Palameni Kuli Lesa

Yehova Ailondolola Ifyo Aba

Ukufuma 34:6, 7

BUSHE kuti mwalondolola shani ifyo Lesa aba ne fyo acita? Tontonkanyeni ukuti mwalikwete ishuko lya kwipusha Lesa ifyo aba e lyo mwaumfwa alelondolola imibele yakwe. Ifi fine e fyacitikile kasesema Mose. Kabili icawama ca kuti balimwafwile ukulemba ifyacitike pali iyi nshita.

Ilyo Mose ali pa Lupili lwa Sinai, apapeete Yehova ati: “Mukwai nengeni ukumona ubukata bwenu.” (Ukufuma 33:18) Ubushiku bwakonkelepo, uyu kasesema alimwene ifyo ubukata bwa kwa Lesa bwaba.a Mose talondolwele sana ifyo amwene muli ici cimonwa. Lelo, alembele icintu icacindama sana, ne ci cintu Lesa alandile. Natumone ifyo Yehova alandile, nga filya tubelenga pa Ukufuma 34:6, 7.

Ica kubalilapo ico Yehova alandile ca kuti ni “Lesa wa luse kabili uwa mutembo.” (Icikomo 6) Umuntu umo uwasambilila sana Baibolo atile ishiwi lya ciHebere ilyo bapilibula ati “uluse” lilangilila ukuti Lesa “alalangulukilako, nga filya umufyashi umwaume acita ku bana bakwe.” E lyo ishiwi ilyo bapilibula ati “umutembo” lyalipalana ne shiwi ililanda pa “muntu uufwaisha ukwafwa ababulishe fimo ukufuma pa nshi ya mutima.” Kanshi Yehova afwaya twishibe ukuti alasakamana abamupepa, alibatemwa kabili alabapeela ifyo balekabila, filya fine abafyashi bacita ku bana babo.—Amalumbo 103:8, 13.

Yehova kabili alondolwele ukutila ‘alakokola ukukalipa.’ (Icikomo 6) Takalipa bwangu ku babomfi bakwe aba pano calo. Lelo, alabatekanishisha, ukushipikisha ilyo balelufyanya pa mulandu wa kukanapwililika kabili alabapeela inshita ya kwalula imibele yabo iyabipa.—1 Petro 3:9.

Lesa kabili atila ‘alifulisha icikuuku ne cine.’ (Icikomo 6) Icikuuku, nelyo ukutemwa kwa cishinka, mibele iilenga Yehova ukupanga icibusa cakosa kabili icishipwa na bantu bakwe. (Amalango 7:9) Yehova na kabili e ntulo ya cine. Tabepa e lyo kabili tabepwa. Apo ni “Lesa wa cishinka,” kuti twacetekela fyonse ifyo alanda, pamo fye ne fyo atulaya ku ntanshi.—Amalumbo 31:5.

Icacindama cimbi ico Yehova afwaya ukuti twishibe ca kuti alelela “ifilubo na bumpulamafunde no lubembu.” (Icikomo 7) ‘Ali-iteyanya ukwelela’ ababembu abalapila. (Amalumbo 86:5) Lelo Yehova tatemwa ifyabipa. Alondolola ukuti ‘talaba ukukanda abafwile ukukandwa.’ (Icikomo 7) Lesa uwa mushilo kabili uwa mulinganya takaleke ababembukila ku mufulo ukwabula ukubakanda. Bushiku bumo bakakandilwapo pa membu bacita.

Ifi Yehova ailondolwele fitulanga ukutila afwaya tumwishibe no kwishiba imibele yakwe. Bushe kuti mwatemwa ukusambilila na fimbi pa mibele yakwe iisuma?

[Futunoti]