Umukululo Wa Mepusho

◼ Bushe nani uufwile ukweba ibumba ulwimbo lwa kwimba pa kutendeka Isukulu lya Butumikishi Ilya Bulesa, Ukulongana kwa Mulimo, Ukulongana kwa Cintubwingi, ne Sambililo lya Ulupungu lwa kwa Kalinda?

Inyimbo sha kwimba cila mulungu pe Sukulu lya Butumikishi Ilya Bulesa shiba mu Mutande wa Malyashi ye Sukulu lya Butumikishi Ilya Bulesa uuba mu Ubutumikishi Bwesu Ubwa Bufumu ubwa October. Inyimbo sha kwiswila no kwisalila Ukulongana kwa Mulimo shilembwa pe bula 2 mu Ubutumikishi Bwesu Ubwa Bufumu. Inyimbo sha kwimba pe Sambililo lya Ulupungu lwa kwa Kalinda na sho shiba pe bula 2 mu Ulupungu lwa kwa Kalinda. Ishi nyimbo shaba lubali lwa kulongana kulekonka pali ulu lwimbo kabili uufwile ukweba ibumba ulwimbo lwa kwimba ni munyinefwe uuletungulula uko kulongana, te waciba ceyamani wa kulongana kumbi.

Tutile ni pa kulongana kwe Sukulu lya Butumikishi Ilya Bulesa. Kangalila we sukulu afwile ukusengela ibumba no kubeba ulwimbo lwa kwimba, e lyo atungulula isukulu. Nga apwisha alingile ukwita kalanda wa kubalilapo mu Kulongana kwa Mulimo ukuti ese pa cisebele. Munyinefwe uwa kubalilapo mu Kulongana kwa Mulimo e ukeba ibumba ulwimbo lwa kwimba pa kutendeka Ukulongana kwa Mulimo.

Na pa Kulongana kwa Cintubwingi na po, ceyamani e ufwile ukutendeka ukulongana. Afwile ukusengela bonse abeshile no kubeba ulwimbo lwa kwimba pa kutendeka ukulongana ulo uulelanda ilyashi asalile. Ceyamani akapepa ipepo lya kwiswila ukulongana (nangu munyinefwe umbi uwingalinga uo baebele limo). Ceyamani afwile ukulanda umutwe we lyashi no kwita kalanda. Ilyashi nga lyapwa, ceyamani, alingile ukulanda fye panono amashiwi ya kutasha pa lyashi, te kusupawila ifyo kalanda aciba alelanda. Alingile ukubilisha ku cilonganino umutwe wa lyashi lya cintubwingi ilikabako umulungu uleisa, nga apwisha alingile ukweba bonse mwi bumba ukuti kwalaba ne Sambililo lya Ulupungu lwa kwa Kalinda. Ceyamani talingile ukwipusha ibumba nampo nga balefwaya ukutuma umutende ku cilonganino ukufumine kalanda umweni. Icakonkapo, ceyamani alingile ukwita katungulula we Sambililo lya Ulupungu lwa kwa Kalinda.

Katungulula we Sambililo lya Ulupungu lwa kwa Kalinda e ufwile ukweba ibumba ukwima no kwimba ulwimbo lwa kubalilapo ululi mu Ulupungu lwa kwa Kalinda. Afwile ukutungulula isambililo ukulingana ne fyo katungulula bamweba ukukonka kabili pa mpela ye sambililo, e ukeba ibumba ulwimbo lwa kwimba. Katungulula we Sambililo lya Ulupungu lwa kwa Kalinda aketa munyina uwa kupepa ipepo lya kusondwelela. Ilingi line kuti aita munyinefwe uwacilanda ilyashi lya cintubwingi ukwisapepa.

Nga tulekonka ifi twalandapo pa fyo ukulongana kufwile ukuba, ninshi ukulongana kukalatungululwa fye cimo cine mu calo conse.