo wa kushimikila, balibombele bwino sana. Ilyo babwelele, balyebeleko Yesu ifyo babombele. (Luka 10:17) Abasambi ilingi line baleshimikilana ifyalebacitikila ilyo baleshimikila.—Imilimo 4:23; 15:4.

Ifyo Ukulongana kwa Mulimo ukwa mamineti 35 kuba filatantikwa mu kapepala akafuma cila mweshi ako twita ati Ubutumikishi Bwesu Ubwa Bufumu. Amalyashi yamo ayaali pali uku kulongana nomba line yaleti: “Ukupepa Yehova Pamo no Lupwa,” “Umulandu Tuyila ku Bantu Libili Libili,” e lyo ne lya kutila “Pashanyeni Kristu mu Mulimo Wenu.” Pa kupwa uku kulongana, kulaba ukwimba ulwimbo, kabili umo uwa mu cilonganino alapepa ipepo lya kulekelesha.

Ifyo Abeni Abasangwako Balandapo

Ababa mu filonganino balapokelela bwino bonse fye abesa. Ku ca kumwenako, Andrew alyumfwile ifibi ifingi pa Nte sha kwa Yehova. Lelo ilyo asangilwe ku kulongana umuku wa kubalilapo, alipapile ifyo bamupokelele bwino. Andrew atile: “Ku Ng’anda ya Bufumu kusuma. Nalipapile ifyo abantu bampokelele bwino e lyo ne fyo bantemenwe.” Ashel, umukashana wa ku Canada, na o atile: “Ifyo balesambilisha pa kulongana fyali ifisuma nga nshi! Calyangwike ukukonkamo.”

José, uwa ku Brazil, aishibikwe ukuti ali uwa lubuli. Lelo, balimwitile ukuti asangweko ku kulongana pa Ng’anda ya Bufumu. Atile: “Abali pa Ng’anda ya Bufumu balimpokelele bwino sana, nangu ca kuti balishibe ifyo nali.” Atsushi, uwa ku Japan, aibukisha ati: “Kwena ilyo nalongene ne Nte sha kwa Yehova umuku wa kubalilapo, naletiina. Nomba, nalimwene ukuti kanshi aba bantu baliba fye bwino. Balempokelela bwino icine cine.”

Mukwai Mukese

Nge fyo mwaumfwa ifyo bambi balandilepo, ukusangwa ku kulongana ku Ng’anda ya Bufumu kulawama nga nshi. Nga mwayako, mukasambilila pali Lesa, kabili Yehova Lesa akamusambilisha ifyaba mu Baibolo pa kuti mwishibe ‘ifingamuwamina.’—Esaya 48:17.

Pa kwingila mu Ng’anda ya Bufumu pa kulongana kwa Nte sha Yehova tabalipilisha, kabili tabapishamo imbale ya mutuulo. Bushe te kuti mutemwe ukusangwa ku kulongana pa Ng’anda ya Bufumu iyabela mupepi no ko mwikala? Tulemwita ukuti mukesesangwako.

[Futunoti]

[Akabokoshi pe bula 21]

Amalyashi ya Cintubwingi Yamo

Amalyashi ya Baibolola yalicila 170 kabili yalanda pa fya mu Baibolo. Pali aya malyashi paba na ya kuti:

◼ Bushe Conse Ico Mwasumina Ukuti E Ntuntuko ya Bantunse Kuti Caba fye Bwino?

◼ Ulupwa lwa Nsansa

◼ Ukonaula Isonde Kuleta Icilandushi ca kwa Lesa

◼ Ukubomba na Masakamika ya Bumi

◼ Bushe Ubu E Bumi Bweka Bwabako?

[Icikope pe bula 21]

Ilyashi lya Baibolo

[Icikope pe bula 21]

Isambililo lya “Ulupungu lwa kwa Kalinda”

[Ifikope pe bula 22]

Isambililo lya Baibolo Ilya pa Cilonganino

[Icikope pe bula 22]

Isukulu lya Butumikishi bwa Bulesa

[Icikope pe bula 23]

Ukulongana kwa Mulimo